Hao for Deal Witim Pandemic Fatigue

Hao, iu fraet lo COVID-19 and gogo datwan mekem iu start for taed? Ino iu nomoa feel olsem. For staka months, pipol evriwea lo world havtu adapt lo situation blo datfala pandemic. Dr. Hans Kluge, Regional Director for Europe blo World Health Organization, sei: “Staka pipol mekem olketa big change lo laef blo olketa for no spredim COVID-19 . . . Taem kaen samting olsem happen, hem isi and natural for samwan hem no warim nomoa, no motivated for duim samting, and for experiencem fatigue.”

If iu start for experiencem wat olketa kolem lo pandemic fatigue, no discourage. Bible hem helpem staka for deal witim olketa challenge wea olketa kasem during disfala hard taem. Bible savve helpem iu tu.

Wat nao pandemic fatigue?

Pandemic fatigue hem no wanfala sik bat hem toktok wea olketa iusim for describem natural feeling wea pipol garem bikos pandemic hia wea gohed for longtaem hem mekem olketa no sure lo wat bae happen and hem affectim tumas laef blo olketa. Hao each person react hem difren, bat samfala saen blo pandemic fatigue wea staka garem hem:

No motivated for duim samting
Change saed lo kaikai and sleep
Kros kwiktaem
Stress ovarem olketa waka wea man bin getius for duim
No savve concentrate
Feel hopeles

Why nao pandemic fatigue hem serious samting?

Pandemic fatigue hem serious samting wea savve affectim safety blo iumi and blo olketa narawan. If iumi no careful, isisi bae iumi start for lusim motivation for followim olketa COVID-safety practice. Gogo, maet iumi start for ting smol lo datfala virus, nomata hem gohed spred and killim dae pipol. From iumi taed for stap anda lo olketa restriction, maet iumi duim olketa samting wea iumi shud no duim, and datwan putim laef blo iumi and olketa narawan lo danger.

During lo olketa stressful taem olsem, staka experiencem wat disfala verse lo Bible hem talem: “Sapos iu discourage lo day blo trabol, bae iu no garem inaf strong.” (Proverbs 24:10) Bible storyim olketa principle wea savve helpem iumi for deal witim olketa discouraging situation olsem, includim disfala pandemic.

Wat nao olketa Bible principle wea savve helpem iu for deal witim pandemic fatigue?

Keepim physical distance—bat still socialize

Wat Bible talem: “Wanfala tru fren . . . hem kamap wanfala brata blo iu lo taem blo trabol.”—Proverbs 17:17.

Why datwan hem important: Olketa tru fren encouragem and strongim iumi. (1 Thessalonians 5:11) Bat, if iumi isolatem iumiseleva for longtaem datwan savve affectim health blo iumi.—Proverbs 18:1.

Traem diswan: Gohed spendem taem witim frens blo iu thru lo olketa video chat, phone kol, or e-mail and text message. Reach aot lo olketa frens blo iu taem day blo iu hem no mas gud, and evritaem chekim olketa for faendaot hao nao olketa. Sharem olketa idea wea helpem iu for deal witim pandemic. Faendem olketa naes tings for duim for frens blo iu, and datwan bae mekem iu hapi nomata day blo iu no mas gud.

Wat samfala talem

“Mi trae for garem plan for duim videoconferencing witim olketa frens. Samtaems mi and wanfala fren nomoa savve catch ap. And lo olketa narataem, hem naes for mekem arrangement for grup pleim game tugeta or just for catch ap. Nomata hem no semsem witim wei for meet in person, hem really helpem mi. Pandemic hem mekem laef no isi, so hem important for iumi story witim olketa frens blo iumi and honest abaotem hao iumi feel. Hem no isi for duim datwan, bat iumi evriwan needim help.”—Megan, Canada.

“Mifala missim famili and frens blo mifala, bat mifala faendem olketa difren wei for talem olketa dat mifala lovem olketa. Famili blo mifala mekem olketa card and olketa smol present and putim insaed gift bag for olketa frens blo mifala and raetem wanfala encouraging Bible verse for letem olketa savve dat mifala tingim olketa. Diswan mekem mifala barava hapi tumas! For iusim taem for duim samting for olketa narawan hem helpem mifala for no wari tumas.”—Emma and hasband blo hem, Nathan, and tufala pikinini blo tufala, Eli and Hope, United States.

Duim best for deal witim situation wea iu feisim distaem

Wat Bible talem: ‘Iusim gud taem bilong iu.’—Ephesians 5:16.

Why datwan hem important: Wei for iusim gud taem blo iu savve helpem iu for positive and avoidim wei for wari tumas.—Luke 12:25.

Traem diswan: Instead for focus lo wat iu no savve duim distaem, tingim wat iu fit for duim. For example, hao, samfala project or samfala hobby stap wea iu savve duim distaem bikos iu garem taem? Hao, iu savve spendem moa taem witim famili blo iu?

Wat samfala talem

“Mifala garem chance for duim olketa nara project raonem haos, olsem for plantim olketa vegetable and herb, and duim olketa art project and decoratem haos.”—Evan witim waef blo hem, Samantha, and tufala pikinini blo tufala, Eli and Adam, South Africa.

