If Boy Laekem Boy or Gele Laekem Gele, Hao, Datwan Minim Hem Homosexual?

Nomoa!

Tru samting: Lo staka case olsem, kaen feeling olsem hem for lelebet taem nomoa.

Datwan nao kasem Lisette, wea hem 16 years old, taem hem garem feeling for laekem wanfala gele for lelebet taem. Hem sei: “Lo olketa biology class lo skul, mi lanem dat during olketa adolescent years, olketa hormone lo body savve ap and daon tumas. Mi tingse if olketa young wan savve moa samting abaotem body blo olketa, bae olketa understandim dat feeling for boy laekem boy or gele laekem gele hem temporary feeling nomoa, and datwan shud no putim pressure lo olketa for tingse olketa homosexual.”

Bat hao if datfala feeling for wanfala boy laekem nara boy or gele laekem nara gele hem stap longtaem? Hao, hem cruel for God sei samwan wea garem feeling olsem mas avoidim homosexuality?

If iu ansa yes lo second kwestin, hem important for iu savve kaen tingting olsem hem base lo rong biliv wea pipol tingse olketa man or woman shud followim feeling blo olketa nomoa saed lo sex. Bible talem dat olketa human savve chus for no followim feeling wea no stret saed lo sex, wea datwan hem dignifyim olketa.​—Colossians 3:5.

Wat Bible talem hem reasonable. Sem law wea Bible talem for man and woman wea laek for duim adultery for “ranawe from wei for durong,” hem apply tu for olketa wea garem homosexual feeling. (1 Corinthians 6:18) Tru samting nao, staka million heterosexual wea laek for followim standard lo Bible, olketa tu mas kontrolem olketa seleva from eni temptation wea olketa feisim. Olketa wea garem homosexual feeling tu savve kontrolem olketa seleva if olketa laek for mekem God hapi.​—Deuteronomy 30:19.