Olketa Young Brata, Followim Example blo Mark and Timothy

1-2. Wat nao samfala challenge wea maet stopem Mark and Timothy for no duim moa samting for helpem olketa narawan?

OLKETA young brata, hao, iufala laek for duim moa samting lo service blo Jehovah and duim moa samting for helpem olketa lo kongregeson blo iufala? For sure iu laek for duim datwan. Iumi hapi tumas for lukim staka young brata wea willing for helpem olketa narawan! (Ps. 110:3) Bat maet iufala feisim samfala challenge. Hao, iu hol bak for duim moa samting lo ministry bikos iu fraetem wat nao maet happen? Hao, enitaem iu hol bak for acceptim wanfala assignment bikos iu no confident? Sapos olsem, hem no iuseleva nomoa wea feel olsem.

² Mark and Timothy tu deal witim olketa challenge olsem. Bat tufala no letem wei for fraetem wat maet happen or wei wea olketa no garem staka experience for stopem tufala for duim samting for helpem narawan. Taem aposol Paul and Barnabas invaetem Mark for go witim tufala lo first missionary tour blo olketa, maet Mark stap gud lo wanfala naes haos witim mami blo hem. (Acts 12:​12, 13, 25) Nomata olsem, Mark willing for lusim ples wea hem getius lo hem, for duim moa samting lo ministry. Firstaem, hem muv go lo Antioch. Then, hem followim Paul and Barnabas lo olketa nara farawe ples. (Acts 13:​1-5) Luk olsem, Timothy tu maet stap witim parents blo hem taem Paul invaetem hem for joinim hem lo preaching waka. From Timothy hem young and no garem staka experience, maet hem no feel confident for go witim Paul. (Comparem 1 Corinthians 16:​10, 11 and 1 Timothy 4:12.) Nomata olsem, Timothy acceptim invitation blo Paul, and hem enjoyim staka blessing.—Acts 16:​3-5.

3. (a) Hao nao iumi savve dat Paul barava tinghae lo Mark and Timothy? (2 Timothy 4:​6, 9, 11) (Lukim tu olketa piksa.) (b) Wat nao olketa kwestin wea iumi bae storyim lo disfala article?

³ Mark and Timothy kasem staka training and lane for duim olketa big responsibility lo kongregeson taem tufala young yet. Paul barava tinghae lo tufala man hia dastawe nomata bihaen staka year, taem hem luksavve hem klosap for dae hem laekem tufala for stap witim hem. (Readim 2 Timothy 4:​6, 9, 11.) Wat nao olketa quality wea Mark and Timothy garem dastawe Paul lovem tufala? Hao nao olketa young brata savve followim example blo tufala? And hao nao olketa young brata savve kasem gud samting from advaes blo Paul?

FOLLOWIM EXAMPLE BLO MARK FOR WILLING FOR HELPEM NARAWAN

4-5. Hao nao Mark showim hem willing for helpem olketa narawan?

⁴ Wanfala reference storyim hao wei for willing for helpem, or duim samting for olketa narawan, hem minim for reach aot for “waka hard and no givap” for helpem olketa. Mark showimaot gud example lo diswan. Taem Paul no laek for tekem hem lo second missionary trip, Mark maet feel nogud and sorre lelebet. (Acts 15:​37, 38) Nomata olsem, Mark gohed helpem olketa brata and sista.

⁵ Mark acceptim assignment for serve witim kasin brata blo hem Barnabas. Samting olsem 11 years bihaen, Mark hem wanfala lo olketa wea helpem Paul taem hem lo prison lo Rome. (Philem. 23, 24) Paul hem barava tinghae lo sapot wea hem kasem from Mark, dastawe hem sei Mark “barava comfortim mi.”—Col. 4:​10, 11.

