Showimaot Iumi Appreciatim “Olketa Man Olsem Present”

1. Wat nao samfala present wea iumi kasem from Jesus?

NO ENI human being hem kaen tumas olsem Jesus. Taem Jesus lo earth, hem willing tumas for iusim paoa wea hem garem for duim olketa mirakol for helpem narawan. (Luke 9:​12-17) Best present wea Jesus givim hem laef blo hem for iumi. (John 15:13) Bihaen Jesus resurrect, hem gohed duim samting wea showimaot hem kaen tumas. Hem duim wat hem promisim taem hem askem Jehovah for givim kam holy spirit for teachim and comfortim iumi. (John 14:​16, 17; 16:13) And thru lo olketa kongregeson meeting blo iumi, Jesus gohed for helpem iumi for duim waka for mek disaepol evriwea lo earth.—Matt. 28:​18-20.

2. Hu nao “olketa man olsem present” wea Ephesus 4:​7, 8 storyim?

² Tingim tu nara present wea Jesus givim. Aposol Paul storyim hao bihaen Jesus go ap lo heven hem givim “olketa man olsem present.” (Readim Ephesus 4:​7, 8.) Paul explainim disfala present wea Jesus givim hem helpem kongregeson lo staka difren wei. (Eph. 1:​22, 23; 4:​11-13) Distaem, olketa ‘man wea olsem present’ hem olketa ministerial servant, kongregeson elder, and olketa circuit overseer.a Olketa man hia no prefect, so olketa savve mekem mistek. (Jas. 3:2) Bat Lord blo iumi Jesus Christ iusim olketa for helpem iumi, dastawe olketa olsem present wea hem givim for iumi.

3. Storyim example abaotem hao iumi savve sapotim waka blo olketa ‘man wea olsem present.’

³ Jesus markem “olketa man olsem present” for strongim kongregeson. (Eph. 4:12) Iumi evriwan savve helpem olketa for duim disfala important responsibility. Tingim disfala example: Samfala lo iumi maet waka lo wanfala Kingdom Hall construction project. Olketa narawan maet sapotim waka lo wei for provaedem kaikai, transport, or maet lo eni nara wei. Lo sem wei tu, wat iumi talem and duim savve sapotim hard waka blo olketa ministerial servant, kongregeson elder, and olketa circuit overseer. Distaem bae iumi storyim gud samting wea iumi kasem from hard waka blo olketa, and hao iumi savve showim iumi appreciatim olketa and Jesus, wea givim kam olketa “olsem present” for iumi.

OLKETA MINISTERIAL SERVANT DUIM WAKA FOR “HELPEM OLKETA NARAWAN”

4. Wat nao samfala samting wea olketa ministerial servant duim lo first century for “helpem olketa narawan”?

⁴ Lo first century, samfala brata kasem appointment for kamap ministerial servant. (1 Tim. 3:8) Luk olsem, olketa hia nao Paul storyim taem hem sei samfala savve duim waka for “helpem olketa narawan.” (1 Cor. 12:28) So luk olsem, olketa ministerial servant savve help for duim olketa important waka for lukaftarem kongregeson mekem olketa elder savve focus lo waka for teach and duim shepherding. For example, maet olketa ministerial servant savve mekem olketa copy blo olketa Scripture or maet olketa go peim olketa material wea olketa needim for mekem olketa copy hia.

5. Wat nao samfala samting wea olketa ministerial servant duim distaem for helpem kongregeson?

⁵ Tingim samfala samting wea olketa ministerial servant savve duim for helpem kongregeson. (1 Pet. 4:10) Maet olketa kasem assignment for lukaftarem accounts or territory blo kongregeson, maet olketa orderim literature and givimaot lo olketa pablisa, olketa savve waka lo audio and video equipment, duim waka olsem attendant, or help for lukaftarem Kingdom Hall. Evri samting hia hem important for helpem kongregeson organize gud. (1 Cor. 14:40) And tu, samfala ministerial servant garem olketa part lo Laef and Ministry Meeting and givim pablik tok. Maet olketa markem wanfala ministerial servant for helpem wanfala grup overseer. Samfala taem, olketa elder maet tekem wanfala ministerial servant wea qualify for duim shepherding kol tugeta.

