Olketa Jehovah’s Witness Kasem Wat Kaen Training for Ministry blo Olketa?

Olketa Jehovah’s Witness continue for kasem training lo evriting lo laef blo olketa olsem Christian, wea includim tu pablik ministry wea each wan duim. Disfala ministry nao hem waka wea Jesus komandim olketa follower blo hem for duim—for preachim and teachim gud nius abaotem Kingdom blo God. (Matthew 24:14; 28:19, 20) Mifala kasem training lo olketa weekly meeting, olketa annual convention and assembly. Olketa Jehovah’s Witness wea garem olketa responsibility lo kongregeson or lo organization kasem moa training lo olketa Bible skul for duim olketa responsibility hia.

Lo disfala article

• Wat kaen training nao Olketa Jehovah’s Witness kasem?

• Olketa Bible skul for Olketa Jehovah’s Witness

• Training wea Olketa Witness kasem hem base lo wanem?

• Hao, Olketa Jehovah’s Witness mas pei for kasem training blo olketa?

• Hao nao Olketa Jehovah’s Witness benefit from training wea olketa kasem?

Wat kaen training nao Olketa Jehovah’s Witness kasem?

Olketa kongregeson meeting. Evri week, mifala attendim tufala meeting lo olketa ples blo mifala for worship wea mifala kolem lo Kingdom Hall. Wanfala meeting kamap lo midweek and narawan lo weekend. Tufala meeting hia, eniwan lo pablik welkam for attendim and mifala no askem eni kolekson.

• Midweek meeting. Mifala kasem instruction lo hao for impruvim reading, hao for story gud witim pipol, pablik speaking, preaching, and teaching. Mifala kasem training hia thru lo olketa tok, discussion, demonstration, and video presentation. Disfala training helpem mifala for impruv lo hao for storyim Bible message lo pipol and conductim olketa personal Bible study witim olketa wea interest for duim datwan. Evriwan wea attendim olketa meeting benefit from training hia. Important samting nao, olketa meeting blo mifala strongim faith blo mifala lo God, love blo mifala for hem and for narawan lo kongregeson.

• Weekend meeting. Disfala meeting wea garem tufala part start witim wanfala Bible tok wea hem design for pablik. Second part lo meeting hem kwestin and ansa discussion lo article wea mifala pablisim lo study edition blo Wastaoaa magasin. Olketa article hia discussim and explainim olketa Bible topic and olketa principle wea helpem mifala lo ministry and personal laef blo mifala.

Olketa assembly and convention. Evri year mifala holem thrifala big gathering, and staka kongregeson nao savve attend. Olketa gathering hia focus lo wanfala theme wea base lo Bible and wea includim olketa tok, skit, interview, and video. Semsem witim olketa kongregeson meeting blo mifala, olketa assembly and convention helpem mifala for kasem moa knowledge abaotem Bible and helpem mifala for impruv olsem olketa minister blo gud nius. And once again, pablik welkam for attendim olketa convention and assembly hia, and mifala no askem eni kolekson.

Olketa Bible skul for Olketa Jehovah’s Witness

For moa advance training, samfala Jehovah’s Witness kasem invitation for attendim olketa difren Bible skul. Wat nao olketa skul hia? Wat nao purpose blo olketa and olketa skul for hao long? And hu nao savve enrol?

Pioneer Service Skul

• Purpose: For trainim olketa full-taem minister, wea mifala kolem lo pioneer,b for impruv lo waka for preach and teach. Olketa bae duim classrum discussion, olketa skit, olketa tok, and olketa workshop.

• Hao long: Six days.

• Enrol: Olketa wea completim first year blo olketa olsem pioneer kasem invitation for attend. Olketa wea pioneer longtaem wea no attend for winim faev years finis maet kasem invitation for attend moa.

Skul for Olketa Kingdom Evangelizer

• Purpose: For givim specialize training lo olketa full-taem minister wea garem experience. Olketa student lane for impruvim skills blo olketa saed lo preaching and teaching, and olketa duim deep study lo olketa Bible topic. Staka wea graduate from skul hia kasem invitation for go lo olketa ples wea needim moa evangelizer.