6. Wat nao olketa gud samting wea Mark kasem from wei for fren klos witim olketa mature Christian? (Lukim footnote.)

⁶ Mark kasem staka gud samting from wei wea hem fren klos witim olketa mature Christian. Bihaen Mark stap for samfala taem witim Paul lo Rome, hem go moa for stap witim aposol Peter lo Babylon. Tufala barava fren gud tugeta, dastawe Peter kolem hem “son blo mi, Mark.” (1 Pet. 5:13) Taem tufala waka tugeta, masbi Peter storyim lo young fren blo hem Mark, staka interesting samting abaotem laef and ministry blo Jesus, wea bihaen, Mark raetem datwan lo Gospel blo hem.a

7. Hao nao wanfala young brata wea nem blo hem Seung-Woo hem followim example blo Mark? (Lukim tu piksa.)

⁷ Mark gohed for busy lo ministry and hem fren klos witim olketa mature brata. Hao nao iu savve followim example blo Mark? If enitaem iu no kasem wanfala privilege wea iu laek for kasem, gohed for patient, and gohed lukaotem olketa difren wei for servem Jehovah and for helpem kongregeson. Tingim example blo Seung-Woo, wea distaem hem wanfala elder. Taem hem young, hem savve comparem hemseleva witim olketa nara young brata. Samfala brata hia kasem privilege lo kongregeson bifor hem kasem eni privilege. Seung-Woo feel nogud lo datwan, so hem storyim lo olketa elder. Wanfala elder talem hem for duim best blo hem for helpem olketa narawan nomata samfala taem pipol no lukim gud samting wea hem duim. Datfala advaes helpem Seung-Woo for duim samting for helpem olketa olo, and olketa narawan wea needim transport for go lo meeting. Taem hem ting bak, hem sei: “Lo taem olsem nao, mi just experiencem wat hem minim for helpem olketa narawan. Mi barava hapi from mi duim samting for helpem olketa narawan.”

FOLLOWIM EXAMPLE BLO TIMOTHY FOR LOVEM AND KEA FOR OLKETA NARAWAN

8. Why nao Paul chusim Timothy for waka witim hem? (Philippians 2:​19-22)

⁸ Taem Paul go bak lo olketa taon wea pipol bin persecutim hem, hem needim olketa wea go witim hem for mas no fraet. Firstaem, hem chusim Silas wea hem wanfala mature Christian for go witim hem. (Acts 15:​22, 40) Bihaen, Paul chusim Timothy for waka witim hem. Why nao hem chusim Timothy? Wanfala reason hem bikos kongregeson talem olketa gud samting abaotem Timothy. (Acts 16:​1, 2) And tu, Timothy barava kea abaotem pipol.—Readim Philippians 2:​19-22.

9. Hao nao Timothy showimaot hem barava kea abaotem olketa brata and sista?

⁹ Taem Timothy start for waka witim Paul lo ministry, hem showimaot hem barava kea abaotem olketa narawan winim hemseleva. Dastawe, Paul trustim hem for stay bak lo Beroea for encouragem olketa niu disaepol lo there. (Acts 17:​13, 14) Lo datfala taem, masbi Timothy lanem staka gud samting from Silas, wea hem tu stay bak lo Beroea. Bat bihaen, Paul sendem Timothy seleva for go lo Thessalonica for strongim olketa Christian lo datfala taon. (1 Thess. 3:2) For winim samting olsem 15 years, Timothy lane for “krae witim pipol wea krae” wea datwan showim hem tingim feeling blo eniwan wea safa. (Rom. 12:15; 2 Tim. 1:4) Hao nao olketa young Christian brata savve followim example blo Timothy?

10. Hao nao wanfala brata wea nem blo hem Woo Jae hem lane for showim wei for kea for olketa narawan?

¹⁰ Wanfala brata wea nem blo hem Woo Jae lane for showim wei for kea for olketa narawan. Taem Woo Jae hem young man, hem faendem hard for story lo olketa olo brata and sista. So lo Kingdom Hall, hem savve hello lo olketa nomoa, then hem go nao. Wanfala elder talem Woo Jae for trae for startim story lo wei for talem olketa brata and sista abaotem gud samting wea olketa duim wea hem tinghae lo hem. Elder hia encouragem hem tu for ting abaotem wat olketa narawan interest lo hem. Woo Jae followim advaes blo datfala elder. Distaem Woo Jae hem wanfala elder, and hem sei: “Distaem, mi faendem hem isi for story gud witim olketa narawan, nomata mifala no sem age. Mi hapi tumas bikos mi minim wat nao olketa narawan deal witim. Datfala advaes barava helpem mi for duim samting for helpem olketa brata and sista.”

