Olketa Tul Bilong Iumi for Teach
1. Long wanem wei nao olketa Christian olsem man wea iusim olketa tul for wakem samting?
1 Man wea wakem samting savve iusim staka difren kaen tul long waka bilong hem. Samfala tul hem no iusim tumas, bat samfala tul hem olketa main tul wea hem iusim evritaem long waka bilong hem. Hem savve tumas hao for iusim olketa tul hia. Bible encouragem evri Christian for waka hard long ministry and kamap “wakaman wea no shame long waka bilong hem.” (2 Tim. 2:15) Wanem nao main important tul wea iumi iusim long ministry? Bible nao hem main tul wea iumi iusim for “teachim pipol for kamap disaepol.” (Matt. 28:19, 20) So iumi shud traem best for kamap gud long wei for “iusim long stretfala wei datfala toktok bilong God wea tru.” Bat iumi garem samfala nara tul wea iumi savve iusim evritaem long ministry, and iumi shud lane for iusim gud olketa tul hia for teachim truth long pipol.—Prov. 22:29.
2. Wanem nao olketa main tul bilong iumi for teach?
2 Olketa Main Tul Bilong Iumi for Teach: Wanem nao olketa nara tul wea iumi savve iusim? Wanfala main tul wea iumi iusim for teachim pipol nao hem Wanem Nao Really Samting wea Bible Teachim? Bihaen datwan, iumi iusim buk “Gohed Kasem Gud Samting From Love Bilong God” for helpem Bible study savve hao for followim Bible principle long laef bilong hem. So iumi shud savve gud hao for iusim tufala buk hia for helpem pipol. Samfala brochure stap tu wea iumi shud iusim evritaem long ministry. Disfala brochure Gud Nius From God! hem wanfala main tul wea helpem iumi for startim olketa Bible study. Sapos samfala pipol long territory no savve read gud or samfala iusim languis wea iumi no garem pablikeson long datfala languis, then iumi savve iusim tu Followim Toktok Bilong God or Followim Toktok Bilong God Mekem Iu Laef Olowe. Wanfala main tul for encouragem Bible study for kam long olketa meeting hem Hu Nao Duim Wanem Jehovah Laekem Distaem? Iumi savve showim tu olketa video, olsem Why Nao Hem Gud for Studyim Bible?, Wanem Nao Mifala Duim Long Kingdom Hall? and Does God Have a Name?
3. Wanem nao olketa Kingdom Ministry bihaen bae helpem iumi for duim?
3 Olketa Kingdom Ministry bihaen bae helpem iumi for savve gud long hao for iusim olketa main tul wea iumi iusim for teachim pipol. Taem iumi traem best for iusim gud olketa tul hia, iumi followim disfala kaonsel: “Lukluk gud evritaem long iuseleva and long samting wea iu teachim. Gohed strong for duim olketa samting hia bikos wei for duim olsem bae mekem iu and olketa wea lisin long iu for kasem laef.”—1 Tim. 4:16.