LAEF BILONG CHRISTIAN
For Man Kamap Disaepol Iumi Mas Preach and Teachim Hem
Jesus talem olketa wea followim hem for go and teachim pipol for kamap disaepol. (Mt 28:19) Diswan minim iumi mas preach long pipol and teachim olketa. Hem gud for iumi ting raonem kwestin hia: ‘Hao nao mi savve kamap gud long disfala important waka for preach and teachim pipol for kamap disaepol?’
PREACH
Iumi no weit nomoa for olketa wea interest for kam long iumi, iumi nao mas lukaotem olketa wea interest. (Mt 10:11) Taem iumi go preaching, waswe, iumi trae for story witim evriwan wea iumi meetim? (Ac 17:17) Olsem example, aposol Paul lukaotem chance for story long pipol, and from datwan Lydia kamap disaepol.—Ac 16:13-15.
“Yu mas plantem kaikai long gaden long moning, an waka long gaden ivining tu” (Eklesiastes 11:6)
LUKIM VIDEO GOHED FOR PREACH AND NO GIVAP—ENITAEM WITNESSING AND HAOS TU HAOS. BIHAEN, ANSAREM OLKETA KWESTIN HIA:
Hao nao Samuel showimaot hem barava laek helpem pipol for lanem truth?
Why nao iumi mas no givap for preach long pipol?
Hu nao samfala pipol wea iu meetim evriday wea iu savve preach long olketa abaotem Kingdom?
TEACHIM PIPOL
For helpem pipol kamap disaepol, iumi mas duim moa samting winim wei for givim olketa pablikeson nomoa long pipol. For helpem olketa fren witim God, iumi mas duim olketa return visit and studyim Bible witim olketa. (1Co 3:6-9) Bat, hao sapos iumi waka hard for teachim truth long student bat hem no gohed long spiritual wei? (Mt 13:19-22) Iumi bae gohed for lukaotem olketa wea heart bilong olketa olsem “gudfala graon.”—Mt 13:23; Ac 13:48.
“Mi plantim seed, Apollos hem watarem, bat God nao mekem hem for grow” (1 Co 3:6)
LUKIM VIDEO GOHED FOR PREACH AND NO GIVAP—PABLIK WITNESSING AND TEACHIM PIPOL FOR KAMAP DISAEPOL. BIHAEN, ANSAREM OLKETA KWESTIN HIA:
Hao nao Solomon and Mary helpem Ezekiel and Abigail for savve long truth?
Wanem nao shud goal bilong iumi taem iumi duim ministry, and pablik witnessing?
Hao nao iumi savve iusim gud taem bilong iumi for teachim truth long pipol?