Wat Nao Bible Sei Abaotem Global Wata Crisis?
Iumi evriwan needim klin wata mekem iumi gohed laef. Nomata olsem, UN Secretary-General, António Guterres hem talem disfala warning: “Demand for wata evriwea lo world hem continue for increase, so iumi feisim wanfala big wata crisis.” Staka billion pipol lo world faendem hem no isi for olketa garem klin drinking wata.
Strdel/AFP via Getty Images
Hao, enitaem bae iumi garem inaf wata for evriwan? Or hao, bae iumi olowe havtu deal witim wata crisis? Wat nao Bible talem?
Wat Bible promisim abaotem wata supply
Bible storyim dat wantaem lo future wei for short lo wata bae hem finis. Lo datfala taem, bae staka klin and fresh wata hem stap.
“Olketa wata bae bosta kamaot lo wilderness, and olketa stream bae ran lo flat desert. Graon wea hot and drae, bae kamap pool wata wea olketa grass grow lo hem, and olketa springwata bae kamaot from graon wea drae fogud.”—Isaiah 35:6, 7.
Why nao iumi savve bilivim datfala Bible promis? Tingim wat Bible storyim abaotem wanfala detail lo hao God hem designim planet blo iumi.
Wat Bible sei abaotem earth and wata cycle blo hem
“[God] creatim earth no for stap nating, bat hem wakem for pipol stap lo hem.”—Isaiah 45:18.
Bikos God mekem earth for sapotim evriting wea laef insaed, hem designim olketa natural system for producem staka fresh wata.
“God pullim go ap olketa drop blo wata. And wata hia change for kamap cloud wea garem rain. Then olketa cloud pourim kam rain hia. And rain pour kam daon antap olketa man.”—Job 36:27, 28.
Disfala scripture hem describem hao God designim wanfala natural and reliable wata cycle and supply system. Wata evaporate from land and sea, hem condense for kamap cloud, and foldaon olsem rain, wea diswan continue for provaedem klin and fresh wata for olketa human and olketa animal.—Ecclesiastes 1:7; Amos 5:8.
“Mi bae mekem hem rain lo stret taem blo hem, and datfala land bae garem staka kaikai, and olketa tree lo datfala land bae garem frut.”—Leviticus 26:4.
God promisim lo olketa Israelite bifor dat bae hem blessim olketa, wea olketa agriculture pipol, witim gudfala harvest from hem bae continue for supplyim wata for olketa. Hem savve dat for kaikai hem grow and garem gud harvest, hem mas rain lo stret season blo hem.
Wat God duim for nation blo Israel bifor bae klosap hem duim for full earth. (Isaiah 30:23) Bat lo distaem, wata crisis hem increase lo staka ples lo world, and wei for no garem inaf rain hem smol part nomoa lo problem hia. Wat moa eniting wea Bible storyim abaotem solution for wata problem distaem?
Hao wata crisis bae hem end
Bible showim dat God, bae iusim Kingdom blo hem, for solvem evri problem wea affectim planet blo iumi, includim tu problem saed lo wata distaem. (Matthew 6:9, 10) Kingdom blo God hem wanfala gavman lo heven wea bae rul ovarem full earth. (Daniel 2:44; Revelation 11:15) And, Kingdom blo God bae duim wat olketa human gavman no savve duim—hem bae finisim kos blo wata problem.
Problem: Climate change hem wanfala serious problem wea contribute for mekem wata cycle no balance. Result blo datwan nao hem olketa big drought and flood, wea happen bikos lo bigfala rain or rising sea level.
Solution: Kingdom blo God bae restorem natural balance blo environment so dat planet blo iumi savve recover. God hem promis olsem: “Mi wakem evri niu samting.” (Revelation 21:5) Olketa land wea drae bae garem staka fresh wata, mekem olketa samting savve grow tu lo ples wea distaem no eniting hem grow. (Isaiah 41:17-20) Kingdom blo God, wea Jesus Christ hem ruler, bae kontrolem tu olketa natural force blo earth.
Taem Jesus lo earth, hem tok strong lo wanfala big wind and hem kwaet nao, wea diswan hem smol example lo paoa wea God givim hem. (Mark 4:39, 41) Anda lo rul blo Christ wea King lo Kingdom blo God, olketa natural disaster bae finis. Pipol bae enjoyim tru peace and security, and no fearem olketa difren kaen disaster.
Problem: Olketa human wea no kea lo wat olketa duim and olketa greedy company pollutim olketa river, lake, and anda graon reservoir, wea diswan hem contribute tu lo shortage blo klin wata.
Solution: God bae klinim disfala earth and restorem damage wea pipol kosim lo olketa river, lake, sea, and soil. Disfala earth bae hem kamap wanfala paradaes. Bible hem sei: “Wilderness and land wea drae bae hapi, and flat desert bae hapi fogud and fulap lo olketa flaoa.”—Isaiah 35:1.
Wat nao future blo pipol wea nating kea for environment or for others? God hem promis for “finisim olketa wea spoelem earth.”—Revelation 11:18; Proverbs 2:21, 22.
Problem: Pipol misiusim olketa wata resources, and result blo datwan, staka wata hem weist winim wat earth savve producem.
Solution: Kingdom blo God, wea duim will blo God—and no will blo olketa human wea selfish—bae “duim samting. . . long earth.” (Matthew 6:9, 10) Pipol wea stap anda lo Kingdom blo God bae kasem best education. Isaiah 11:9 sei: “Earth bae barava fulap lo knowledge abaotem Jehovah.”a Taem pipol kasem datfala knowledge from God, and bikos olketa garem deep love for God and creation blo hem, evri man bae barava lukaftarem gud beautiful planet blo iumi and olketa natural resources blo hem.
For savve lo wat nao olketa nara samting wea Kingdom blo God bae duim, lukim article “Wanem Nao Kingdom blo God Bae Duim?”
Go lo Bible buk Isaiah, lo chapter 35, and readim hao earth bae change for kamap wanfala paradaes.
Watchim video Why Nao God Wakem Earth? for lanem moa samting abaotem purpose blo God for earth and olketa man.
a Jehovah hem nem blo God. (Psalm 83:18) Lukim article “Hu Nao Jehovah?”