6. Wat nao samfala reason why iumi appreciatim olketa ministerial servant blo iumi wea waka hard?

⁶ Wat nao olketa gud samting wea kongregeson kasem from waka blo olketa ministerial servant? Wanfala sista lo Bolivia wea nem blo hem Beberly,b hem sei: “Bikos lo waka blo olketa ministerial servant, mi savve enjoyim full meeting. Wat olketa duim helpem mi for singsing, givim koment, lisin lo tok, and lane from olketa video and piksa. Olketa help for mek sure evriwan wea attendim meeting olketa sef and helpem olketa narawan for joinim meeting lo videoconferencing. Afta meeting, olketa help for duim klining, accounting, and mek sure iumi kasem literature wea iumi needim. Mi thankiu tumas lo olketa!” Sista Leslie, stap lo Colombia and hasband blo hem elder, hem sei: “Hasband blo mi depend lo olketa ministerial servant for helpem hem for lukaftarem olketa assignment. If kongregeson no garem olketa ministerial servant, bae hasband blo mi busy tumas, so mi barava thankiu for wei wea olketa waka hard and willing for help.” For sure, iu tu barava tinghae lo olketa ministerial servant.—1 Tim. 3:13.

7. Wat nao iumi savve duim for showimaot iumi appreciatim olketa ministerial servant? (Lukim tu piksa.)

⁷ Nomata iumi tinghae lo olketa ministerial servant, Bible encouragem iumi for mas duim samting for ‘showimaot iumi thankiu.’ (Col. 3:15) Krzysztof wea hem wanfala elder lo Finland duim samting for showimaot thankiu blo hem, hem sei: “Mi savve sendem postcard or text message and sharem wanfala scripture and storyim wanfala specific samting wea datfala ministerial servant duim wea encouragem mi or why mi tinghae lo waka blo hem.” Pascal and Jael, wea stap lo New Caledonia, savve prea specific for olketa ministerial servant. Pascal sei: “Recently, mifala savve evritaem prea for olketa ministerial servant blo mifala, and thankiu lo Jehovah bikos hem givim olketa for helpem kongregeson, and mifala askem hem for stap witim olketa and helpem olketa.” Jehovah hapi lo olketa prea olsem, and kongregeson kasem gud samting.—2 Cor. 1:11.

OLKETA ELDER LO KONGREGESON “WAKA HARD FOR HELPEM IUFALA”

8. Why nao Paul sei olketa elder lo first century olketa “waka hard”? (1 Thessalonica 5:​12, 13)

⁸ Lo first century, olketa elder waka hard for helpem kongregeson. (Readim 1 Thessalonica 5:​12, 13; 1 Tim. 5:17) Olketa elder gohed for “leadim” kongregeson, thru lo wei for conductim olketa meeting and for mekem olketa disison olsem body of elders. Olketa “givim advaes” lo olketa brata and sista lo wei for givim loving kaonsel for protectim kongregeson. (1 Thess. 2:​11, 12; 2 Tim. 4:2) And tu, olketa waka hard for provaed for famili blo olketa and gohed strongim frenship blo olketa witim Jehovah.—1 Tim. 3:​2, 4; Titus 1:​6-9.

9. Wat nao samfala responsibility wea olketa elder blo iumi distaem duim?

⁹ Distaem tu olketa elder barava busy. Olketa man for talemaot gud nius. (2 Tim. 4:5) Olketa showimaot gud example for strong for duim ministry, organizem preaching waka lo territory blo kongregeson, and trainim iumi for preach and teach gud. Olketa duim waka olsem judge wea showimaot mercy and wea no teksaed. Taem wanfala Christian duim serious sin, olketa elder waka hard for helpem hem for fren bak witim Jehovah. Bat lo semtaem, olketa mas careful tu for keepim kongregeson klin. (1 Cor. 5:​12, 13; Gal. 6:1) And main samting, olketa elder serve olsem Shepherd. (1 Pet. 5:​1-3) Olketa givim Bible tok wea olketa preparem gud, olketa duim best for savve gud lo evriwan lo kongregeson, and duim shepherding kol. Samfala elder savve help lo Kingdom Hall construction and maintenance, organizem convention, waka lo Hospital Liaison Komiti and Patient Visitation Grup, and duim olketa nara assignment tu. Olketa elder barava waka hard for helpem iumi!

