Followim Example Bilong Profet Joel
1. Taem iumi duim preaching waka, hao nao iumi showimaot iumi hambol olsem Joel?
1 Hu nao profet Joel? Samting wea Bible talem abaotem Joel nomoa, hem sei Joel hem “son bilong Pethuel.” (Joel 1:1) Profet Joel showimaot hem hambol taem hem mekhae long message bilong Jehovah and no mekhae long hemseleva. Taem iumi duim preaching waka iumi no mekhae long iumiseleva, bat olsem Joel, iumi mekhae long Jehovah and toktok bilong hem long Bible. (1 Cor. 9:16; 2 Cor. 3:5) Message wea iumi talemaot hem strongim iumi tu. Hao nao profesi bilong Joel savve strongim and givim iumi hope distaem?
2. Wanem nao iumi shud duim from iumi luksavve day bilong Jehovah hem klosap?
2 “Day Bilong Jehovah Hem Klosap.” (Joel 1:15): Nomata Joel raetem olketa toktok hia plande thousand year go finis, iumi stap long taem wea olketa profesi hia bae kamap tru. Olketa nogud samting wea happen long world and wei wea pipol no interest and tok spoelem waka bilong iumi pruvim iumi stap long olketa last day. (2 Tim. 3:1-5; 2 Pet. 3:3, 4) From iumi luksavve end hem klosap, iumi laek for busy long ministry winim enitaem bifor.—2 Pet. 3:11, 12.
3. From datfala big trabol hem klosap, why nao hem important for duim preaching waka?
3 “Jehovah Bae Sef Ples for Pipol Bilong Hem.” (Joel 3:16): Long disfala verse Joel storyim tu wei wea heven and earth bae barava seksek. Disfala profesi fitim nomoa taem wea Jehovah bae judgem pipol long datfala big trabol. Iumi hapi for savve Jehovah bae sevem pipol bilong hem long datfala taem. (Rev. 7:9, 14) Taem iumi duim preaching waka and luksavve Jehovah helpem iumi, datwan strongim faith bilong iumi and hem bae helpem iumi for no givap long datfala big trabol.
4. Why nao iumi shud hapi and no fraet long samting wea bae happen long future?
4 Samfala pipol sei profesi wea Joel talemaot mekem man no garem hope. Bat datfala profesi hem givim hope long pipol bilong God bikos olketa savve Jehovah bae sevem olketa. (Joel 2:32) So iumi no fraet and gohed strong for talemaot gud nius abaotem Kingdom bilong God bikos olsem Joel 2:23 talem, ‘iumi hapi long God bilong iumi, Jehovah.’