Olketa Young Wan, Gohed Markem Olketa Spiritual Goal Bihaen Iu Baptaes

1. Wat nao olketa gud samting wea staka young wan duim finis?

EVRI year staka thousand young Christian olketa baptaes. Waswe, iu baptaes finis? Sapos olsem, olketa brata and sista, and Jehovah tu, hapi lo iu! (Provebs 27:11) Tingim olketa samting wea iu duim finis. Iu maet studyim Bible for samfala year. Datfala study helpem iu for bilivim hao Bible hem kam from God. And tu, datwan helpem iu for savve and lovem Jehovah wea givim kam Bible. Love blo iu for Jehovah hem kamap strong, and datwan mekem iu for dedicate and baptaes distaem. Iu mekem wanfala gud disison!

2. Wanem nao bae iumi storyim lo disfala article?

² Bifor iu baptaes, maet iu feisim samfala hard taem wea mekem iu laek stop for studyim Bible. Bat from iu baptaes distaem, bae iu feisim samfala niu challenge. Satan bae trae for stopem iu for lovem and worshipim Jehovah. (Eph. 4:14) Iu mas no letem datwan for happen. Wat nao bae helpem iu for gohed faithful lo Jehovah, and for keepim promis blo iu for worshipim hem? Iu mas gohed “waka hard” for kamap mature Christian. (Heb. 6:1) Bat wanem nao savve helpem iu for duim datwan? Distaem bae iumi storyim datwan.

WAT NAO IU SAVVE DUIM FOR KAMAP MATURE CHRISTIAN?

3. Wat nao evri Christian need for duim bihaen olketa baptaes?

³ Bihaen iumi baptaes, iumi evriwan need for followim advaes wea aposol Paul givim lo olketa Christian lo Ephesus. Hem encouragem olketa for kamap olketa “mature” Christian. (Eph. 4:13) Datwan hem minim olketa need for gohed markem olketa spiritual goal. Paul comparem hao iumi savve kamap mature Christian witim hao wanfala pikinini hem grow. Parents blo wanfala baby barava lovem and hapi lo hem. Bat hard for hem baby for olowe. Gogo, hem bae lusim “olketa wei bilong pikinini.” (1 Cor. 13:11) Hem semsem tu for olketa Christian. Bihaen iumi baptaes, iumi need for kamap mature Christian. Bae iumi storyim samfala idea wea bae helpem iumi for duim datwan.

4. Wat nao savve helpem iu for kamap mature Christian? Explainim. (Philippi 1:9)

⁴ Strongim love blo iu for Jehovah. Iu lovem Jehovah finis, bat iu savve strongim datfala love. Hao nao olsem? Aposol Paul storyim wanfala wei wea iu savve duim datwan lo Philippi 1:9. (Readim.) Paul prea for love blo olketa Christian lo Philippi for “gohed kamap big.” So datwan showimaot iu savve strongim go moa love blo iu for Jehovah. Iu savve duim datwan taem iu kasem “stretfala savve and gudfala tingting.” Taem iu savve gud lo Jehovah bae iu barava lovem hem, tinghae lo olketa wei blo hem, and hao hem duim olketa samting. From iu lovem hem, bae iu laek for mekem hem hapi and no laek duim eni samting wea bae mekem hem no hapi. And tu, bae iu laek for waka hard for savve lo wanem hem laekem iu for duim and hao for duim datwan.

5-6. Wat nao savve helpem iu for strongim love blo iu for Jehovah? Explainim.

⁵ Jesus barava followim olketa wei blo Dadi blo hem, Jehovah. So taem iu savve gud lo Jesus, bae iu barava lovem Jehovah. (Heb. 1:3) Best wei for savve gud lo Jesus hem for studyim fofala Gospel. Sapos hem no wei blo iu for readim Bible evriday, iu savve start distaem. Taem iu read abaotem Jesus, ting raonem olketa wei blo hem. Pipol feel free for kam story lo hem. Olsem example, olketa pikinini hapi for kam lo hem. (Mark 10:13-16) Olketa disaepol no fraet lo Jesus. Olketa feel free for talemaot tingting blo olketa lo hem. (Matt. 16:22) Jesus barava showimaot wei blo Dadi blo hem, bikos Jehovah tu laekem pipol for story lo hem. Iu savve prea and storyim tingting and feeling blo iu lo hem. Iu sure hem bae no judgem iu. Hem lovem iu and kea for iu.​—1 Pet. 5:7.