10. Wat nao samfala reason why iumi appreciatim olketa elder blo iumi wea waka hard?

¹⁰ Jehovah profesi abaotem hao olketa shepherd bae lukaftarem iumi gud and bae iumi no “fraet or seksek.” (Jer. 23:4) Johanna, wanfala sista lo Finland, luksavve hao diswan hem barava tru taem mami blo hem sik big. Hem sei: “Hem no isi for mi storyim feeling blo mi witim olketa narawan, nomata olsem, wanfala elder wea mi no savve gud lo hem, hem patient witim mi, prea witim mi, and remindim mi lo love blo Jehovah. Mi no rememberim evri samting wea hem talem, bat mi rememberim dat visit blo hem helpem mi for no wari nao. Mi luksavve dat Jehovah sendem hem for helpem mi lo taem wea mi barava needim.” Hao nao olketa elder lo kongregeson blo iu helpem iu?

11. Hao nao iumi savve showimaot iumi appreciatim olketa elder? (Lukim tu piksa.)

¹¹ Jehovah laekem iumi for showimaot iumi barava appreciatim olketa elder “bikos long waka wea olketa duim.” (1 Thess. 5:​12, 13) Sista Henrietta, wea hem tu stap lo Finland, hem sei: “Olketa elder willing for helpem olketa narawan, bat datwan no minim olketa garem extra taem and energy, or olketa no garem olketa challenge lo laef blo olketa. Samfala taem mi savve sei lo olketa: ‘Iu savve! Iu wanfala gud elder. Mi laekem iu for savve lo datwan.’” Sera wanfala sista lo Türkiye,c hem sei: “Olketa elder needim ‘fuel’ for helpem olketa gohed duim waka. So hem gud for raetem wanfala card, invaetem olketa for kaikai tugeta, or joinim olketa lo field ministry.” Hao, iu savve tingim eni elder wea iu barava appreciatim wat hem duim? Duim samting for showimaot iu tinghae lo datwan.—1 Cor. 16:18.

OLKETA CIRCUIT OVERSEER WAKA HARD FOR STRONGIM KONGREGESON

12. Lo first century, hu nao olketa narawan wea Jesus givim for strongim olketa kongregeson? (1 Thessalonica 2:​7, 8)

¹² Jesus Christ givim “olketa man olsem present” for duim nara waka for helpem kongregeson. Anda lo direction blo Jesus, olketa elder lo Jerusalem sendem go Paul, Barnabas, and olketa narawan for duim waka olsem traveling overseer. (Acts 11:22) Why? For duim sem samting olsem olketa ministerial servant and olketa elder, wea hem nao for strongim olketa kongregeson. (Acts 15:​40, 41) Olketa man hia mekem staka sakrifaes and even willing for givim laef blo olketa for duim waka for teachim and encouragem narawan.—Readim 1 Thessalonica 2:​7, 8.

13. Wat nao samfala responsibility blo olketa circuit overseer?

¹³ Olketa circuit overseer travel evritaem. Samfala taem olketa savve travel staka handred kilometer for kasem nara kongregeson. Each week, wanfala circuit overseer savve givim staka tok, duim shepherding kol, conductim pioneer meeting, elders meeting, and meeting for field ministry. Hem preparem tu olketa tok and organizem olketa circuit assembly and convention. Hem teach lo pioneer skul, arrangem spesol meeting blo olketa pioneer lo circuit, and duim olketa nara assignment from branch office, wea samfala taem hem barava urgent.

