Givimaot Olketa Invitation

1. Wanem taem nao bae iumi start for invaetem pipol for kam long convention?

¹ Sapos iu plan for olketa long famili and olketa fren for iufala kaikai tugeta and iu bae spendem staka taem and selen for redyim datwan, taem iu invaetem olketa bae iu storyim olketa gud samting wea bae mekem olketa laek for kam. Long sem wei tu, olketa brata duim bigfala waka for redyim spiritual kaikai wea iumi bae enjoyim long convention. Jehovah givim iumi privilege for invaetem pipol for kam long convention thrifala week bifor hem start. Wanem nao bae helpem iumi for barava laek for invaetem pipol for kam long convention?

2. Wanem nao bae mekem iumi laek busy for givimaot olketa invitation?

² Sapos iumi ting abaotem hao olketa nambawan instruction wea kam from Jehovah long olketa convention barava helpem iumi, iumi bae laek busy for givimaot olketa invitation. (Isa. 65:13, 14) Hem gud for tingim tu hao samfala wea iumi invaetem bae olketa kam. (Lukim box “Pipol Bae Kam.”) Nomata samfala nomoa bae kam, wei wea iumi waka hard for givimaot olketa invitation hem mekhae long Jehovah and datwan showimaot hem kaen tumas bikos hem invaetem evriwan.—Ps. 145:3, 7; Rev. 22:17.

3. Wanem nao olketa elder bae disaedem saed long waka for givimaot olketa invitation?

³ Olketa elder long each kongregeson nao bae disaedem wanem for duim mekem staka pipol long territory bae kasem invitation. Olketa bae disaedem sapos olketa pablisa bae leavim invitation long haos bilong pipol wea no stap long datfala taem, and sapos kongregeson bae givimaot olketa invitation taem olketa duim pablik witnessing. Long olketa weekend iumi bae givimaot invitation and sapos hem fitim iumi savve givimaot olketa magasin tu. Long taem bilong convention bae iumi hapi tumas bikos iumi duim datfala waka and staka pipol hipap witim iumi for enjoyim spiritual kaikai wea kam from Jehovah!

Pipol Bae Kam

Tu-thri year go finis, wanfala sista wea duim campaign for invaetem pipol hem tingse maet hem hard waka nating nomoa. Hem laek for savve sapos pipol wea olketa invaetem bae kam long convention. Long Saturday morning bilong convention, hem lukim wanfala man long India wea sidaon long there, so hem go story long hem. Datfala man sei hem kam long convention bikos hem kasem wanfala invitation. Hem askem datfala sista samfala kwestin and sista hia ansarem olketa kwestin hia. Hem sei hem barava enjoyim program and hem tinghae long lukluk and gudfala wei bilong olketa wea kam long convention. Long datfala sem day, datfala sista story witim wanfala hasband and waef. Tufala tu kasem invitation and kam long convention. Tufala enjoyim program and tufala sei bae tufala kam long Sunday tu. Olketa samting hia helpem datfala sista for luksavve hem important for givimaot olketa invitation evri year.
Long wanfala convention, wanfala hasband and waef wea regular pioneer story witim nara hasband and waef wea samting olsem 50 or 60 year. Tufala sei hem firstaem bilong tufala for kam long convention. Brata and sista hia askem tufala: “Hu nao invaetem iutufala?” Tufala sei: “Wanfala taem, mitufala kam bak long haos and mitufala lukim wanfala invitation pepa andanit long door.” Tufala readim datwan and sendem tu datfala coupon wea stap long invitation pepa. Samfala brata and sista sharem lunch bilong olketa witim tufala. Tufala barava enjoyim program and tufala sei bae tufala kam bak long next day. Olketa brata arrange for samwan go story moa witim olketa bihaen datfala convention.