Helpem Pikinini for Deal Witim Olketa Disturbing Nius Report

Olketa barava disturbing nius report—staka taem witim graphic video footage—hem available 24/7 lo TV, phone, tablet, and computer.

And olketa pikinini watchim olketa nius report hia.

Hao nao iu savve protectim pikinini blo iu from disturbing nius report wea maet mekem olketa stress?

• Hao nao nius savve affectim olketa pikinini?

• Hao nao iu savve helpem pikinini blo iu for deal witim nius anxiety?

• Hao if pikinini blo iu witnessim wanfala tragic samting wea happen?

Hao nao nius savve affectim olketa pikinini?

• Staka pikinini savve feel upset taem olketa lukim olketa tragedy lo nius. Samfala pikinini maet no storyim feeling blo olketa, bat eni tragic nius report savve mekem olketa barava feel upset.a Anxiety blo pikinini savve increase if parents tu ova wari.

• Olketa pikinini savve misunderstandim wat olketa lukim lo nius. For example, samfala maet tingse wat olketa lukim bae happen lo famili blo olketa. And olketa smol pikinini wea continue for watchim video footage blo nogud samting wea happen maet tingse datwan hem continue for happen.

• Olketa pikinini maet stragol for garem balance tingting abaotem olketa nius report. Maet olketa pikinini no realizim dat olketa nius agency olketa bisnis wea mek profit if olketa garem large audience. So, olketa savve extram olketa nius report mekem pipol gohed watchim nius hia.

Hao nao iu savve helpem pikinini blo iu for deal witim nius anxiety?

• Limitim exposure blo olketa lo tragic nius. Diswan no minim dat olketa pikinini blo iu shud no garem eni idea lo wat happen raon lo world. Bat bae olketa no benefit if olketa watchim wanfala disturbing story wea nius gohed for repeatim.

  “Samtaem mifala storyim staka samting abaotem wanfala nius report, bat no realizim dat hem tumas for olketa pikinini blo mifala wea herem story.”—Maria.

  Bible principle: “Wari hem wanfala hevi burden.”—Proverbs 12:25, Contemporary English Version.

• Patient for lisin, respond witim understanding. If hem difficult for pikinini blo iu for story abaotem samting wea happen, askem hem if hem laek for drawim piksa abaotem wat hem happen instead. Addressim olketa concern blo pikinini blo iu and iusim olketa words wea hem bae minim, bat avoidim wei for discussim unnecessary detail abaotem datwan.

  “Dota blo mitufala hem feel beta bihaen mitufala sidaon and lisin lo hem. Samting wea no benefitim hem nao kaen toktok olsem, ‘Laef hem olsem nao, and iumi mas getius lo hem.’”—Sarahi.

  Bible principle: “Mas willing for lisin, no kwiktaem for toktok.”—James 1:19.

• Helpem pikinini blo iu for balance saed lo olketa nius report. For example, wanfala nius report saed lo kidnapping maet mekem hem luk olsem datwan hem samting wea savve happen staka taem. Explainim lo olketa pikinini blo iu wat iu duim finis for mek sure olketa stap sef. Nara samting tu, nius bae reportim wanfala tragedy bikos hem samting wea no happen evritaem—no bikos hem common samting.

  “Helpem pikinini blo iu for deal witim feelings blo hem. Staka taem, feeling hem join witim wat samwan tingim, so if iumi helpem olketa pikinini blo iumi for focus lo positive samting, then olketa bae feel beta.”—Lourdes.

  Bible principle: “Wise man hem chusim gud olketa toktok blo hem and olketa toktok blo hem savve convincim narawan.”—Proverbs 16:23.