14. Wat nao samfala reason why iumi appreciatim olketa circuit overseer blo iumi wea waka hard?

¹⁴ Hao nao kongregeson kasem gud samting from nambawan waka blo olketa circuit overseer? Wanfala brata lo Türkiye, storyim visit blo olketa circuit overseer and hem sei: “Each visit blo olketa, hem encouragem mi for spendem moa taem for helpem olketa brata and sista. Mi meetim staka circuit overseer, and no eniwan lo olketa mekem mi feel olsem hem busy tumas or hard for story witim olketa.” Taem Sista Johanna waka witim wanfala circuit overseer lo ministry, olketa no meetim eniwan. Bat hem sei: “Nomata olsem, mi still tingim datfala day. Tufala sista blo mi just muv go lo nara ples, and mi barava missim tufala. Datfala circuit overseer encouragem mi and helpem mi for luksavve dat taem iumi servem Jehovah, nomata iumi stap farawe from olketa famili and olketa frens, bat lo niu world bae iumi spendem staka taem tugeta.” Staka lo iumi garem olketa naes memory olsem abaotem olketa circuit overseer blo iumi.—Acts 20:37–21:1.

15. (a) Olsem 3 John 5-8 storyim, wat nao iumi savve duim for showim iumi appreciatim olketa circuit overseer? (Lukim tu piksa.) (b) Why nao iumi shud tingim waef blo olketa brata wea waka hard lo kongregeson, and hao nao iumi savve showim iumi appreciatim olketa? (Lukim box “No Forgetim Waef blo Olketa.”)

¹⁵ Aposol John encouragem Gaius for welkamim olketa brata wea visit kam and for “duim samting for helpem olketa.” (Readim 3 John 5-8.) Wanfala samting iumi savve duim, hem for invaetem circuit overseer for iumi kaikai tugeta. Nara wei, hem for sapotim olketa arrangement for field ministry during lo visit. Sista Leslie, duim nara samting tu for showimaot hem appreciatim olketa circuit overseer, hem sei: “Mi prea for Jehovah givim wat olketa needim. Mi and hasband raetem olketa leta for olketa, and talem hao visit blo olketa hem barava helpem mifala.” Remember, olketa circuit overseer, olketa olsem iumi nomoa. Samfala taem olketa sik, wari, and feel discourage. Maet kaenfala toktok wea iu talem or present wea iu givim hem ansa for prea blo hem!—Prov. 12:25.

IUMI NEEDIM “OLKETA MAN OLSEM PRESENT”

16. For followim wat Proverbs 3:27 talem, olketa wanem kwestin nao hem gud for olketa brata ting raonem?

¹⁶ Evriwea lo world, iumi needim staka moa brata for kamap ‘olketa man wea olsem present.’ If iu wanfala baptaes brata, hao, iu fit for duim samting for help? (Readim Proverbs 3:27.) Iu willing for qualify for kamap wanfala ministerial servant? Hao, iu savve reach aot for kamap wanfala elder mekem iu savve helpem olketa brata blo iu?d Hao, iu willing for changem samfala samting lo laef blo iu mekem iu savve apply for Skul for Olketa Kingdom Evangelizer? Datfala skul bae helpem iu fit for duim gud waka wea Jesus laekem iu for duim. If iu feel iu no qualify, prea lo Jehovah. Askem hem for holy spirit mekem iu duim gud eni assignment wea iu kasem.—Luke 11:13; Acts 20:28.

17. Taem King blo iumi Jesus Christ provaedem “olketa man olsem present,” wat nao datwan pruvim?

¹⁷ From Jesus appointim “olketa man olsem present,” datwan pruvim Jesus gohed leadim iumi during lo olketa last day distaem. (Matt. 28:20) Iumi barava hapi tumas and tinghae lo loving King blo iumi wea kaen tumas wea luksavve lo wat iumi needim and provaedem olketa brata for helpem iumi. So hem gud for iumi lukaotem chance for showim iumi barava appreciatim hard waka blo olketa brata hia. And iumi shud no forget for sei thankiu lo Jehovah, wea hem nao man wea provaedem “evri gud and perfect present.”—Jas. 1:17.