“Mi and waef blo mi spendem staka taem tugeta winim eni narataem insaed 30 year wea mitufala marit. Hem strongim love blo mitufala for each other, bikos mitufala understandim gud olketa weakness and strength blo each other winim enitaem bifor. Distaem bae mitufala able for sapotim gud each other lo eni hard taem wea kamap lo future.”—Ivan witim waef blo hem, Eve, Italy.

Followim wanfala routine

Wat Bible taem: “Duim evri samting long wei wea . . . no olobaot.”—1 Corinth 14:40.

Why datwan hem important: Staka pipol savve hapi and feel gud if olketa garem wanfala routine for followim.

Traem diswan: Mekem wanfala schedule wea fitim situation wea iu feisim distaem. Markem specific taem for duim skulwaka, secular waka, and olketa waka lo haos and tu olketa samting wea bae strongim frenship blo iu witim God. Includim tu olketa healthy activity, olsem for spendem taem witim famili, go wakabaot, and exercise. Samfala taem hem gud for reviewim schedule blo iu, and mekem change if need kamap.

Wat samfala talem

“Mi followim nomoa sem routine wea mi garem bifor lo pandemic. Mi replacem samfala normal activities wea mi savve duim witim exercise, bat mi still wekap lo semtaem evri morning. Routine blo mi helpem mi for no tingim tumas pandemic and hem helpem mi for concentrate lo famili and frens blo mi.”—Kgaogelo, South Africa.

“Mi wekap and mekem breakfast and coffee blo mi evri morning. Then mi dressap and redi olsem bae mi go aot. Datwan helpem mi for feel hapi lo miseleva and alert lo full day.”—Carmel, France.

Change followim olketa season

Wat Bible talem: “Wise man hem lukim danger and hem haed from datwan.”—Proverbs 22:3.

Why datwan hem important: Depend lo wea iu live, taem olketa season change maet iu no garem staka chance for go wakabaot aotsaed and for go aot lo sun, wea hem important for physical and mental health blo iu.

Traem diswan: If hem klosap winter season, trae for muvim furniture insaed living rum or area wea iu waka mekem sun savve shaen kam for kasem iu. Planim olketa outdoor activity wea iu bae fit for duim nomata weather hem cold. If possible, peim olketa winter kaleko wea bae mekem iu spendem moa taem aotsaed.

If hem klosap summer season, pipol bae spendem moa taem aotsaed, so followim olketa gaedlaen saed lo safety. Planim wea iu bae go, and chusim taem wea no staka pipol bae lo there.

Wat samfala talem

“Mi stay lo ples wea hem savve rain olowe, so mi garem wanfala flexible routine. Taem mi lukim sun hem shaen, goal blo mi hem for kwiktaem go aotsaed. Nomata mi wakabaot or raedem baesikol for lelebet taem nomoa lo sun, datwan barava helpem mi.”—Sameena, France.

“Summer season hem isi for deal witim bikos staka samting nao iu savve duim aotsaed, bat taem hem klosap for winter season, mi mekem list blo olketa project wea mi laek for duim lo haos.”—Tiffany, Canada.

Continue for practicem COVID-safety behavior

Wat Bible talem: “Stupid man hem nating kea and hem trustim hemseleva.”—Proverbs 14:16.

Why datwan hem important: COVID-19 hem virus wea savve killim man dae, and if iumi no careful datfala virus savve spred.

Traem diswan: Evritaem chekim olketa gaedlaen lo ples wea iu stap for lukim if iu still followim. Ting abaotem hao akson blo iu bae affectim iu, famili blo iu, and olketa narawan.

Wat samfala talem

“Mi duim wat mi fit for duim for no spredim virus hia. Nomata olketa narawan ignorem olketa regulations, mi focus lo wat mi savve duim for mekem mi and famili stap sef.”—Daryn, South Africa.

Strongim relationship blo iu witim God

Wat Bible talem: ‘Fren gud witim God and bae hem fren gud witim iu.’—James 4:8.

Why datwan hem important: God savve helpem iu for deal witim eni challenge.—Isaiah 41:13.

Traem diswan: Readim Bible, Word blo God, each day. Disfala Bible-reading plan savve helpem iu for startim datwan.

Hao if iu contactim Olketa Jehovah’s Witness for lukim hao iu savve benefit from arrangement blo olketa for continue holem olketa meeting blo olketa during lo COVID-19 pandemic? For example, evriwea lo world olketa iusim videoconferencing for holem olketa kongregeson meeting, annual Memorial blo dae blo Jesus, and annual convention blo olketa.

Olketa Bible verse wea savve helpem iu for deal witim pandemic fatigue

Isaiah 30:15: “Sapos mind blo iufala hem kwaet and showim dat iufala trustim mi, bae iufala strong.”

Mining: Wei for trustim advaes blo God savve helpem iumi for no wari tumas during olketa hard taem.

Proverbs 15:15: “Full laef blo man wea safa hem nogud nomoa, bat man wea heart blo hem hapi hem hapi evriday.”

Mining: For focus lo olketa positive samting savve helpem iumi for hapi even during olketa hard taem.

Proverbs 14:15: “Man wea no garem experience hem bilivim evri toktok, bat man wea wise ting raonem each step blo hem.”

Mining: Followim olketa health precaution, and no kwiktaem for tingse olketa restriction olsem hem unnecessary.

Isaiah 33:24: “No eniwan wea stap lo there bae sei: ‘Mi sik.’”

Meaning: God promis for finisim evri difren kaen sik.