OLKETA KWESTIN WEA YOUNG PIPOL GAREM
Hao if Mi Les Skul Nao?
Olketa teacher strict tumas. Staka pressure from olketa nara young wan. Exam mekem man stress, and staka homework tumas. From datwan, hem understandable dat iu maet no laek for skul.a Wanfala teenager wea nem blo hem Rachelb sei:
“Skul hem barava lalas ples wea mi laek go. Mi laek for go lo beach or stroll witim olketa frens or even helpem parents blo mi for kuki or klinap winim for go lo skul!”
If iu olsem Rachel, maet full taem wea iu go skul iu feel olsem iu lo prison nomoa, and iu have tu weit kasem graduation day for iu release. Bat hao, iu savve tingim eni positive samting abaotem skul?
Iu savve? Taem iu garem positive tingting abaotem skul, hem olsem iu tek kontrol lo datfala situation and bae iu no ting lo skul olsem wanfala challenge wea hard tumas for iu deal witim. So skul bae hem kamap olsem wanfala tul wea iu savve iusim for sharpenem olketa skills blo iu wea bae iu needim taem iu adult.
For helpem iu garem positive tingting abaotem skul, trae focus lo olketa point hia:
Education blo iu. Taem iu gohed lanem staka moa samting, datwan bae helpem iu for savve hao for solvem olketa problem wea bae kamap lo future lo waka and lo olketa nara area lo laef. Taem olsem, bae iu no need for evritaem depend lo olketa narawan. Askem iuseleva, ‘Even if mi no laekem samfala samting abaotem skul, wat nao samfala benefit wea mi kasem from education blo mi?’
Bible principle: “Protectim wisdom and ability for ting raonem samting.”—Proverbs 3:21.
For moa information, lukim article “What if I’m Failing at School?”
Olketa habit blo iu. Routine blo skul savve trainim iu for savve hao for managem taem blo iu, for disciplinem iuseleva, and for garem attitude for waka hard. Bae iu needim olketa quality hia taem iu kamap adult. Askem iuseleva: ‘Hao nao olketa routine lo skul hem helpem mi for disciplinem miseleva and kamap man for waka hard? Wat nao mi savve duim for improve lo diswan?’
Bible principle: “Man wea waka hard lo eni waka wea hem duim bae kasem gud samting.”—Proverbs 14:23.
For moa information, lukim article “Hao Nao Mi Savve Iusim Gud Taem blo Mi?”
Hao iu deal witim olketa narawan. Taem iu story witim olketa classmate blo iu lo skul, datwan savve helpem iu for understandim feeling blo olketa narawan and respectim olketa. Wanfala young man wea nem blo hem Joshua hem sei: “For lane hao for communicate witim pipol hem important olsem wei for lanem history and science. Datwan hem wanfala skill wea iu bae iusim lo full laef blo iu.” Askem iuseleva, ‘Hao nao skul helpem mi for lane for deal witim olketa narawan, nomata if olketa kam from difren baekgraon or garem difren biliv from mi?’
Bible principle: “Waka hard for garem peace witim nara pipol.”—Hebrews 12:14.
For moa information, lukim article “How Can I Improve My Conversation Skills?”
Future blo iu. Skul savve helpem iu luksavve lo olketa samting wea iu savve duim, and taem olsem, bae iu savve markem olketa goal fitim. Wanfala young gele wea nem blo hem Brooke hem sei: “Maet iu savve kasem training lo wanfala specific samting, hem nao wat mi duim, so bihaen iu graduate, iu savve qualify for duim wanfala waka.” Ask iuseleva: ‘Hao nao bae mi sapotim miseleva afta mi graduate from skul? Hao nao mi savve iusim wat mi lanem lo skul for helpem mi kasem waka wea bae sapotim mi?’
Bible principle: “Savve lo wea nao iu go lo hem.”—Proverbs 4:26, Contemporary English Version.
a Staka principle wea iumi discussim lo disfala article bae helpem tu olketa young wan wea olketa skul lo haos.
b Mifala changem samfala nem.