⁶ Jesus feel sorre for pipol. Aposol Matthew sei: “Taem hem lukim olketa pipol hem barava sorre tumas long olketa, bikos olketa garekil and stap olobaot olsem olketa sheepsheep wea no garem eni man for lukaftarem olketa.” (Matt. 9:36) Hao nao Jehovah ting lo pipol? Jesus sei: “Dadi bilong mi long heven bae no laekem eniwan long olketa disaepol hia for lus.” (Matt. 18:14) Datwan barava encouragem iumi! Taem iu savve gud lo Jesus, bae iu barava lovem Jehovah.

7. Taem iu associate witim olketa mature brata and sista, hao nao datwan savve helpem iu?

⁷ Nara samting, taem iu associate witim olketa mature brata and sista lo kongregeson, bae iu barava lovem olketa. Bae iu lukim hao olketa brata and sista hia barava hapi, and olketa nating regretim disison blo olketa for worshipim Jehovah. Iu savve askem olketa for storyim samfala experience blo olketa. Taem iu garem wanfala important disison for mekem, askem olketa for advaes. Tingim hao “plande advaes” bae mekem iu win.​—Provebs 11:14.

8. Wat nao iu savve duim if iu daotem samfala samting wea iu lanem lo Bible?

⁸ Winim olketa daot wea iu garem. Olsem iumi storyim lo paragraf 2, Satan bae trae for mekem faith blo iu wik for iu no fren gud witim Jehovah. Wanfala wei hem maet duim datwan, hem bae trae mekem iu daotem samfala samting wea iu lanem lo Bible. For example, maet samfala pipol bae trae for mekem iu bilivim evolution and no bilivim hao God nao creatim iumi. Maet taem iu smol iu nating ting abaotem evolution, bat distaem maet iu lanem datwan lo skul. Maet hao teacher pruvim evolution hem start for mek sense lo iu. Bat hem gud for tingim tu hao maet no enitaem teacher hia tingting abaotem if wanfala Creator stap. Tingim disfala principle lo Provebs 18:17: “Man talem kam toktok fastaem, bae olketa tingse hem toktru go kasem taem nara man hem kam askem olketa kuestin.” So winim for just acceptim nomoa evriting iu lanem lo skul, hem gud for studyim wanem Bible teachim. Duim research lo olketa pablikeson blo iumi. Story witim eni brata or sista wea biliv lo evolution bifor hem kam lo truth. Askem hem wat nao mekem hem bilivim hao wanfala Creator wea lovem iumi hem stap. Diswan bae helpem iu for faendem olketa pruv wea showim hao wanfala Creator hem stap.

9. Wat nao iu lanem from experience blo Melissa?

⁹ Wanfala sista wea nem blo hem Melissa duim research abaotem creation, and datwan helpem hem for winim olketa daot wea hem garem.b Hem sei: “Lo skul, hao olketa teacher explainim evolution hem mekem mi tingse maet hem tru. Firstaem, mi no laek mek sure lo wanem mi bilivim, nogud mi faendaot wanem mi bilivim hem no stret. Bat mi luksavve hao Jehovah laekem iumi for mek sure lo wanem iumi bilivim. So mi start for duim research. Mi readim buk Is There a Creator Who Cares About You? and tufala brochure Was Life Created? and The Origin of Life​—Five Questions Worth Asking. Datwan barava helpem mi, and mi wish nomoa mi duim research firstaem.”

