Followim Example Bilong Profet Habakkuk
1. Why nao maet iumi garem sem tingting olsem Habakkuk?
1 Taem iumi lukim staka nogud samting happen long world, maet iumi garem sem tingting olsem Habakkuk, wea sei long Jehovah: “Why nao iu mekem mi for lukim olketa nogud samting wea pipol duim? And why nao iu no duim eni samting taem pipol spoelem olketa narawan?” (Hab. 1:3; 2 Tim. 3:1, 13) Sapos iumi ting raonem message wea Habakkuk talem and gudfala example wea hem showimaot, datwan bae helpem iumi for gohed faithful taem iumi weitim day bilong Jehovah.—2 Pet. 3:7.
2. Wanem nao bae showimaot iumi garem faith?
2 Mas Garem Faith: Nomata Habakkuk lukim staka nogud samting wea happen, hem no wikdaon, bat hem gohed for lukaot and busy for duim waka bilong Jehovah. (Hab. 2:1) Jehovah talem Habakkuk olketa promis bilong Hem bae kamap tru long taem wea God markem and “man wea raeteous bae gohed for laef bikos hem garem faith.” (Hab. 2:2-4) Wanem nao iumi lanem from datwan? Hem no important for savve long taem wea end bae kam. Bat samting wea important nao hem for garem faith hao end bae kam. From iumi garem faith, iumi bae gohed lukaot and busy long preaching waka.—Heb. 10:38, 39.
3. Why nao iumi mas gohed hapi for worshipim Jehovah?
3 Hapi for Worshipim Jehovah: Taem Gog from Magog attakim pipol bilong Jehovah, iumi bae kasem test. (Ezek. 38:2, 10-12) Long taem bilong war, staka pipol safa, nomata olketa wea winim war tu. Maet iumi no garem inaf kaikai, maet iumi lusim samfala samting wea iumi garem, and maet living hem no isi. Wanem nao bae iumi duim taem kaen samting olsem kasem iumi? Habakkuk savve hem bae kasem hard taem, so hem disaed for gohed hapi for worshipim Jehovah. (Hab. 3:16-19) Datwan bae helpem iumi tu for no givap nomata iumi kasem hard taem.—Neh. 8:10; Heb. 12:2.
4. Wanem nao iumi hapi for duim distaem and long future?
4 Olketa wea no dae long Armageddon bae gohed for lane abaotem wanem God laekem. (Hab. 2:14) Olketa wea laef bak tu bae lane abaotem Jehovah. Distaem iumi laek for iusim evri chance for story abaotem Jehovah and olketa nambawan samting wea hem duim!—Ps. 34:1; 71:17.