Hao, Enitaem Bae Justice Stap lo World?
Injustice hem samting wea iumi lukim evriwea. Tingim tufala example nomoa from criminal justice system:
Lo January 2018, wanfala judge lo United States releasem wanfala man wea stap lo prison for almost 38 years. DNA evidence showim dat man hia no commitim datfala crime.
Lo September 1994, lo wanfala African kantri olketa putim thrifala young man lo prison, wea disaedem samting followim konsens blo olketa and refuse for joinim army. Kasem September 2020, thrifala stap lo prison for 26 years without olketa chargem thrifala lo eni crime or tekem thrifala lo kot.
If enitaem iu kasem injustice, maet iu feel olsem Job wea Bible storyim, wea sei: “Mi gohed krae for help, bat no eni justice hem stap.” (Job 19:7) Nomata luk olsem tru justice hem samting wea hard tumas for kasem distaem, Bible promisim dat wanfala taem lo future evriwan wea laekem tru justice bae kasem datwan. Nara samting tu, wisdom wea stap insaed Bible savve helpem iu for deal witim injustice distaem.
Wat nao kosim injustice?
Pipol wea rejectim guidance blo God nao kosim injustice. Bible showim dat tru justice kam from God. (Isaiah 51:4) Lo Bible, disfala word “justice” hem klosap garem sem mining olsem “raeteous fasin.” (Psalm 33:5) Wat pipol duim wea raeteous, or wea followim olketa standard blo God, hem result lo justice. Opposite blo datwan hem injustice wea hem kam from sin, wea minim wei for brekem olketa raeteous standard blo God. Tingim olketa example hia:
Selfish. Selfish samting wea man seleva laekem hem join witim sin. (James 1:14, 15) For kasem wat olketa laekem, staka mekius lo olketa narawan and no fair lo hao olketa treatim olketa. Bat God laekem iumi for tingim olketa narawan firstaem.—1 Corinth 10:24.
Ignorance. Samfala maet no fair lo hao olketa treatim narawan without olketa realizem datwan, bat lo tingting blo God diswan hem sin. (Rome 10:3) Biggest injustice wea pipol duim wea winim eni nara samting hem taem olketa executim Jesus Christ, wea datwan happen bikos lo ignorance.—Acts 3:15, 17.
Olketa organization and olketa idea blo pipol wea fail. Saed lo theory, olketa politikol, commercial, and religious organization claimim dat olketa promotim social justice and wei for treatim evriwan fair. Bat reality nao, staka taem olketa organization hia nao source blo olketa nogud samting wea kasem pipol, corruption, prejudice, greedy, riches wea no divaed equal lo evriwan, and wei for no acceptim narawan—wea evriting hia savve kosim injustice. Samfala pipol wea insaed lo olketa organization hia laek for helpem narawan. Bat tru samting nao, eniting wea olketa man trae for duim bat olketa ignorem guidance blo God bae no savve succeed.—Ecclesiastes 8:9; Jeremiah 10:23.
Hao, God lukim tu injustice wea gohed?
Yes, hem heitim injustice and attitude and akson blo pipol wea kosim diswan. (Proverbs 6:16-18) Hem iusim profet Isaiah for sei: “Mi, Jehovah,a mi laekem justice. Mi heitim wei for steal and olketa samting wea no stret.”—Isaiah 61:8.
Law wea God givim olketa Israelite bifor showim hem laekem pipol for duim samting followim justice. Hem komandim olketa judge blo olketa Israelite for rejectim bribe or eni samting wea savve mekem pipol no kasem justice. (Deuteronomy 16:18-20) Hem judgem olketa Israelite wea disobeyim hem from olketa mekius lo pipol wea poor and man nating, and endap hem rejectim olketa bikos olketa fail for followim olketa standard blo hem.—Isaiah 10:1-3.
Hao, bae God finisim injustice?
Yes. Thru lo Jesus Christ, God bae finisim sin wea hem nao main kos blo injustice, and bae hem mekem olketa man for kamap perfect moa. (John 1:29; Rome 6:23) Hem setimap wanfala Kingdom tu wea bae mekem wanfala raeteous niu world kamap and provaedem justice for evriwan. (Isaiah 32:1; 2 Peter 3:13) For lanem moa samting abaotem datfala Kingdom lo heven, watchim video Wanem Nao Kingdom Bilong God?
Wat kaen laef nao bae pipol garem lo datfala raeteous niu world?
Taem justice stap evriwea lo earth, result blo datwan hem peace and security for evriwan. (Isaiah 32:16-18) Lo tingting blo God, laef blo evriwan hem garem value, so evriwan bae kasem justice. Sorre, krae, and pain wea injustice kosim bae finis for olowe, and even olketa painful memory blo injustice bae isisi finis tu. (Isaiah 65:17; Revelation 21:3, 4) For moa information, lukim article “Wanem Nao Kingdom blo God Bae Duim?”
Hao, promis blo God for world wea no eni injustice stap bae hem really kamap tru?
Yes. Bible garem record blo olketa profesi wea kamap tru, information abaotem history and science wea accurate, and evri buk lo Bible wea agree witim each other—olketa samting hia showim dat iu savve trustim olketa promis wea Bible storyim. Olketa article hia storyim moa information:
Hao, iumi shud faet againstim injustice distaem?
Lo taem blo Bible, gud pipol duim wat olketa fit for duim for deal witim injustice. For example, pipol laek tekem aposol Paul lo kot lo olketa false charges wea savve lead go for olketa killim hem dae. Hem no just acceptim injustice hia bat hem iusim law wea available mekem hem savve appeal lo Caesar.—Acts 25:8-12.
Bat, eni samting wea olketa man duim for stretem injustice lo disfala world bae hem no succeed. (Ecclesiastes 1:15) Nomata olsem, staka pipol faendem dat wei for garem faith lo olketa promis blo God for wanfala raeteous niu world hem helpem olketa for winim nogud feeling wea olketa kasem from injustice and for garem peace lo mind.
a Jehovah hem nem blo God wea Bible storyim.—Psalm 83:18.