Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • w25 February pp. 30-31
  • Wanfala Simpol Kwestin wea Iumi Savve Askem

Disfala sekson no garem eni video.

Sorre, disfala video no savve plei distaem.

  • Wanfala Simpol Kwestin wea Iumi Savve Askem
  • Wastaoa wea Talemaot Kingdom Bilong Jehovah (Study)—2025
  • Olketa Nara Article
  • Hem Willing for Waka for Jehovah
    Garem Sem Faith Olsem Olketa
  • Wanem Iumi Lanem From Mary
    Wastaoa wea Talemaot Kingdom Bilong Jehovah—2009
  • “Mi Wanfala Wakman Bilong Jehovah!”
    Wastaoa wea Talemaot Kingdom Bilong Jehovah—2008
  • Hem Gohed Faithful Nomata Hem Sorre Tumas
    Wastaoa wea Talemaot Kingdom Bilong Jehovah—2014
Samfala Moa
Wastaoa wea Talemaot Kingdom Bilong Jehovah (Study)—2025
w25 February pp. 30-31
Wanfala sista and hasband blo hem iusim videoconferencing for conductim Bible study witim wanfala woman.

Wanfala Simpol Kwestin wea Iumi Savve Askem

Mary and hasband blo hem, John,a stap lo wanfala kantri wea hem isi for olketa sharem gud nius witim pipol from Philippines wea kam for waka lo there. During lo COVID-19 pandemic, Mary startim olketa Bible study no just witim pipol lo datfala kantri wea hem stap, bat witim pipol lo olketa nara kantri tu. Hao nao hem duim datwan?

Mary savve askem olketa Bible student blo hem disfala kwestin: “Hao, iu savve lo eniwan wea laek for studyim Bible?” If olketa sei yes, hem savve ask for hem contactim olketa. Gud samting savve kamap from wei for askem disfala simpol kwestin. Why? Bikos staka taem pipol wea tinghae lo Word blo God laek for sharem wat olketa lanem witim olketa famili member and frens blo olketa. Wat nao gud samting wea kamap from wei wea Mary askem disfala kwestin?

Wanfala Bible student blo Mary, wea nem blo hem Jasmin, helpem hem for contactim nara fofala pipol wea laek for studyim Bible. Wanfala lo olketa hem Kristine, and taem tufala start for study hem enjoyim tumas, so hem askem Mary for tufala study tu taems lo week. Taem Mary askem Kristine if hem savve lo eniwan wea laek for studyim Bible, Kristine sei: “Yes, bae mi helpem iu for contactim olketa frens blo mi.” Insaed tu-thri week nomoa, Kristine introducem fofala fren blo hem wea laek for study. Bihaen, Kristine introducem samfala nara fren blo hem moa and samfala lo olketa hia duim sem samting tu.

Kristine laekem famili blo hem lo Philippines tu for studyim Bible. So hem story lo dota blo hem, Andrea. Firstaem, Andrea tingse ‘Olketa Witness hem wanfala cult religion, olketa no biliv lo Jesus, and olketa only iusim Old Testament.’ Bat afta first study blo hem nomoa, hem luksavve hao tingting wea hem garem hem no stret. During lo study, hem savve sei: “Sapos Bible nao hem talem diswan, hem tru nao ia!”

Gogo, Andrea introducem lo Mary tufala fren blo hem and wanfala workmate, and olketa start for study. And tu, Mary hem no savve dat wanfala aunty blo Andrea, wea nem blo hem Angela wea hem blind, hem savve lisin taem tufala study. Then wanday, Angela askem Andrea for introducem hem lo Mary and hem talem dat hem tu laek for study. Angela barava laekem tumas wat hem lanem. Insaed tu-thri months nomoa, Angela memorizim staka scripture and laek for study fo taems lo week! Witim help blo Andrea, Angela start for attendim olketa meeting evritaem lo videoconferencing.

Mary faendaot dat hasband blo Kristine, wea nem blo hem Joshua, hem savve stap lo haos during lo taem wea Kristine study, so Mary askem hem if hem laek for joinim study. Joshua sei: “Bae mi lisin nomoa, bat no askem mi eni kwestin, if iu askem mi kwestin bae mi go aot nao.” Faev minute bihaen olketa start study, hem askem staka kwestin winim Kristine and hem laek for continue witim olketa Bible discussion.

Datfala simpol kwestin wea Mary askem hem mekem hem for startim staka Bible study. From datwan, hem mekem arrangement for olketa nara Witness study witim staka lo olketa. Mary startim 28 Bible study lo fofala difren kantri.

Jasmin, wea hem firstfala Bible student wea iumi storyim lo disfala experience, hem baptaes lo April 2021. Kristine hem baptaes lo May 2022, and hem go bak lo famili blo hem lo Philippines. Tufala nara Bible student wea Kristine introducem lo Mary, tufala tu baptaes. Samfala months bihaen datwan, Angela baptaes and distaem hem regular pioneer. Joshua, wea hem hasband blo Kristine, and dota blo tufala Andrea, witim samfala nara Bible student, olketa still study and olketa gohed gud.

Datfala sem sista, iusim videoconferencing for story lo Bible student blo hem and fofala fren blo datfala student.

Lo first century, olketa disaepol kwiktaem for talemaot gud nius lo olketa famili member and frens blo olketa. (John 1:​41, 42a; Acts 10:​24, 27, 48; 16:​25-33) Hem gud for iu askem disfala kwestin lo olketa Bible student blo iu and olketa narawan wea interest, “Hao, iu savve lo eniwan wea laek for studyim Bible?” Iumi no savve hao many Bible study nao bae iumi startim if iumi askem disfala simpol kwestin.

a Mifala changem olketa nem.

    Solomon Islands Pidgin Pablikeson (1988-2024)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem