Helpem Pablisa wea Iu Waka Witim Long Ministry
1. Taem iumi waka witim nara pablisa long ministry, hao nao iumi savve followim example bilong aposol Paul?
1 Taem aposol Paul stap witim olketa nara Christian, hem ting long datwan olsem chance for “strongim narawan.” (Rome 1:12) Taem iu waka witim nara pablisa long ministry, waswe, iu iusim datfala taem for encouragem and helpem hem? Winim wei for stap kwaet nomoa, hem gud for storyim samting wea helpem iu for duim gud ministry bilong iu.
2. Hao nao iumi savve helpem pablisa wea iumi waka witim long ministry for no fraet, and why nao hem important for duim olsem?
2 Helpem Nara Pablisa for No Fraet: Samfala pablisa savve fraet. Maet iu luksavve long diswan bikos long feis bilong olketa or herem long hao olketa story. For helpem olketa for no fraet, iumi savve praisem olketa. Wanem nao samfala nara samting wea iumi savve duim for helpem olketa for no fraet? Wanfala traveling overseer hem story long pablisa wea hem waka witim abaotem samting wea savve mekem hem fraet and hem sei wei for prea nao helpem hem. Nara brata storyim samting wea helpem hem for no fraet. Hem sei: “Mi savve smile long haosholder. Nomata datwan hem smol samting nomoa, samfala taem mi mas prea mekem Jehovah helpem mi for duim olsem.” Wanem nao mekem iu no fraet for duim ministry? Storyim datwan long pablisa wea iu waka witim long ministry.
3. Wanem nao iumi savve storyim long pablisa wea iumi waka witim wea maet helpem hem for duim gud ministry bilong hem?
3 Storyim Wanem Iu Duim: Waswe, iu faendem eni gud wei for startim story, olsem for askem wanfala kwestin abaotem samting wea happen long ples bilong iu, or for just talem samting abaotem datwan? Waswe, iu kasem gud samting taem iu changem lelebet wanfala idea wea kam from Kingdom Ministry Bilong Iumi? Iu savve storyim olketa samting olsem long pablisa wea iu waka witim. (Prov. 27:17) Taem iutufala gogo for duim return visit, iu savve storyim wanem iu plan for duim long datfala return visit. Bihaen long wanfala Bible study, iu savve storyim why iu chusim wanfala point, scripture, or hao iu iusim wanfala wei for teach. Maet iu storyim hao iu duim olsem bikos datwan hem fitim need bilong datfala student.
4. Why nao iumi laek for helpem olketa nara Christian taem iumi duim ministry?
4 Olketa Christian long first century laek for helpem pipol wea no biliv, bat olketa luksavve tu olketa nara Christian savve kasem gud samting from wei for encouragem and strongim narawan. (Acts 11:23; 15:32) Aposol Paul trainim Timothy and then encouragem hem for storyim samting wea hem lanem long olketa narawan. (2 Tim. 2:2) Sapos iumi encouragem and helpem olketa nara Christian long ministry, olketa bae hapi and duim gud ministry bilong olketa and Dadi bilong iumi long heven tu bae hapi long datwan.—Heb. 13:15, 16.