Hao Bible Savve Helpem Olketa Man wea Deal Witim Anxiety
Taem iu tingim samwan wea deal witim anxiety,a maet iu tingim samwan wea fraet gogo hem no savve duim eniting, wea hem no laek getap from bed, or samwan wea storyim tumas olketa wari blo hem nomoa.
Samfala pipol react lo olketa wei olsem taem olketa deal witim anxiety. Bat pipol wea duim research faendem dat olketa narawan—especially olketa man—maet react lo difren wei. Wanfala report sei dat olketa man “staka taem iusim alcohol and drugs for cope witim anxiety, so hem luk olsem olketa garem drinking problem bat real problem nao hem anxiety disorder. And nara samting wea maet showim man hem garem anxiety, hem savve kros staka taem and kwiktaem feel nogud.”
Bat evri man no react lo sem wei. Nomata wat nao reaction blo samwan, anxiety hem wanfala big problem distaem lo ‘olketa last day wea hem barava difren and evri samting hem hard tumas.’ (2 Timothy 3:1) So if iu deal witim anxiety, hao nao Bible savve helpem iu?
Practical Bible Advaes lo Hao for Deal Witim Anxiety
Bible garem staka gud advaes wea savve helpem iumi taem iumi wari. Tingim thrifala example.
1. “No warim samting wea bae happen tumoro, leavim go datwan for tumoro nao, bikos evri day bae olketa problem kamap. Tingim nomoa olketa problem wea iufala kasem tuday.”—Matthew 6:34.
Mining: Hem wise for iumi no wari tumas abaotem wat nao maet happen (or no happen) lo future. Staka taem, tings happen no followim hao iumi fearim bae hem happen. Lo samfala situation, maet iumi no expectim bat things change and kamap beta.
Traem disfala idea: Tingim olketa tings wea happen lo past wea iu barava sure dat samting bad bae hem happen—bat endap hem no happen olsem. Then ting raonem wat iu warim distaem, and traem best for lukim reality blo datwan if bae hem kamap big problem or nomoa.
2. “Olsem iron savve sharpenem iron, wanfala man savve sharpenem fren blo hem.”—Proverbs 27:17.
Mining: Olketa narawan savve helpem iumi for deal witim anxiety blo iumi—if iumi letem olketa for help. Maet olketa fit for storyim lo iumi samfala practical idea base lo own experience blo olketa. Wan samting olketa savve duim, hem for storyim tingting blo olketa abaotem datfala situation.
Traem disfala idea: Tingim samwan wea savve givim gud advaes, olsem wanfala fren wea hem deal witim problem wea semsem witim wat iu feisim. Askem hem wat nao helpem hem or wat nao mekem datfala problem hem worse.
3. “Putim evri wari bilong iufala long hand bilong hem bikos hem tingim iufala.”—1 Peter 5:7.
Mining: God hem barava tingim olketa wea safa. Hem invaetem iumi for prea lo hem abaotem eni samting wea mekem iumi for wari.
Traem disfala idea: Raetem list blo olketa samting wea kosim datfala anxiety. Then prea lo God abaotem olketa samting hia, and explainim each problem lo hem and askem hem for helpem iu deal witim datwan.
Taem wea Anxiety Bae Nomoa
Bible no storyim nomoa advaes abaotem hao for deal witim anxiety. Hem storyim promis abaotem wanfala taem lo future wea evri wari wea iumi kasem distaem bae hem finis forever. Hao nao bae datwan happen?
Kingdom blo God bae finisim evriting wea mekem anxiety for kamap. (Revelation 21:4) Tru samting nao, anda lo rulership blo datfala Kingdom, even olketa memory blo anxiety and stress bae no kamap moa lo mind blo iumi.—Isaiah 65:17.
Diswan nao future wea “God wea givim peace” hem laekem iu for garem. (Rome 16:20) Hem assurem iumi olsem: “Mi savve finis lo wanem mi laekem for iufala, . . . mi laek for givim iufala peace, and no trabol, for givim iufala gudfala future and hope.”—Jeremiah 29:11.