11. Hao nao olketa young brata savve showimaot olketa kea for olketa narawan lo kongregeson blo olketa? (Lukim tu piksa.)

¹¹ Iufala olketa young brata tu savve showimaot iufala kea abaotem olketa narawan. Lo meeting, trae for savve lo olketa brata and sista wea garem difren baekgraon and difren age. Askem olketa, “Hao nao iufala?” and then lisin lo olketa. Taem olsem, maet iu bae luksavve hao for helpem olketa. Maet bae iu lukim dat wanfala olo couple needim help for iusim JW Library^® app. Or iu maet faendaot dat olketa no garem eniwan for waka witim olketa lo ministry. Hao, iu savve helpem olketa for iusim electronic device blo olketa or arrange for go preach witim olketa? Taem iu willing for helpem olketa narawan, iu showimaot gud example for evriwan.

KASEM GUD SAMTING FROM LOVING ADVAES BLO PAUL

12. Hao nao olketa young brata savve kasem gud samting from advaes wea Paul givim lo Timothy?

¹² Paul givim practical advaes for helpem Timothy succeed lo laef and lo ministry blo hem. (1 Tim. 1:18; 2 Tim. 4:5) Iufala olketa young brata savve kasem gud samting from loving advaes blo Paul. Wat nao iu savve duim? Readim tufala leta wea Paul raetem for Timothy and ting lo datwan olsem hem raetem for iu, and lukim wat kaen advaes nao bae iu savve applyim lo laef blo iu. Tingim samfala example.

13. Wat nao iumi need for duim for garem loyal love for Jehovah?

¹³ “Trainim iuseleva witim wei for faithful lo God olsem goal blo iu.” (1 Tim. 4:7b) Wat nao wei for faithful lo God hem minim? Hem minim for garem loyal love for Jehovah and laek for duim samting wea mekem Jehovah hapi. Loyal love hem no samting wea iumi born witim, dastawe iumi need for mekem grow. Hao nao iumi savve duim datwan? Greek word wea olketa transleitim lo “trainim iuseleva,” staka taem olketa iusim datwan for describem olketa sportsman wea kasem training for wanfala sports competition. Olketa sportsman hia need for disciplinem olketa seleva. Iumi tu need for disciplinem iumiseleva mekem iumi savve garem olketa gudfala wei for mekem iumi savve fren klos witim Jehovah.

14. Wat nao goal blo iumi taem iumi readim Bible? Storyim example.

¹⁴ Taem iu mekem wei for readim Bible hem kamap habit blo iu, evritaem tingim, dat goal blo iu hem for fren klos witim Jehovah. For example, wat nao iu savve lanem from story blo Jesus witim datfala young rich ruler? (Mark 10:​17-22) Datfala young man biliv dat Jesus nao hem Messiah bat hem no garem strong faith, so hem no followim Jesus. Nomata olsem, Jesus “lovem hem.” Masbi, wei wea Jesus story lo datfala young man hem barava tasim heart blo iu. Hem klia, Jesus laekem hem for mekem wanfala wise disison. And tu, hao Jesus hem story, hem showimaot love wea Jehovah garem for datfala young man. (John 14:9) Taem iu ting raonem disfala story and situation blo iu, hem gud for askem iuseleva, ‘Wat nao mi need for duim for fren klos witim Jehovah and for duim moa samting for helpem olketa narawan?’

