Iumi Lovem Tumas Dadi blo Iumi Jehovah

1-2. Why nao Jehovah openem wei for iumi kamap part lo famili blo hem, and hao nao hem duim datwan?

JEHOVAH invaetem iumi for kamap part lo famili blo hem wea worshipim hem. Datwan hem nambawan invitation! Evriwan insaed lo datfala famili olketa dedicatem olketa seleva lo hem and showimaot faith lo ransom sakrifaes blo Son blo hem. Iumi wanfala hapi famili. Iumi enjoyim wanfala laef wea garem mining distaem, and iumi hapi lo datfala hope for laef olowe lo heven or lo Paradaes earth.

² From Jehovah lovem iumi hem mekem wei for iumi kamap part lo famili blo hem, bat for duim datwan hem mas mekem wanfala big sakrifaes. (John 3:16) Hem peim iumi lo “price wea big tumas.” (1 Cor. 6:20) Datfala ransom mekem iumi fit for garem klos wei for fren witim Jehovah. Hem wanfala privilege for iumi savve kolem datfala Ruler blo full universe, Dadi blo iumi. And tu, olsem iumi storyim lo study bifor diswan, Jehovah nao best Dadi.

3. Olketa wanem kwestin nao iumi maet askem? (Lukim tu box “Waswe, Jehovah Tingim Mi Tu?”)

³ Maet iumi askem disfala sem kwestin wea wanfala lo olketa man wea raetem Bible hem askem: “Wanem nao bae mi ofarem go long [Jehovah] fo olketa gudfala samting wea hemi bin duim fo mi?” (Sams 116:12) Ansa blo datfala kwestin nao: Hem hard tumas for iumi changem bak wanem Dadi blo iumi lo heven hem duim for iumi. Nomata olsem, love wea hem showimaot muvim iumi for lovem hem. Aposol John raet olsem: “Iumi showimaot love bikos God hem lovem iumi firstaem.” (1 John 4:19) Lo wanem wei nao iumi savve showimaot lo Dadi blo iumi lo heven dat iumi lovem hem?

FREN KLOS WITIM JEHOVAH

4. Olsem James 4:8 storyim, why nao iumi shud traem best for fren klos witim Jehovah?

⁴ Jehovah laekem iumi for fren klos witim hem and for story witim hem. (Readim James 4:8.) Hem laekem iumi for ‘gohed prea’ and hem evritaem redi for lisin lo iumi. (Rome 12:12) No enitaem hem busy or taed for herem iumi. Iumi tu savve lisin lo hem taem iumi readim Bible, and olketa pablikeson wea helpem iumi for minim gud Bible. Iumi herem Jehovah tu taem iumi lisin gud lo olketa meeting. Olsem wei for story gud tugeta savve helpem pikinini for fren klos witim parents, wei for story gud evritaem witim Jehovah savve helpem iumi for fren klos witim hem.

5. Hao nao iumi savve kamap gud lo hao iumi prea?

⁵ Ting raonem hao iumi story lo God. Hem laekem iumi for talemaot evri tingting and feeling blo iumi lo hem. (Sams 62:8) So hem gud for askem iumiseleva disfala kwestin: ‘Waswe, taem mi prea toktok blo mi hem olsem mi copyim nomoa wanfala leta wea narawan raetem, or hem olsem wanfala leta wea miseleva raetem from heart for wanfala klos fren?’ For sure, iu barava lovem Jehovah, and laek for strongim wei wea iu fren witim hem. For duim datwan, iu mas story witim hem evritaem. Storyim lo Jehovah evri samting wea hard for iu talem lo eni nara man. Storyim olketa hapi and feel nogud blo iu. Barava trustim hao iu savve askem hem for helpem iu.