• Hao long: Tu months.

• Enrol: Olketa pioneer savve apply for attend if olketa kasem olketa requirement and situation blo olketa mekem olketa fit for serve lo ples wea garem need.

Skul for Olketa Kongregeson Elder

• Purpose: For helpem olketa elderc lukaftarem olketa responsibility blo olketa insaed kongregeson, olsem waka for teach and duim shepherding, and for strongim love blo olketa for God and olketa narawan insaed kongregeson.—1 Peter 5:2, 3.

• Hao long: Faev days.

• Enrol: Olketa wea just kasem appointment olsem elder and olketa experience elder tu wea no attend for winim faev years finis kasem invitation for attend.

Skul for Olketa Circuit Overseer and Waef

• Purpose: For trainim olketa traveling minister, wea mifala kolem lo olketa circuit overseer,d for impruv lo olketa responsibility blo olketa. (1 Timothy 5:17) Curriculum blo skul hia helpem tu olketa Christian elder hia and waef for kasem moa knowledge insaed lo olketa Scripture.

• Hao long: Wan month.

• Enrol: Olketa niu circuit overseer and waef kasem invitation for attendim bihaen wan year wea olketa duim assignment blo olketa. Then, bihaen evri faev years, olketa kasem moa invitation for attend.

Kingdom Ministry Skul

• Purpose: For helpem olketa elder and ministerial servante lukaftarem olketa kongregeson responsibility fitim olketa situation, wei blo pipol, and need wea kamap distaem. (2 Timothy 3:1) Skul hem kamap evri tu-thri years.

• Hao long: Hem depend, staka taem hem wan day.

• Enrol: Olketa circuit overseer, elder, and ministerial servant.

Bethel Service Skul

• Purpose: For helpem olketa Bethelf member for succeed lo waka blo olketa and strongim love blo olketa for God and for each other.

• Hao long: Faev and a haf days.

• Enrol: Olketa niu member lo Bethel mas attend. Olketa member wea serve longtaem wea no attendim skul hia insaed faev years savve attend moa.

Watchtower Bible Skul blo Gilead

• Purpose: For helpem olketa student appreciatim go moa Word blo God and for helpem olketa applyim wat olketa lanem. (1 Thessalonica 2:13) Olketa faithful Christian man and woman wea attendim Gilead olketa big asset lo organization blo Jehovah and Bible education waka raonem world. Olketa wea graduate maet kasem assignment lo field or lo wanfala branch office, maet lo hom kantri blo olketa or lo nara kantri.

• Hao long: Faev months.

• Enrol: Olketa branch office invaetem samfala full-taem minister for apply. Skul hia hem kamap lo United States lo Watchtower Educational Center lo Patterson, New York.

Skul for Olketa Branch Komiti Member and Waef

• Purpose: For trainim olketa Branch Komitig member for lukaftarem waka and olketa spiritual activity blo Olketa Jehovah’s Witness lo kantri wea olketa stap or olketa kantri wea branch office blo olketa lukaftarem.

• Hao long: Tu months.

• Enrol: World Hedquarter blo Olketa Jehovah’s Witness invaetem samfala Branch Komiti member and waef blo olketa for attendim datfala skul, wea kamap lo Watchtower Educational Center lo Patterson, New York.

Training wea Olketa Witness kasem hem base lo wanem?

Bible nao main textbuk wea training wea Olketa Jehovah’s Witness kasem hem base lo hem. Mifala bilivim dat Bible hem kam from God and hem garem barava best instruction for evriting lo laef blo olketa Christian.—2 Timothy 3:16, 17.

Hao, Olketa Jehovah’s Witness mas pei for kasem training blo olketa?

Nomoa. Instruction wea olketa kasem hem free. Olketa activity blo Olketa Jehovah’s Witness olketa donation wea pipol givim nao sapotim.—2 Corinth 9:7.