Teachim Pikinini for Showim Wei for Tinghae

Research showim dat pipol wea garem wei for tinghae olketa moa hapi, moa healthy, savve hao for deal witim hard taem, and garem strong frenship witim others. Researcher Robert A. Emmons hem talem dat for tinghae hem “protectim wanfala person from wei for jealous, keepim kros, greedy, and wei for heit.”a

Wat nao benefit wea pikinini kasem if olketa garem wei for tinghae? Lo wanfala research wea olketa duim lo 700 youths for fofala year, olketa faendem dat olketa youths wea garem wei for tinghae staka lo olketa no cheat lo test, no iusim drugs, no drunk, and no garem nogud behavior.

• Attitude for feel entitle hem katem daon wei for tinghae. Staka pikinini feel dat eni gud samting wea happen lo olketa hem wat olketa garem raet for kasem. Olketa no ting lo gud samting hia olsem gift bat olketa ting lo hem olsem wat olketa deserve for kasem.

  Kaen attitude hia hem common. Wanfala mami wea nem blo hem Katherine sei: “World distaem teachim pipol dat olketa entitle for kasem eniting wea olketa laekem. Media advertisim staka samting and sei dat iumi deservem olketa tings hia and iumi nao shud first wan for kasem olketa tings hia.”

• Olketa pikinini savve lanem wei for tinghae. Wanfala mami wea nem blo hem Kaye sei: “Olketa pikinini kwiktaem for lanem samting. For teachim olketa taem olketa young for garem gudfala habit hem olsem for iusim stik for helpem wanfala plant for grow stret.”

Hao for teachim wei for tinghae

• Teachim wat for talem. Olketa smol pikinini tu savve lane for sei thankiu taem samwan givim gift lo olketa or duim gud samting for olketa. Taem olketa growap and mature, bae olketa barava appreciatim kaeness wea others showim lo olketa.

  

  Bible principle: “Showimaot iufala thankiu.”—Colossae 3:15.

  “Granson blo mifala wea hem thri years old savve sei ‘thankiu,’ and taem hem askem eniting, hem evritaem sei ‘plis.’ Hem lanem datwan from parents blo hem. Manners and toktok for sei thankiu teachim hem hao for showim wei for tinghae.”—Jeffrey.

• Teachim wat for duim. Taem samwan givim present lo pikinini blo iu, hem gud for iu teachim hem for raetem thankiu note for datfala person. And sapos iu givim pikinini blo iu waka for duim lo haos, iu helpem hem for luksavve dat hem big waka for keepim evriting lo haos hem gud for mekem famili hapi.

  

  Bible principle: “Man wea givim samting hem barava hapi winim man wea kasem samting.”—Acts 20:35.

  “Tufala teenager blo mifala duim share blo tufala for helpem famili taem tufala planim meals, kuki, and duim olketa waka lo haos. Datwan helpem tufala for appreciatim effort wea mifala parents duim, and hem savve helpem tufala for tinghae lo olketa tings hia.”—Beverly.

• Teachim attitude wea olketa shud garem. Tingim disfala illustration: Wanfala plant savve grow taem olketa plantim lo gud soil. Plant hia hem olsem wei for tinghae and gud soil hem wei for hambol. Samwan wea hambol hem luksavve dat hem needim help lo eniting wea hem duim, and datwan mekem hem for tinghae lo sapot wea hem kasem from others.

  

  Bible principle: “Iufala mas hambol and ting long narawan olsem hem winim iufala. Evritaem tingim olketa narawan and no tingim iufala seleva nomoa.”—Philippi 2:3, 4.

  “Samfala taem lo dinner mifala savve pleim ‘appreciation game.’ Each person tek turn for storyim samting wea hem appreciatim. Datwan helpem evriwan for garem positive tingting and wei for tinghae, winim for garem selfish and negative tingting.”—Tamara.

Tip: Setim gud example. Hem bae moa isi for olketa pikinini garem wei for tinghae if olketa herem iu evritaem talem lo others dat iu tinghae lo olketa, and iu talem lo olketa pikinini blo iu tu.