Hao Divorce Hem Affectim Olketa Pikinini

Samfala spouse wea no savve stap gud tugeta tingse divorce nao hem best option for pikinini blo olketa—olketa tingse hem beta for divorce winim for pikinini stay witim parents wea savve raoa evritaem. Wat nao olketa facts showim?

• Hao nao divorce hem affectim olketa pikinini?

• Hao, bae pikinini blo mi moa hapi if mi divorce?

• Wat nao reality blo co-parenting?

• Hao, eni beta option hem stap?

Hao nao divorce hem affectim olketa pikinini?

Research showim dat divorce savve barava affectim olketa pikinini. Taem parents divorce, diswan savve mekem olketa pikinini for:

• feel kros, garem anxiety, and depression

• garem problem saed lo behavior

• no do gud lo skul or drop aot

• savve sik olowe

Nara samting tu, staka pikinini blamem olketa seleva taem parents divorce, and tingse olketa nao kosim datwan or olketa shud preventim datwan for happen.

Olketa challenge wea olketa pikinini wea parents divorce olketa feisim maet continue taem olketa adult, wea staka taem olketa ting daonem olketa seleva and hard for trustim others. Hae chance olketa tu bae divorce if olketa garem problem lo marit blo olketa seleva.

Important samting for tingim: Nomata samfala pipol tingse divorce hem best option for helpem olketa pikinini, research showim datkaen tingting hem no tru. “Divorce hem mekem olketa pikinini for sorre tumas,” hem nao samting wea Penelope Leach, expert blo childcare hem talem.a

Bible principle: “Evritaem tingim olketa narawan and no tingim iufala seleva nomoa.”—Philippi 2:4.

Hao, bae pikinini blo mi moa hapi if mi divorce?

Samfala pipol bae sei yes. Bat, hem gud for tingim dat needs blo parents hem difren from needs blo pikinini. Datfala person wea ting for divorce hem laek startim niu laef. Pikinini usually laekem laef blo hem for no change and hem no laekem mami and dadi for divorce.

Bihaen olketa duim research abaotem staka thousand case blo divorce, olketa wea raetem buk The Unexpected Legacy of Divorce sei: “Wanfala samting wea barava showaot klia: olketa pikinini no sei dat olketa moa hapi. Bat olketa tok stret olsem, ‘Day wea parents blo mi divorce hem day wea childhood blo mi hem end.’” Datfala buk talem tu dat hao olketa pikinini ting lo world hem olsem “ples wea no sef bikos tufala wea olketa garem klos relationship witim tufala brek ap nao.”

Important samting for tingim: Staka taem olketa pikinini no feel hapi bihaen parents blo olketa divorce.

Bible principle: “Tingting wea wikdaon hem finisim strong blo man.”—Proverbs 17:22.

Wat nao reality blo co-parenting?

Samfala parents wea divorce trae for sharem responsibility for lukaftarem pikinini followim hao tufala lukaftarem olketa pikinini taem tufala stay tugeta. Bat, co-parenting hia hem no isi. Research showim dat staka taem tufala wea divorce:

• spendem less taem witim pikinini blo tufala

• teachim olketa difren standard

• allowim pikinini for duim eniting wea hem laekem bikos tufala feel guilty or taed

Pikinini wea parents divorce staka taem bae hem start for no lisin lo parents blo hem. Diswan hem bikos parents blo hem no tinghae lo olketa value olsem commitment or trust or followim agreement. Pikinini maet ting olsem, ‘Bae mi lisin lo tufala for wat?’

Important samting for tingim: Staka taem co-parenting hem hard samting for tufala wea divorce. Bat for olketa pikinini, datfala situation hem moa hard.

Bible principle: “No mekem olketa pikinini bilong iufala for kros, nogud nao olketa wikdaon.”—Colossae 3:21.

Hao, eni beta option hem stap?

Wanfala samting, big waka nao wan couple bae duim bihaen tufala divorce, bat hem bae beta if tufala iusim datfala sem effort for trae for sevem marit blo tufala. “Just bikos wanfala marit garem olketa big problem, datwan no minim bae hem hard nao for marit hia improve,” hem nao wat buk The Case for Marriage hem talem. “Gogo, staka marit couple wea no hapi lo marit blo tufala bat wea tufala disaed for no divorce, marit blo tufala isisi impruv and tufala hapi moa.” Staka taem, olketa pikinini barava benefit taem parents stay tugeta.

Diswan no minim hem rong for divorce. Bible hem allowim divorce lo grounds blo sexual immorality. (Matthew 19:9) Nomata olsem, Bible sei tu dat “man wea wise ting raonem each step blo hem.” (Proverbs 14:15) Hasband and waef wea marit blo tufala garem olketa problem shud tingim evriting wea involve lo diswan—includim hao divorce bae affectim olketa pikinini blo tufala.

Hem tru, nomata marit hem garem olketa big problem, tufala mas duim moa samting winim for endure nomoa. Bible givim best advaes for helpem hasband and waef for garem olketa quality wea tufala needim for marit hapi and stap olowe. Datwan hem stret samting bikos Author blo Bible, Jehovah, hem nao creatim marit arrangement.—Matthew 19:4-6.

Bible principle: “Mi, Jehovah, mi God blo iufala, man wea teachim iufala for iufala nao kasem gud samting.”—Isaiah 48:17.