Followim Example Bilong Profet Micah
1. Wanem nao maet Micah tingting abaotem and wanem nao showimaot Micah no preach nating nomoa?
1 ‘Wanem taem nao God bae finisim disfala nogud world?’ Maet Profet Micah tu tingim sapos judgment message bilong Jehovah wea hem talem againstim kingdom bilong Israel and Judah bae kamap tru long taem bilong hem. Bat Micah no preach nating nomoa. Long 740 B.C.E., long taem bilong hem, toktok bilong Jehovah againstim Samaria, hem kamap tru. (Mic. 1:6, 7) Then gogo Jerusalem hem distroe long 607 B.C.E. (Mic. 3:12) Hao nao iumi savve followim example bilong Micah taem iumi weitim Jehovah for finisim disfala nogud world?
2. Hao nao iumi showimaot iumi patient for weitim day bilong Jehovah, and why nao iumi duim olsem?
2 Iumi Mas Patient: Micah hem sei: “Mi bae gohed for lukaotem Jehovah. Bae mi patient for weitim God bilong mi wea bae sevem mi.” (Mic. 7:7) Taem Micah weitim God for finisim nogud world long datfala taem hem no stap nating. Hem busy for duim waka bilong Jehovah. Taem iumi weitim day bilong Jehovah for kam, iumi tu mas ‘holy and duim samting wea showimaot iumi faithful long God.’ (2 Pet. 3:11, 12) Wei wea Jehovah patient hem givim chance long pipol for repent. (2 Pet. 3:9) So iumi laek for duim wanem Bible talem and followim example bilong olketa profet for patient.—Jas. 5:10.
3. Why nao iumi mas askem Jehovah for holy spirit bilong hem?
3 Depend long Jehovah for Strongim iumi: Nomata Micah kasem hardfala assignment hem depend long Jehovah for strongim hem for duim datwan. (Mic. 3:8) Jehovah savve iumi needim hem for strongim iumi dastawe Bible sei for iumi askem hem for strongim iumi. Jehovah givim paoa long man wea taed mekem hem savve duim olketa waka bilong hem. (Ps. 84:5, 7; Isa. 40:28-31) Waswe, enitaem iu luksavve Jehovah hem strongim iu for gohed duim waka bilong hem? Waswe, iu evritaem askem Jehovah for givim holy spirit long iu for helpem iu?—Luke 11:13.
4. Hao nao Micah showimaot gudfala example for iumi distaem?
4 Wei for duim wanem God laekem nao hem barava important samting long laef bilong Micah. Hem gohed faithful nomata pipol wea stap raonem hem duim olketa barava nogud samting. Evriday iumi tu kasem olketa samting wea savve testim faith bilong iumi. So iumi mas disaed strong for duim samting wea showimaot iumi laek gohed faithful long God bilong iumi Jehovah for olowe.—Mic. 4:5.