Hao for Kontrolem Wari
Wei for wari tumas savve spoelem physical and emotional saed blo iu. Hem maet lead go lo olketa big problem wea winim problem wea iu wari abaotem firstaem.
Olketa tip for daonem wari
Limitim haomas nogud nius nao iu kasem. Iu no need for savve lo evri detail abaotem wanfala crisis. Wei for ova tumas for herem olketa nogud report bae mekem iu feel fraet go moa and hopeless.
Bible principle: “Tingting wea wikdaon hem finisim strong blo man.”—Proverbs 17:22.
“Hem isi for addict for lukim information lo internet abaotem eni breaking nius or big samting wea happen, bat datwan savve spoelem man. Wari blo mi hem barava katdaon taem mi limitim haomas nius nao mi kasem.”—John.
Tingim diswan: Haomas taem nao iu need for herem latest update lo nius?
Followim routine. Trae for wekap, kaikai, duim olketa waka lo haos, and sleep lo sem taem each day. If iu duim olketa samting hia followim routine, laef blo iu bae feel normal and datwan bae help for katem daon wari blo iu.
Bible principle: “Olketa plan blo man wea waka hard bae succeed.”—Proverbs 21:5.
“Taem COVID-19 pandemic start, mi no followim routine blo mi and datwan mekem mi spendem tumas taem lo entertainment. Mi laek for iusim gud taem blo mi, so mi mekem wanfala schedule for duim olketa responsibility blo mi each day.”—Joseph.
Tingim diswan: Hao, iu garem routine wea helpem iu for feel olsem iu accomplishim samting lo end blo each day?
Focus lo positive samting. If iu evritaem garem kaen tingting hao if samting olsem happen and iu imaginim worst samting wea maet happen, datwan bae mekem iu wari go moa. Bat, trae tingim tu or thrifala blessing wea iu kasem.
Bible principle: “Showimaot iufala thankiu long God.”—Colossae 3:15.
“Wei for readim Bible helpem mi for avoidim negative information and helpem mi for focus lo positive samting. Maet datwan here simpol tumas, bat hem waka!”—Lisa.
Tingim diswan: Hao, hem wei blo iu for tingim nomoa olketa negative samting wea happen lo laef blo iu and ignorem olketa positive samting?
Tingim olketa narawan. Winim wei for isolatem iuseleva—wea hem nao isi samting for duim if iu wari tumas—tingim hao iu savve helpem olketa narawan wea needim help.
Bible principle: “Evritaem tingim olketa narawan and no tingim iufala seleva nomoa.”—Philippi 2:4.
“Mi hapi taem mi duim samting for helpem olketa narawan. Mi duim samting wea bae mekem olketa feel gud and lo semtaem datwan katem daon wari blo mi. Tru samting nao, mi no garem eni taem for wari.”—Maria.
Tingim diswan: Hu nao iu savve wea maet needim extra help, and wat nao iu savve duim for helpem olketa?
Stay healthy. Exercise gud and kasem inaf rest. Kaikaim healthy kaikai. Wei for lukaftarem physical health blo iu savve impruvim hao iu ting lo laef and helpem iu for katem daon wari.
Bible principle: “Physical exercise hem helpem man.”—1 Timothy 4:8, footnote.
“Mi and 16 year old son blo mi laek exercise aotsaed bat mitufala no fit for duim, so mitufala duim indoor exercise olsem part lo routine blo mitufala lo haos. Diswan mekem mitufala hapi and helpem mitufala for kaen and patient witim each other.”—Catherine.
Tingim diswan: Hao, iu need for impruvim diet blo iu and exercise routine blo iu mekem iu healthy?
Nara samting wea pipol duim tu for katem daon wari hem for lane abaotem olketa promis lo Bible abaotem gudfala future. Lukim article “Wat Nao Kingdom blo God Bae Accomplishim?”