15. Why nao hem important for wanfala young brata showimaot gud example for olketa narawan? Storyim example. (1 Timothy 4:​12, 13)

¹⁵ “Kamap wanfala gud example for olketa wea faithful.” (Readim 1 Timothy 4:​12, 13.) Paul encouragem Timothy for kamap gud lo wei for read and teach gud, and tu, for garem olketa quality olsem love, faith, and klinfala wei. Why nao olsem? Gud example wea iu showim hem savve affectim olketa narawan winim wat iu talem. Sapos iu kasem wanfala assignment for givim wanfala tok abaotem hao for waka hard lo ministry, iu bae feel moa confident for storyim datwan if iu duim best blo iu lo ministry. Taem olsem, example blo iu bae motivatim olketa narawan for duim moa samting lo ministry.—1 Tim. 3:13.

16. (a) Wat nao faevfala wei wea wanfala young Christian savve showimaot gud example? (b) Hao nao wanfala young brata savve kamap gud example saed “lo toktok”?

¹⁶ Olsem iumi lukim lo 1 Timothy 4:​12, Paul storyim faevfala wei wea olketa young brata savve showimaot gud example for olketa narawan. Hao sapos iu duim personal study project abaotem each wan lo olketa wei hia? For example, if iu laek for kamap gud example saed “lo toktok.” Ting abaotem hao for iu talem olketa toktok wea savve encouragem olketa narawan. If iu still stap witim parents blo iu, hao sapos iu evritaem talem thankiu lo olketa for wat olketa duim for iu? Afta lo olketa meeting, hao sapos iu talem lo brata or sista wea garem part lo meeting wat iu laekem tumas lo tok blo hem? Hem gud tu for trae givim olketa koment lo own toktok blo iu. Taem iu traem best for showim gud example lo toktok blo iu, datwan bae showim dat iu kamap moa mature lo spiritual wei.—1 Tim. 4:15.

17. Wat nao bae helpem wanfala young brata for kasem olketa spiritual goal blo hem? (2 Timothy 2:22)

¹⁷ “Ranawe from olketa samting wea young pipol laekem, bat aftarem raeteous fasin.” (Readim 2 Timothy 2:22.) Paul encouragem Timothy for againstim olketa feeling wea maet mekem hem no focus lo olketa spiritual goal, and wea savve spoelem frenship blo hem witim Jehovah. Maet iu luksavve tu dat samfala samting iu laek for duim hem no rong, bat maet hem tekem tumas taem blo iu from olketa spiritual samting. For example, tingim haomas taem iu iusim for pleim sports, lukluk lo Internet, or pleim olketa video game. Hao sapos iu iusim datfala taem for duim olketa spiritual samting? Maet iu savve help for duim maintenance lo Kingdom Hall blo iufala or joinim trolley witnessing. If iu duim olketa samting olsem, maet bae iu garem olketa niu frens wea bae helpem iu for markem and kasem olketa spiritual goal blo iu.

KASEM STAKA BLESSING TAEM IU HELPEM OLKETA NARAWAN

18. Why nao iumi sei Mark and Timothy enjoyim laef and barava satisfae?

¹⁸ Mark and Timothy willing for mekem staka change lo laef blo tufala for helpem olketa narawan, and olketa enjoyim laef and barava satisfae. (Acts 20:35) For helpem olketa brata and sista, Mark travel go lo olketa difren ples. Hem raetem tu interesting story abaotem laef and ministry blo Jesus. Timothy helpem Paul for startim olketa kongregeson and encouragem olketa brata and sista. For sure, Jehovah barava hapi lo wei wea Mark and Timothy willing for mekem olketa change hia for duim moa samting for Hem.

19. Why nao olketa young brata shud followim advaes wea Paul givim lo Timothy, and wat nao olketa bae kasem?

¹⁹ Love wea Paul garem for Timothy hem showaot klia lo olketa leta wea hem raetem for young fren blo hem, Timothy. Tufala leta hia showimaot tu hao Jehovah barava lovem olketa young brata. Jehovah laekem iu for barava enjoyim wei for servem hem. So duim best blo iu for followim loving advaes blo Paul, and mekem grow feeling for laek duim moa samting for helpem olketa narawan. If iu duim datwan, iu bae enjoyim laef distaem, and iu bae “hol strong lo datfala tru laef” lo future.—1 Tim. 6:​18, 19.