10-11. Wat nao savve helpem iu sapos iu kasem pressure for duim sex? (1 Thessalonica 4:3, 4)

¹⁰ Rejectim wei for durong. Taem iu kamap teenager maet iu start for laek for frenim narawan, and samfala taem maet iu kasem pressure for duim sex. Satan laekem iu for followim feeling blo iu. Wat nao savve helpem iu for no duim datwan? (Readim 1 Thessalonica 4:3, 4.) Hem gud for iu prea and storyim feeling blo iu lo Jehovah, and askem hem for strongim iu. (Matt. 6:13) Tingim hao Jehovah laek for helpem iu and hem bae no judgem iu. (Sams 103:13, 14) Bible savve helpem iu tu. Melissa wea iumi storyim finis, hem wari bikos hem savve tingting abaotem sex. Hem sei: “From mi readim Bible evriday datwan helpem mi for faet againstim datfala tingting. Datwan remindim mi hao mi dedicate finis lo Jehovah, and mi needim hem.”​—Sams 119:9.

¹¹ Hem gud for story witim parents blo iu abaotem eni problem wea iu garem and no trae for deal witim datwan seleva. Hem tru, hem no isi for story abaotem sex witim parents, bat hem important for duim datwan. Melissa sei: “Mi prea lo Jehovah for helpem mi for no fraet and then mi story witim dadi blo mi abaotem problem wea mi garem. Mi hapi mi story witim dadi blo mi, and mi savve Jehovah hem hapi lo mi tu.”

12. Wat nao savve helpem iu for mekem olketa gudfala disison?

¹² Followim olketa Bible principle. Gogo, iu bae disaedem samfala samting seleva. Bat iu no garem staka experience yet lo laef. Wat nao savve helpem iu for no duim eni mistek wea bae spoelem wei wea iu fren witim Jehovah? (Provebs 22:3) Kari, wanfala sista, hem storyim wanem hem helpem hem for mekem olketa gudfala disison. Hem luksavve wanfala mature Christian no needim olketa rul for evri samting wea hem duim. Hem sei: “Mi need for luksavve lo olketa Bible principle and no followim olketa rul nomoa.” Taem iu readim Bible, tingim: ‘Wat nao diswan teachim mi abaotem tingting blo Jehovah? Waswe, hem garem olketa principle wea savve helpem mi for duim wanem hem stret? Sapos olsem, wanem gud samting nao bae mi kasem sapos mi followim?’ (Sams 19:7; Aesaea 48:17, 18) Taem iu readim Bible and ting raonem olketa principle, datwan bae helpem iu for mekem olketa gudfala disison wea Jehovah hapi lo hem. Taem iu duim datwan, iu bae luksavve iu no needim olketa rul for evri samting wea iu duim bikos iu savve lo tingting blo Jehovah abaotem olketa samting.

13. Hao nao olketa gudfala fren savve helpem iu? (Provebs 13:20)

¹³ Chusim olketa fren wea lovem Jehovah. Olsem iumi storyim finis, olketa fren wea iu chusim savve helpem iu for kamap mature Christian. (Readim Provebs 13:20.) Sarah, wanfala young sista, start for no enjoyim olketa meeting and preaching, then samting happen wea helpem hem. Sarah sei: “Mi faendem olketa gudfala fren wea helpem mi lo taem wea mi barava needim. Mi and wanfala young sista savve preparem tugeta Wastaoa study evri week. Nara fren helpem mi for start koment lo olketa meeting. From olketa fren blo mi helpem mi, mi duim personal study and prea evritaem. Datwan helpem mi for fren gud witim Jehovah and for hapi moa.”

14. Hao nao Julien chusim olketa gudfala fren?

¹⁴ Hao nao iu savve chusim olketa fren wea bae helpem iu? Julien, wea hem elder distaem sei: “Taem mi young, preaching waka helpem mi for garem olketa gudfala fren. Olketa fren hia strong lo ministry and olketa helpem mi for enjoyim datwan. So mi markem goal for duim full-taem ministry. And mi luksavve tu from mi laek fren nomoa witim olketa wea mifala sem age, mi bin misstim chance for garem olketa gud and interesting fren. Gogo, mi taem mi waka lo Bethel mi garem olketa gud fren lo there tu. Example blo olketa helpem mi for chusim gud olketa samting olsem olketa movie, buk, and music. Diswan helpem mi for fren gud witim Jehovah.”

