Hao Nao Olketa Jehovah’s Witness Iusim Olketa Donation?
Mifala iusim olketa donation for sapotim waka wea organization blo mifala duim for teachim Bible lo pipol and for givim help lo taem blo disaster. Evri waka hia join witim main goal blo mifala, wea hem nao for helpem pipol kamap olketa disaepol blo Christ Jesus.—Matthew 28:19, 20.
No enitaem mifala iusim olketa donation for helpem samwan kamap rich. Olketa elder or olketa wea lead lo organization no kasem pei, and Olketa Jehovah’s Witness no kasem pei for preaching waka wea olketa duim. Olketa wea waka lo olketa branch office, and lo world hedquarter blo mifala, witim tu olketa lo Governing Body, evriwan hem member blo wanfala religious order and olketa no kasem pei.
Samfala Example lo Waka wea Mifala Duim
Pablisim: Mifala transleitim, printim, sendem lo ship, and givimaot staka million Bible and olketa nara Bible pablikeson, and evri pablikeson hia hem free nomoa. And tu, pipol savve kasem olketa pablikeson hia lo jw.org website and JW Library app, and olketa free nomoa and no eni advertisement.
Construction and Maintenance: Mifala buildim and lukaftarem olketa simpol ples for worship evriwea lo world mekem olketa kongregeson blo mifala garem gudfala ples for hipap tugeta for praisem God. Mifala duim sem samting for olketa branch office and olketa translation office tu. Staka taem olketa volunteer nao duim disfala waka, so hem no expensive tumas for buildim and lukaftarem olketa ples hia.
Administration: Olketa donation for waka wea mifala duim raonem world, sapotim tu waka wea gohed lo world hedquarter, olketa branch office, olketa translation office, and waka wea olketa traveling overseer duim.
Preaching Waka: Olketa Jehovah’s Witness no kasem pei for preaching waka blo olketa or waka wea olketa duim for teachim “toktok bilong God” lo pipol. (2 Corinth 2:17) Nomata olsem, samfala wea kasem assignment and training for duim preaching waka full-taem bae kasem lelebet sapot for peim ples for stap and olketa main samting olketa bae needim. Olketa Christian lo first-century tu duim sem kaen samting.—Philippi 4:16, 17; 1 Timothy 5:17, 18.
Teaching Waka: Olketa donation sapotim olketa assembly and convention blo mifala. Mifala savve wakem olketa audio and video program wea teachim pipol abaotem Bible. And tu, mifala garem olketa skul for trainim olketa elder and olketa wea duim full-taem ministry, for helpem olketa duim gud assignment blo olketa.
Disaster Relief Waka: Mifala provaedem kaikai, wata, and wakem olketa ples for stap for olketa wea kasem disaster. Disfala waka helpem “olketa wea garem sem biliv” olsem mifala, and tu hem helpem olketa wea no Witness.—Galatia 6:10.