Olketa wea Strong for Preach Mas Prea and Ting Raonem Samting
1. Wanem nao helpem Jesus for tingim evritaem main waka bilong hem?
1 Wanfala evening, Jesus hem healim pipol and raosem olketa demon. Long next day, taem olketa disaepol lukim hem olketa sei: “Evriwan lukaotem iu ia,” olketa encouragem hem for gohed duim olketa mirakol. Bat Jesus no letem nara samting for mekem hem no duim main waka bilong hem for preachim gud nius. Hem sei: “Iumi go long olketa nara taon klosap, mekem mi savve preach long there tu, bikos hem nao wanem mi kam for duim.” Wanem nao helpem Jesus for tingting strong long datfala waka? Hem wekap early for prea and for ting raonem samting. (Mark 1:32-39) Hao nao wei for prea and ting raonem samting savve helpem iumi strong for preach?
2. Wanem nao iumi savve ting raonem wea savve helpem iumi for gohed strong long ministry?
2 Wanem Nao for Ting Raonem? Jesus luksavve pipol “garekil and stap olobaot olsem olketa sheepsheep wea no garem eni man for lukaftarem olketa.” (Matt. 9:36) Long sem wei tu, iumi savve ting raonem hao pipol barava needim gud nius. Iumi mas ting raonem taem wea iumi stap long hem distaem. (1 Cor. 7:29) Iumi savve ting raonem olketa samting wea Jehovah wakem and olketa wei bilong hem, privilege wea iumi garem for kamap wanfala Jehovah’s Witness, and olketa nambawan samting wea iumi lanem from Bible wea pipol long territory no savve abaotem.—Ps. 77:11-13; Isa. 43:10-12; Matt. 13:52.
3. Wanem taem nao maet iumi savve ting raonem samting?
3 Wanem Taem Nao for Ting Raonem Samting? Samfala wekap early olsem Jesus duim. Samfala laek for ting raonem samting long evening bifor olketa go sleep. (Gen. 24:63) Nomata iumi busy, iumi savve markem taem for ting raonem samting. Samfala duim olsem taem olketa go long pablik transport. Olketa narawan ting raonem samting taem olketa lunch finis mekem no eniwan disturbim olketa. Samfala savve ting raonem samting bifor olketa go long ministry, nomata for lelebet taem, datwan savve helpem olketa for preach strong and no fraet.
4. Why nao iumi shud ting raonem samting?
4 Wei for prea and ting raonem samting bae helpem iumi for barava laek servem Jehovah, mekem iumi for tinghae long olketa spiritual samting, and strongim iumi for gohed duim preaching waka. Jesus wea hem Nambawan Wakaman bilong God, kasem gud samting from wei for ting raonem samting. Iumi tu savve kasem gud samting.