Helpem Olketa wea Blind for Lane Abaotem Jehovah
1. Wanem nao Jesus duim wea showimaot hem tingim olketa wea blind?
1 Jesus savve hem klosap for hem dae. Taem hem lusim Jericho, tufala blind man singaot long hem: “Lord, plis iu showimaot mercy long mitufala!” Nomata Jesus maet warim hard taem wea bae kasem hem, hem talem tufala hia for kam long hem, and hem healim tufala. (Matt. 20:29-34) Hao nao iumi savve followim example bilong Jesus long wei for tingim olketa wea blind?
2. Hao nao iumi savve preach long wanfala blind man wea maet iumi lukim hem wakabaot long road?
2 Mas Kaen: Sapos iu lukim wanfala blind man wea wakabaot long road, sei hello long hem and askem hem sapos hem laekem iu for leadim hem long ples wea hem laek for go. Maet firstaem hem no barava trustim iu bikos staka pipol no savve kaen long man olsem. Bat wei wea iu showimaot iu laek for helpem hem and from iu kaen long hem, datwan maet mekem hem for no fraet. Hem gud for trae for luksavve sapos hem blind or hem savve lukluk lelebet, bikos sapos hem savve lukluk lelebet maet hem no needim staka help. Bihaen iu helpem hem, maet iu savve talem hem iu wanfala Jehovah’s Witness and iu teachim Bible long pipol. Then iu savve readim wanfala scripture long hem, olsem Psalm 146:8 or Isaiah 35:5, 6. Sapos hem savve hao for readim Braille, askem hem sapos hem laekem iu for tekem kam wanfala pablikeson long Braille mekem hem savve lanem moa abaotem Bible. Iu savve helpem hem tu for go long jw.org for daonlodim olketa pablikeson wea hem savve lisin long olketa. Samfala blind pipol garem computer wea garem program for readim olketa buk. So iu savve talem hem abaotem olketa buk bilong iumi long jw.org. wea hem savve daonlodim long RTF (Rich Text Format).—Lukim datfala box “Hao for Helpem Man wea Blind.”
3. Wanem nao iumi savve duim for faendem olketa wea blind long territory bilong iumi?
3 Lukaotem Olketa wea Blind: Maet iumi no meetim olketa wea blind taem iumi preach long haos tu haos bikos olketa savve fraet sapos olketa no savve long man wea kam long haos. Dastawe iumi mas waka hard for “lukaotem” olketa mekem iumi savve preach long olketa. (Matt. 10:11) Waswe, iu garem wanfala skulfren or wakfren wea hem blind? Trae for preach long hem. Sapos wanfala skul for olketa wea blind stap long territory bilong iu, iu savve askem olketa sapos olketa bae laekem olketa pablikeson bilong iumi long Braille for putim long library bilong olketa. Waswe, iu savve long eniwan wea garem famili member wea hem blind? Waswe, eni organization stap long territory bilong iu wea helpem olketa wea blind or provaedem ples for olketa stap? Hem gud for go lukim boss bilong datfala organization and talem olketa iumi Olketa Jehovah’s Witness laek for helpem olketa wea blind, and talem hem iu savve tekem kam olketa buk long Braille or audio recording for olketa wea blind. Showim hem wanem Bible sei abaotem taem wea God bae healim olketa wea blind and no eniwan bae blind moa. Iu savve showim hem tu datfala video long jw.org wea garem title “Without It, I Would Feel Lost” long English. Datfala video storyim wanfala blind man wea garem Bible long Braille and hao datwan barava helpem hem. Wei for storyim olketa samting hia maet mekem iu garem chance for meetim olketa wea blind.
4. Wanem nao iumi lanem from experience bilong Janet?
4 Wanfala blind sista wea nem bilong hem Janet go for lukim olketa blind pipol long ples wea olketa stap. Hem story witim wanfala young woman and hem talem hem, “Jesus healim pipol wea blind for showimaot wanem hem bae duim long future for evriwan wea blind.” Tufala readim tugeta Revelation 21:3, 4, and Janet explainim hao Kingdom bilong God bae mekem datfala promis for kamap tru. Datfala woman hem kwaet for lelebet taem and then hem sei: “Iu nao firstfala blind man wea storyim kaen samting olsem. Staka pipol sei olketa man kamap blind bikos long samting wea olketa duim or bikos long samting wea olketa laen dadi bilong olketa duim.” Janet emailim datfala woman abaotem hao for kasem datfala Wanem Bible Teachim buk long internet and bihaen datwan tufala markem tufala taem evri week for studyim Bible.
5. Nomata iumi no savve healim pipol wea blind olsem Jesus duim, wanem nao iumi savve duim for helpem olketa wea blind?
5 Hem tru, iumi no savve healim pipol wea blind olsem Jesus duim, bat iumi savve helpem olketa wea god bilong disfala world blindim mind bilong olketa, nomata olketa wea really blind tu, for savve long tru samting abaotem God. (2 Cor. 4:4) Jesus hem healim tufala blind man wea stap klosap long Jericho from hem “barava sorre” long tufala. (Matt. 20:34) Wei for followim example bilong Jesus bae mekem iumi laek for helpem olketa wea blind for lane abaotem Jehovah, datfala God wea bae healim olketa wea blind.