6. Wat nao iumi mas duim for fren klos witim dadi blo iumi lo heven?

⁶ For fren klos witim Dadi blo iumi lo heven, iumi mas evritaem garem wei for tinghae. Iumi agree witim wanem man wea raetem psalm hem sei: “[Jehovah], yu nao God blong mifala. Yu bin duim finis plande samting fo helpem mifala. No eniwan moa hemi olsem yu. Yu bin mekem finis plande gudfala plan fo mifala falom. Mi no save talemaot olketa evriwan nao, bikos olketa barava plande tumas.” (Sams 40:5) Iumi no just tinghae nomoa, bat iumi showimaot iumi tinghae thru lo toktok and wanem iumi duim. Diswan nao mekem pipol luksavve iumi difren from staka pipol distaem. Iumi stap lo world wea pipol no tinghae lo wanem God duim for olketa. Wanfala samting wea showimaot iumi stap lo “olketa last day” hem wei wea pipol no savve sei thankiu. (2 Tim. 3:1, 2) Iumi no laek for duim olsem!

7. Wat nao Jehovah laekem iumi for duim, and why nao olsem?

⁷ Olketa parents no laekem pikinini blo olketa for raoa, bat for mas fren gud tugeta. Olsem tu, Jehovah laekem evri pikinini blo hem for fren gud tugeta. Tru nao, love wea iumi garem for each other nao showimaot iumi olketa tru Christian. (John 13:35) Iumi agree witim toktok blo man wea raetem psalm wea sei: “Hemi barava gud tumas taem olketa pipol blong God i wanmaen an stap tugeta.” (Sams 133:1) Taem iumi lovem olketa brata and sista blo iumi, iumi showimaot lo Jehovah dat iumi lovem hem. (1 John 4:20) Hem barava naes for kamap part lo wanfala famili blo olketa brata and sista wea “kaen long narawan and sorre” lo each other!—Eph. 4:32.

WEI FOR OBEY SHOWIMAOT IUMI LOVEM HEM

8. Olsem 1 John 5:3 storyim, wat nao main reason why iumi obeyim Jehovah?

⁸ Jehovah expectim pikinini for obeyim parents, and hem expectim iumi tu for obeyim hem. (Eph. 6:1) Iumi obeyim Jehovah bikos hem nao creatim iumi, givim wanem iumi needim for gohed laef, and hem wanfala Dadi wea wise winim eni dadi lo earth. Nomata olsem, main reason why iumi obeyim Jehovah hem bikos iumi lovem hem. (Readim 1 John 5:3.) Nomata staka reason stap why iumi shud obeyim Jehovah, hem no forcem iumi for duim datwan. Wanfala present wea Jehovah givim iumi hem nao wei wea iumi free for chus, so hem hapi taem iumi chus for obeyim hem bikos iumi lovem hem.

9-10. Why nao hem important for iumi savve lo olketa standard blo Jehovah and followim datwan?

⁹ Parents laekem pikinini blo olketa for sef. Dastawe olketa markem olketa rul saed lo fasin wea helpem pikinini for kasem gud samting. Taem pikinini obeyim olketa rul hia, olketa showimaot hao olketa trustim and respectim parents blo olketa. So tingim hao hem barava important go moa for iumi savve and followim olketa standard blo Dadi blo iumi lo heven. Taem iumi duim olsem, iumi showimaot lo Jehovah iumi lovem and respectim hem, and tu, iumi bae kasem gud samting. (Aesaea 48:17, 18) Bat lo narasaed, olketa wea rejectim Jehovah and olketa standard blo hem, gogo olketa spoelem olketa seleva.—Gal. 6:7, 8.

¹⁰ Taem iumi duim samting followim wanem Jehovah laekem, datwan protectim iumi from olketa nogud samting wea savve spoelem iumi lo physical wei, spiritual wei, and saed lo feeling. Jehovah savve wanem nao best samting for iumi. Aurora, wea stap lo United States, sei, “Mi savve hao taem iumi obeyim Jehovah, evritaem bae iumi garem gudfala laef.” Datwan hem tru samting. Wanem gud samting nao iu kasem from wei for obeyim olketa direction wea kam from Jehovah?

11. Hao nao prea helpem iumi?

¹¹ Nomata lo taem wea hem hard for iumi obey, prea savve helpem iumi for duim datwan. Samfala taem, iumi faendem hem hard for obeyim Jehovah bikos iumi sin, bat iumi mas evritaem traem best for obeyim hem. Man wea raetem psalm barava askem God olsem: “Plis mekem mi wiling fo obeim yu.” (Sams 51:12) Wanfala regular pioneer wea nem blo hem Denise sei, “Sapos mi faendem hem hard for mi obeyim wanfala komand blo Jehovah, mi savve askem hem for strongim mi for duim stret samting.” Iumi savve sure hao Jehovah bae evritaem ansarem olketa kaen prea olsem.—Luke 11:9-13.

