Waswe, Bae Iu Auxiliary Pioneer?
1. Why nao hem gud for duim moa samting long ministry long March, April, and May?
1 March, April, and May hem olketa gudfala month for duim moa samting long ministry. From Memorial kamap long datfala taem, iumi savve tingim bigfala love wea Jehovah showimaot taem hem givim Son bilong hem olsem ransom sakrifaes. (John 3:16) From iumi barava tinghae long wanem Jehovah duim, iumi laekem tumas for story long pipol abaotem hem and wanem hem duim for olketa man. (Isa. 12:4, 5; Luke 6:45) Iumi duim spesol campaign tu for invaetem pipol wea iumi savve long olketa and pipol long territory for kam long Memorial. Bihaen Memorial, iumi traem best for helpem olketa wea kam long Memorial. Waswe, bae iu duim moa samting long ministry, olsem for auxiliary pioneer long March, April, or May?
2. Why nao March hem gudfala month for auxiliary pioneer?
2 Markem March Olsem Spesol Month: March hem gudfala month for auxiliary pioneer. Pablisa wea apply savve chus for duim 30 hour or 50 hour. Sapos circuit overseer visitim kongregeson long March, olketa wea auxiliary pioneer savve attendim full meeting bilong olketa regular and spesol pioneer. Memorial bae kamap long Tuesday, March 26, 2013, and campaign for invaetem pipol bae start long March 1. Campaign bae gohed samfala day moa winim olketa nara year. March garem faevfala weekend tu. Waswe, iu savve auxiliary pioneer long disfala spesol month?
3. Wanem nao iumi savve duim for duim moa samting long ministry?
3 Plan Distaem: Distaem nao hem gud for lukluk long schedule bilong iu and ting raonem wanem iu savve changem mekem iu savve auxiliary pioneer. Hem important for famili waka tugeta, so long taem bilong Famili Worship storyim olketa goal bilong famili and mekem schedule. (Prov. 15:22) Sapos iu no fit for auxiliary pioneer, no wikdaon. Waswe, iu savve changem schedule bilong iu mekem iu savve duim samfala hour moa long day wea iu go preaching? Waswe, iu savve markem nara day moa for duim ministry?
4. Wanem gud samting nao bae iumi kasem sapos iumi duim moa samting long March, April, and May?
4 Taem iumi duim moa samting long March, April, and May, bae iumi barava hapi and satisfae bikos iumi worshipim Jehovah and helpem nara pipol. (John 4:34; Acts 20:35) Jehovah tu bae hapi tumas bikos iumi mekem olketa sakrifaes for hem.—Prov. 27:11.