No Shame for Preach
1. Why nao hem hard lelebet for preach long skul?
1 Waswe, enitaem iu shame for preach long skul bikos iu fraet nogud olketa nara pikinini tok spoelem iu? Sapos iu man for shame, trae hard for no fraet for story long pipol. Wanem nao iu savve duim?
2. Hao nao iu savve iusim gudfala tingting taem iu preach long skul?
2 Iusim Gudfala Tingting: Taem iu long skul datwan hem chance bilong iu for preach long olketa narawan, bat hem no minim iu mas preach long evriwan. Iusim gudfala tingting bifor iu story long eniwan. (Eccl. 3:1, 7) Taem class story tugeta long wanfala subject or iu duim wanfala assignment long skul, maet hem chance nao for storyim Bible. Or maet wanfala student askem why nao iu no join long samfala samting long skul. Samfala Christian pikinini talem firstaem long teacher hao Olketa Jehovah’s Witness and givim long teacher samfala buk wea storyim biliv bilong iumi. Olketa narawan putim samfala buk long desk bilong olketa, mekem skulfren savve askem kwestin long olketa.
3. Wanem nao iu savve duim for iu redi firstaem, mekem iu savve preach long skul?
3 Redi Firstaem: Isisi bae iu no fraet nao sapos iu redi firstaem. (1 Pet. 3:15) Trae for tingim samfala kwestin wea maet kamap and ting raonem wanem iu savve talem. (Prov. 15:28) Sapos fitim, tekem witim iu long skul, Bible and samfala buk, olsem Reasoning buk, Young People Ask buk, and eni buk wea storyim creation, mekem iu savve story insaed taem eniwan askem kwestin long iu. Taem iufala duim famili worship, askem mami and dadi for iufala savve practice firstaem.
4. Why nao hem gud for gohed preach long skul?
4 No Judgem Man: No tingse olketa skulfren bae evritaem tok spoelem iu taem iu storyim Bible. Samfala maet tinghae long wei wea iu no fraet and maet olketa savve lisin. Bat no wikdaon sapos no eniwan interest. From iu traem best, Jehovah bae hapi long iu. (Heb. 13:15, 16) Gohed askem hem for helpem iu for “no fraet for talemaot message.” (Acts 4:29; 2 Tim. 1:7, 8) Tingim, iu bae barava hapi sapos samwan interest for savve long Bible. Maet gogo hem kamap wanfala witness bilong Jehovah!