Why Nao Mi Shud Apologize?

Wat nao bae iu duim lo thrifala situation hia?

1. Teacher blo iu tok strong lo iu bikos iu misbehave during class.

   Hao, iu shud apologize lo teacher blo iu—even if iu ting hem ova react?

2. Fren blo iu faendaot dat iu tok spoelem hem.

   Hao, iu shud apologize lo fren blo iu—even if iu ting wat iu talem hem tru?

3. Iu barava kros lo dadi blo iu and tok bak lo hem.

   Hao, iu shud apologize lo dadi blo iu—even if iu ting hem nao mekem iu kros?

Ansa blo thrifala kwestin hia hem yes. Bat why nao iu shud “sei sorre,” even if iu feel dat hem no fault blo iuseleva nomoa?

• Why nao iu shud apologize?

• Stret wei for “sei sorre”

• Wat olketa nara young wan talem

Why nao iu shud apologize?

• Wei for apologize hem showim dat iu mature. Taem iu acceptim blame for wat iu talem or duim, datwan showim iu developim olketa important quality wea iu bae needim taem iu adult.

  “If iumi hambol and patient, datwan savve helpem iumi for apologize and lisin lo wat datfala person hem talem.”—Rachel, 15 years old.

• Wei for apologize bae helpem iu for stretem problem. Pipol wea “sei sorre” showim dat olketa tingim wei for mek peace hem moa important, instead for pruvim dat olketa seleva nao raet and nara person hem rong.

  “Even if iu ting dat hem no fault blo iu, for mek peace nao shud priority. For ‘sei sorre’ hem smol samting nomoa, bat hem savve mekem iu and datfala person for frens bak.”—Miriam, 19 years old.

• Wei for apologize hem helpem iu for feel gud. If iu regret bikos toktok or akson blo iu hem hurtim feeling blo samwan, datwan hem hevi load for karem. Bat taem iu apologize, datfala burden hem aot nao.a

  “Samfala taem, mi tok raf lo mami or dadi blo mi. Mi feel nogud lo wat mi duim, bat mi faendem hem hard for apologize. Bat gogo taem mi apologize, mi feel gud bikos hem mekem famili for garem peace moa.”—Nia, 20 years old.

  

Hao, for apologize hem hard samting? Yes! Dena, wea 26 years old, wea mas apologize lo mami blo hem staka taem bikos hem rude, hem sei: “Hem no isi for mi ‘sei sorre.’ Mi feel wanfala samting hem pas lo throat blo mi and no eni toktok savve kamaot!”

Stret wei for “sei sorre”

• If possible, apologize feis tu feis. Wei for apologize feis tu feis bae mekem datfala person lukim dat iu really sorre. If iu apologize lo text message, maet datfala person no bilivim iu. Even if iu sendem sad-feis emoji witim datfala message, bae hem feel fake and feel olsem hem no kam from heart.

  Tip: If hem no possible for apologize feis tu feis, iu savve ringim hem or raetem wanfala card for hem. Watever method iu chusim, tingting gud abaotem wat for talem.

  Bible principle: “Heart blo raeteous man hem ting raonem samting firstaem bifor hem ansa.”—Proverbs 15:28.

• Apologize kwiktaem. If iu no kwiktaem for stretem wanfala problem, gogo datwan savve kamap worse and evriting bae awkward between iu and datfala person wea iu mekem hem feel hurt.

  Tip: Garem plan—for example, ‘Bae mi apologize tuday.’ Disaedem wat taem nao hem best taem for apologize, and duim wat iu disaedem.

  Bible principle: “Kwiktaem stretem eni problem.”—Matthew 5:25.

• Apologize from heart. If iu sei “Mi sorre, bat mi no minim why nao iu feel olsem,” datwan hem no wanfala apology! Janelle, wea hem 25 years old, hem sei: “Person wea iu mekem hem feel nogud bae usually respectim iu if hem lukim dat iu acceptim blame for wat iu duim.”

  Tip: No expectim eniting in return for apology blo iu. No talem kaen toktok olsem, “Mi bae apologize for wat mi duim, if iu tu apologize for wat iu duim.”

  Bible principle: “Iumi mas waka hard for olketa samting wea savve mekem iumi stap lo peace witim narawan.”—Romans 14:19.