Wanem Nao Bae Iu Duim Long Taem Bilong Olketa Holiday?

Long taem bilong olketa pablik holiday and olketa holiday bilong religion, hem gudfala taem for duim preaching waka bikos staka pipol savve stap long haos from olketa no waka. Kongregeson savve mekem spesol arrangement for preaching long taem bilong olketa holiday. Hem gud for changem taem for meeting for field service sapos staka pipol long territory bae sleep leit. Long Service Meeting, olketa savve announcem eni spesol arrangement and encouragem evriwan for duim preaching waka long datfala day. Hem tru, long taem bilong holiday hem chance for iumi rest or duim eni nara samting wea iumi need for duim. Bat hem gud for markem lelebet taem long datfala day for duim preaching waka. Then bae iu barava hapi and satisfae from iu duim waka bilong God.—Matt. 11:29, 30.