Kwestin From Reader

Bihaen Jesus born, why nao Joseph and Mary gohed stay lo Bethlehem and no go bak lo Nazareth?

Bible no talem. Bat hem storyim samfala interesting information wea maet mekem tufala disaed for stap lo Bethlehem.

Wanfala angel talem Mary hao hem bae babule and bornem wanfala pikinini. Taem wea angel hia story lo Mary, Mary and Joseph stap lo Nazareth, wea hem homtaon blo Joseph lo Galilee. (Luke 1:26-31; 2:4) Gogo, taem olketa kam bak from Egypt, olketa go bak lo Nazareth. Jesus growap lo there and olketa kolem hem man blo Nazareth. (Matt. 2:19-23) Dastawe iumi savve tingim dat Jesus, Joseph, and Mary, olketa blo Nazareth.

Wanfala relative blo Mary hem Elizabeth wea stap lo Judah. Elizabeth hem waef blo priest Zechariah and hem mami blo John Baptaesa. (Luke 1:5, 9, 13, 36) Mary visitim Elizabeth lo Judah and stay witim hem for thrifala month. Then Mary go bak lo Nazareth. (Luke 1:39, 40, 56) So Mary savve lo olketa area lo Judah.

Joseph obeyim law for go register. Dastawe Joseph travel from Nazareth go lo Bethlehem, wea hem nao “taon wea David hem born” and ples wea profesi talem Messiah bae hem born. (Luke 2:3, 4; 1 Sam. 17:15; 20:6; Mic. 5:2) Bihaen Mary bornem Jesus lo there, Joseph no ting for tekem Mary and datfala niu born baby for travel farawe for go bak lo Nazareth. Olketa stap nomoa lo Bethlehem, wea hem samting olsem naen kilometer (6 mile) from Jerusalem. Datwan mekem hem isi for tufala tekem baby hia go lo temple and for givim sakrifaes lo there.—Lev. 12:2, 6-8; Luke 2:22-24.

Angel blo God talem Mary dat son blo hem bae “king olsem dadi bilong hem David.” Maet Joseph and Mary luksavve hem important for Jesus born lo homtaon blo David. (Luke 1:32, 33; 2:11, 17) Maet tufala ting hem wise for stay firstaem lo Bethlehem and weit for herem eni direction moa from God.

Iumi no savve hao long nao tufala stap lo Bethlehem taem olketa astrologer kasem olketa. Bat iumi savve olketa stap lo wanfala haos, and son blo tufala no baby nao bat hem wanfala smol “pikinini.” (Matt. 2:11) So luk olsem, olketa no go bak lo Nazareth, bat olketa stay gogo olketa setol nao lo Bethlehem.

Herod givim komand for “killim dae olketa boy [lo Bethlehem] wea tufala year or wea no kasem tufala year yet.” (Matt. 2:16) From Jehovah givim warning abaotem datwan, Joseph and Mary ranawe go lo Egypt witim Jesus and stay lo there go kasem taem Herod dae. Gogo, Joseph tekem famili blo hem go lo Nazareth. Why nao olketa no go bak lo Bethlehem? Bikos son blo Herod, Archelaus, hem wanfala raf ruler wea stap lo Judea. And tu, Joseph obeyim warning from God. Lo Nazareth nao, hem sef for Joseph lukaftarem and teachim Jesus for worshipim God.—Matt. 2:19-22; 13:55; Luke 2:39, 52.

Luk olsem Joseph dae bifor Jesus mekem wei for samfala go lo heven. So Joseph bae resurrect lo earth. Staka bae meetim hem and savve askem hem abaotem why hem and Mary stay firstaem lo Bethlehem bihaen Jesus born.