Hao for Kontrolem Haomas Alcohol Iu Drinkim

Samfala drinkim staka alcohol taem olketa stress, lonely, or boring nomoa. Hao, iu drinkim moa alcohol winim bifor? If olsem, wat nao savve helpem iu for no ova tumas lo wei for drinkim alcohol or depend lo alcohol? Tingim samfala practical information wea savve helpem iu for kontrolem diswan.

• Wat nao shud limit blo iu saed lo alcohol?

• Olketa saen wea showim iu ova tumas lo alcohol

• Faevfala tip for helpem iu kontrolem haomas alcohol nao iu drinkim

Wat nao shud limit blo iu saed lo alcohol?

Wat Bible talem: “No kamap wanfala lo olketa wea savve drinkim staka wine tumas.”—Proverbs 23:20.

Tingim: Bible no stopem wei for drinkim alcohol. (Ecclesiastes 9:7) Bat, hem showim difference between wei for balance saed lo alcohol, wei for ova tumas lo alcohol, and wei for drunk. (Luke 21:34; Ephesus 5:18; Titus 2:3) Nomata if iu no drunk, wei for drinkim tumas alcohol savve affectim hao iu mekem disison, health blo iu, or frenship blo iu witim olketa narawan.—Proverbs 23:29, 30.

Staka organization luksavve lo difference between low-risk and hae-risk drinking, and staka taem olketa story abaotem namba blo standard drink wea samwan savve drinkim each day and haomas day samwan shud drinkim alcohol each week.a Nomata olsem, body blo evriwan no semsem taem olketa drinkim alcohol, and samfala taem best disison hem for no drink nomoa. World Health Organization sei:

“Nomata wanfala alcohol drink or tufala maet hem ova tumas—for example:

• Taem iu draev or iusim machinery.

• Taem iu pregnant or iu susum baby.

• Taem iu drinkim samfala medicine.

• If iu garem eni sik.

• If iu no savve kontrolem haomas alcohol iu drinkim.”

Olketa saen wea showim iu ova tumas lo alcohol

Wat Bible talem: “Iumi mas lukluk gud lo olketa wei blo iumi.”—Lamentations 3:40.

Tingim: Iu savve protectim iuseleva from nogud result blo alcohol if iu evritaem lukluk gud lo haomas alcohol nao iu drinkim and willing for change. Luk for olketa saen hia wea maet showim iu no savve kontrolem haomas alcohol iu drinkim.

• Iu depend lo alcohol for hapi. Iu ting dat for relax, story witim frens, or enjoy, iu needim alcohol. Iu drinkim alcohol for helpem iu deal witim olketa problem blo iu.

• Iu drinkim moa alcohol winim bifor. Iu drinkim alcohol staka taem winim bifor. Percentage blo alcohol lo drink wea iu tekem hem strong winim bifor, and body blo iu no kwiktaem react lo hem olsem bifor.

• Wei wea iu drinkim alcohol hem kosim problem for iu lo haos and lo waka ples. For example, iu spendem selen blo iu lo alcohol gogo iu ran lus.

• Iu mekem olketa disison wea no wise bihaen iu drink alcohol, olsem for draev, swim, or iusim machinery.

• Olketa narawan talem koment abaotem drinking blo iu. Taem olketa duim datwan, iu kros. Iu trae for drink haed from olketa narawan, or laea abaotem haomas alcohol nao iu drinkim.

• Iu laek stop bat hem no isi. Iu trae for katem daon or stop for drinkim alcohol, bat iu no savve duim.

Faevfala tip for helpem iu kontrolem haomas alcohol nao iu drinkim

1. Mekem wanfala plan.

Wat Bible talem: “Olketa plan blo man wea waka hard bae succeed.”—Proverbs 21:5.

Traem diswan: Chusim which day lo week nao bae iu drinkim alcohol. Markem limit blo haomas alcohol nao bae iu drinkim lo olketa day hia. And markem at least tu days each week wea iu bae no drink.

Wanfala organization wea base lo U.K. wea duim awareness abaotem alcohol sei: “Wei for markem taem for brek from alcohol hem best wei for daonem risk for depend lo hem.”

2. Duim samting followim plan blo iu.

Wat Bible talem: ‘Finisim samting wea iu startim.’—2 Corinth 8:11.

Traem diswan: Faendaot wat nao standard size blo alcohol drink mekem iu savve calculatem and kaontem haomas alcohol drink nao fitim iu for tekem. Faendaot which nonalcoholic drink nao iu laekem, and peim and keepim lo haos.

U.S. National Institute on Alcohol Abuse and Alcoholism sei: “Wei for mekem olketa smol change nomoa savve barava katem daon olketa problem wea join witim wei for drinkim alcohol.”

3. Followim disison blo iu.

Wat Bible talem: ‘Sapos iu sei iu bae duim samting, iu mas duim nao. Sapos iu sei iu bae no duim samting, then no duim datwan.’—James 5:12.

Traem diswan: Stanbae for sei No lo kaenfala wei if samwan laek givim iu wanfala alcohol drink wea bae spoelem plan blo iu.

U.S. National Institute on Alcohol Abuse and Alcoholism sei: “Taem iu kwiktaem sei no lo eniwan wea laek givim iu alcohol drink, bae hem isi for iu stap klia lo datwan.”

4. Focus lo olketa benefit blo disison blo iu.

Wat Bible talem: “End blo wanfala samting hem beta winim start blo hem.”—Ecclesiastes 7:8.

Traem diswan: Raetem daon list blo olketa reason why iu laek for kontrolem haomas alcohol bae iu drinkim. List hia shud includim olketa samting olsem for sleep gud, saed lo health, saed lo selen, and frenship. Taem iu storyim disison blo iu witim olketa narawan, no storyim olketa challenge bat storyim olketa benefit.

5. Askem God for help.

Wat Bible talem: “Nomata wanem samting hem kasem mi, paoa wea mi kasem from God nao hem strongim mi for gohed.”—Philippi 4:13.

Traem diswan: If iu wari abaotem wei blo iu for drinkim alcohol, prea lo God for help. Askem hem for givim iu strong and wei for kontrolem seleva.b And spendem taem for studyim practical wisdom insaed Word blo hem, Bible. Witim sapot blo hem, bae iu fit for kontrolem haomas alcohol iu drinkim.