HELPEM OLKETA NARAWAN FOR LOVEM DADI BLO IUMI LO HEVEN

12. Olsem Ephesus 5:1 storyim, wat nao iumi shud duim?

¹² Readim Ephesus 5:1. From iumi “olketa pikinini bilong God wea hem lovem,” iumi traem best for followim example blo hem. Iumi followim olketa wei blo hem taem iumi showimaot love, kaen, and forgivim olketa narawan. Taem olketa wea no savve lo God lukim gudfala wei blo iumi, datwan bae mekem olketa laek for lane abaotem Jehovah. (1 Pet. 2:12) Christian parents shud trae for treatim pikinini blo olketa lo sem wei wea Jehovah treatim iumi. Taem olketa duim datwan, maet pikinini blo olketa bae laek for fren gud witim Dadi blo iumi, Jehovah.

13. Wanem nao iumi need for tingim for helpem iumi no fraet?

¹³ Wanfala smol pikinini savve hapi and praod for story abaotem dadi blo hem. Olsem tu, iumi praod abaotem Dadi blo iumi lo heven, Jehovah, and iumi laekem olketa narawan for savve lo hem. Iumi garem sem kaen feeling lo heart blo iumi olsem King David, wea sei olsem: “Bae mi gohed fo preisim [Jehovah].” (Sams 34:2) Bat, hao sapos iumi hol bak? Wanem nao bae helpem iumi for no fraet? Iumi bae no fraet taem iumi tingim hao Jehovah bae hapi sapos iumi story abaotem hem, and hao olketa narawan savve kasem gud samting taem olketa lane abaotem hem. Jehovah bae givim iumi strong wea iumi needim for mekem iumi no fraet. Hem helpem olketa brata blo iumi lo first century for no fraet and hem bae helpem iumi tu.—1 Thess. 2:2.

14. Wat nao samfala reason why hem important for iumi teachim pipol for kamap disaepol?

¹⁴ Jehovah no fevarem eniwan, and hem hapi taem hem lukim iumi showimaot love lo olketa narawan nomata wea nao olketa kam from. (Acts 10:34, 35) Wanfala lo olketa best wei for showimaot iumi lovem narawan hem taem iumi talemaot gud nius lo olketa. (Matt. 28:19, 20) Wanem gud samting nao kamaot from waka hia? Olketa wea lisin bae garem gudfala laef distaem and garem hope for enjoyim laef olowe lo future.—1 Tim. 4:16.

LOVEM DADI BLO IUMI AND HAPI

15-16. Wanem nao olketa reason wea iumi garem for hapi?

¹⁵ Jehovah hem Dadi wea showimaot love, so hem laekem famili blo hem for mas hapi. (Aesaea 65:14) Nomata iumi feisim olketa hard taem, iumi garem staka reason for hapi distaem. Olsem example, iumi sure Dadi blo iumi lo heven hem lovem iumi tumas. Iumi garem stretfala savve wea kam from Bible. (Jeremaea 15:16) And tu, iumi kamap part lo wanfala spesol famili wea evriwan lovem Jehovah, lovem olketa standard blo hem, and lovem each other.—Sams 106:4, 5.

¹⁶ Iumi savve gohed hapi bikos iumi barava sure hao lo future laef bae kamap gud tumas. Iumi savve hao klosap nao Jehovah bae finisim evri nogud pipol, and anda lo rul blo Kingdom disfala earth bae kamap wanfala Paradaes moa. And tu, iumi garem nambawan hope hao olketa wea dae finis bae laef bak and bae iumi stap tugeta moa. (John 5:28, 29) Datwan hem barava hapi samting! And main important samting, iumi sure hao klosap nao evriwan lo heven and earth bae mekhae lo Dadi wea lovem iumi and givim hem praise and worship wea hem nomoa fit for kasem.