15. Wanem nao Paul warnim Timothy abaotem? (2 Timothy 2:20-22)

¹⁵ Wat nao iu shud duim sapos iu luksavve samwan lo kongregeson bae spoelem wei wea iu fren witim Jehovah? Paul luksavve samfala lo kongregeson lo first century no garem spiritual tingting, so hem warnim Timothy for no associate witim olketa. (Readim 2 Timothy 2:20-22.) Hem barava spesol for fren witim Jehovah. Iu barava waka hard for fren gud witim Jehovah, so iu shud no garem olketa fren wea bae spoelem datwan.​—Sams 26:4.

HAO NAO OLKETA SPIRITUAL GOAL SAVVE HELPEM IU FOR KAMAP MATURE CHRISTIAN?

16. Wat nao samfala goal wea iu savve markem?

¹⁶ Markem olketa goal. Markem olketa goal wea bae strongim faith blo iu and helpem iu for kamap mature Christian. (Eph. 3:16) For example, maet iu disaed for kamap gud lo personal study and Bible reading. (Sams 1:2, 3) Or maet iu trae for prea evritaem and for prea from heart. Maet iu need for careful lo hapitaem wea iu chusim and hao iu iusim taem blo iu. (Eph. 5:15, 16) Taem Jehovah lukim iu waka hard for kamap mature Christian, bae hem hapi.

17. Wanem gud samting nao bae iu kasem if iu helpem olketa narawan?

¹⁷ Taem iu helpem olketa narawan, datwan bae helpem iu kamap mature Christian. Jesus sei: “Man wea givim samting hem barava hapi winim man wea kasem samting.” (Acts 20:35) Bae iu barava hapi sapos iu iusim taem and strong blo iu for helpem olketa narawan. For example, iu savve markem goal for helpem olketa olo and olketa wea sik insaed lo kongregeson. Maet iu savve go peim samting for olketa, or helpem olketa for iusim mobile or tablet blo olketa. If iu wanfala brata, markem goal for kamap ministerial servant mekem iu duim moa samting for helpem olketa brata and sista. (Phil. 2:4) Iu savve showim love lo pipol tu, taem iu sharem gud nius abaotem Kingdom witim olketa. (Matt. 9:36, 37) Sapos fitim, markem goal for duim eni samting lo full-taem service.

18. Hao nao full-taem service savve helpem iu for kamap mature Christian?

¹⁸ Taem iu duim full-taem service datwan givim iu chance for duim moa samting for Jehovah. For example, maet iu garem chance for attendim Skul for Olketa Kingdom Evangelizer. Iu maet waka lo Bethel or lo olketa construction project. Wanfala young pioneer sista wea nem blo hem Kaitlyn hem sei: “For spendem taem lo ministry witim olketa experience brata and sista hem barava helpem mi for kamap mature Christian bihaen mi baptaes. Example blo olketa helpem mi for studyim gud Bible and helpem mi saed lo teaching.”

19. Wat nao olketa blessing wea iu bae kasem taem iu gohed for markem olketa spiritual goal?

¹⁹ Taem iu gohed for markem olketa spiritual goal bae iu kasem staka blessing. Iu bae no iusim strong blo iu for duim olketa iusles samting. (1 John 2:17) Iu bae misstim olketa problem wea savve kamaot from olketa nogud disison. And bae iu garem gudfala laef and bae iu hapi. (Provebs 16:3) Gud example blo iu bae encouragem olketa brata and sista. (1 Tim. 4:12) And barava important samting, iu bae kasem peace and bae iu satisfae from iu mekem Jehovah hapi and from iu fren gud witim hem.​—Provebs 23:15, 16.