Kamap Gud Long Ministry​—Hao for Raetem Gudfala Leta

WHY HEM IMPORTANT: Buk bilong 1 Corinth hem wanfala long 14-fala leta wea aposol Paul raetem for encouragem olketa Christian brata and sista bilong hem. Taem iu raetem leta iu garem taem for tingting gud abaotem wanem for storyim. And tu, man wea kasem wanfala leta savve readim datwan staka taem. Wanfala gud wei for preach long olketa relative and fren bilong iumi hem for raetem leta long olketa. And iumi savve raetem leta for preach long olketa wea iumi no savve meetim long haos. Olsem example, waswe sapos iu laek duim return visit long samwan wea interest bat iu no savve faendem hem long haos? Or, waswe sapos hem hard for iumi preach long samfala pipol bikos olketa stap farawe or stap long haos wea garem security? Iumi savve raetem leta long olketa hia. Wanem nao samfala samting wea iumi mas tingim taem iumi raetem leta, especially long pipol wea iumi no savve long olketa?

HAO FOR DUIM:

• 

  Raetem long leta sem samting wea iu bae talem sapos iu meetim man. Long start bilong leta, talem samting abaotem iu, and talem reason why iu raetem datfala leta. Iu savve askem wanfala kwestin for hem ting raonem, and sei hem savve kasem ansa long website bilong iumi. Then talem hem iumi savve studyim Bible witim pipol, and talem hem title bilong samfala chapter long wanfala study pablikeson bilong iumi. Maet iu savve putim jw.org card, wanfala invitation, or wanfala tract witim datfala leta.

• Leta bilong iu shud no long tumas, nogud man wea readim bae taed for readim.—Lukim example leta

• Mek sure leta hia no garem spelling mistek, and hem isi for readim. Story kaen and showimaot respect, and mekhae long olketa gudfala samting.