Niu Video for Startim Bible Study
Wanfala short video stap long jw.org Web site wea garem title, Why Nao Hem Gud for Studyim Bible? Staka pipol lukim diswan finis. Disfala video hem for mekem pipol interest for studyim Bible witim iumi. Iu savve faendem diswan long botom bilong hom page long Web site. Click long “Ask for Wanfala Free Bible Study,” or scanim QR (quick response) code long bihaen page bilong olketa niu tract bilong iumi. Tingim samfala taem wea iumi savve iusim disfala video.
Taem iu duim return visit, iu savve sei long haosholder: “Waswe, hem olraet for mi showim iu wanfala short video wea explainim hao iu savve kasem ansa for olketa kwestin bilong iu abaotem Bible?” Sapos hem agree, showim hem datfala video long mobile bilong iu or long mobile or computer bilong hem.
Sapos iumi offerim wanfala long olketa niu tract taem iumi duim street or pablik witnessing, showim datfala QR code and encouragem man for scanim datwan long mobile bilong hem. Datfala QR code bae connect stret go long ples wea video hia stap long Web site, so maet iu savve showim hem datfala video long mobile bilong iu.
Storyim video hia long olketa skulfren, wakfren, or olketa relative, and showim long olketa. Or iu savve emailim olketa link for disfala video and encouragem olketa for lukluk long hem seleva.
Sapos iumi lukaotem chance for iusim disfala niu samting, maet iumi savve startim samfala niu Bible study, and helpem olketa “wea showimaot olketa laekem laef olowe.”—Acts 13:48.