Hao if Pipol Gossip Abaotem Mi?

Why nao gossip mekem man feel nogud

Samfala gossip hem barava nogud, for example, wanfala laea for spoelem reputation blo iu. Bat even if datfala gossip hem no serious tumas, hem still savve mekem man feel nogud especially taem samwan wea iu tingse hem klos lo iu nao hem spredim datfala gossip!​—Psalm 55:12-​14.

“Mi faendaot dat wanfala fren gossip abaotem mi, hem sei mi nating kea abaotem nara pipol. Datwan mekem mi feel nogud! Mi no minim why nao hem tok olsem abaotem mi.”​—Ashley.

Tru samting: Nomata datfala person wea spredim gossip hem wanfala klos fren or nomoa, hem wanfala serious samting taem pipol talem nogud samting abaotem iu.

Nogud nius​—hard for iu evritaem avoidim

Diswan hem samfala reason why pipol maet gossip:

Barava interest. Hem wei blo pipol for interest for story witim nara pipol. So hem normal for iumi story lo (and abaotem) each other. Really, Bible encouragem iumi for showimaot lo olketa narawan dat iumi no ‘tingim iumiseleva.’​—Philippi 2:4.

“Wanfala interesting subject for story abaotem hem pipol!”​—Bianca

“For tok stret, mi laek for savve gud wat nao gohed lo laef blo pipol and for tok abaotem witim narawan. Mi no savve why bat mi hapi tumas for duim datwan.”​—Katie.

Boring. Lo taem blo Bible, samfala pipol savve “laek storyim enikaen niu samting wea olketa herem.” (Acts 17:21) Wei blo pipol distaem tu olsem!

“Samtaems taem no eni interesting samting happen, pipol bae duim samting mekem olketa garem samting for tok abaotem.”​—Joanna.

No feel secure. Dastawe, Bible warnim iumi for againstim feeling for laek comparem iumiseleva witim olketa narawan. (Galatia 6:4) Bat sorre samting nao, samfala deal witim wei wea olketa no feel secure lo wei for spredim negative gossip.

“Negative gossip hem showim klia wei blo datfala person wea gossip. Staka taem hem minim dat insaed heart blo hem, hem jealous lo man wea hem gossip abaotem. Olketa gossip for mekem olketa feel gud abaotem olketa seleva, for convincim olketa seleva dat olketa gud winim datfala person.”​—Phil.

Tru samting: Nomata iu laekem or nomoa, pipol bae tok abaotem nara pipol, includim iu tu.

Gud nius​—no letem datwan for spoelem iu

Iu hard for stopem evri gossip abaotem iu, bat iu savve chus hao for react lo datwan. If iu faendaot dat pipol gossip abaotem iu, iu garem tufala option for followim.

OPTION 1: Ignorem datwan. Staka taem, best solution hem for let go nomoa especially if datfala gossip hem weistim taem nomoa. Followim disfala advaes lo Bible: “No kwiktaem for feel nogud lo narawan.”​—Ecclesiastes 7:9.

“Wanfala story go raon dat mi frenim wanfala boy wea no enitaem bifor mi meetim hem. Hem here fani so mi just ignorem nomoa.”​—Elise.

“Gud reputation hem wanfala best weapon for againstim wei for gossip. Nomata if wanfala nogud story go raon abaotem iu samfala pipol bae bilivim iu sapos iu garem gud reputation. Tru story abaotem iu bae kamaot.”​—Allison.

Idea: Raetem daon (1) wat olketa talem abaotem iu and (2) hao iu feel abaotem datwan. Taem iu ting raonem “datwan lo heart” blo iu hem bae isi for iu let go nomoa lo datwan.​—Psalm 4:4.

OPTION 2: Story witim person wea startim datfala gossip. Samfala taem iu feel datfala story hem big tumas so iu need for story witim datfala person wea startim story hia.

“If iu go story witim pipol wea gossip abaotem iu, maet bae olketa luksavve wat olketa duim hem spoelem iu. And tu, iu bae kliarem saed blo iu and maet datwan bae stretem datfala problem.”​—Elise.

Bifor iu go story witim samwan wea gossip abaotem iu, ting raonem olketa Bible principle and olketa kwestin hia.

• “Samwan wea ansa bifor hem herem tru story, hem karangge.” (Proverbs 18:13) ‘Hao, evriting mi herem hem tru? Waswe, datfala person wea talem mi datfala gossip hem savve lo full story?’

• “Willing for lisin, no kwiktaem for toktok, and no kwiktaem for kros.” (James 1:​19) ‘Hao, distaem hem best taem for story witim datfala person wea gossip? Hao, mi deal witim disfala situation lo stretfala wei? Or hao, hem gud for letem samfala taem go pas taem kros blo mi katdaon?’

• “Treatim olketa narawan lo sem wei wea iu laekem olketa for treatim iu.” (Matthew 7:​12, NET Bible) ‘If mi nao duim datwan, hao nao mi laekem narawan for treatim mi? Wat kaen setting nao mi laekem for mitufala stretem datfala problem? Wat kaen word and behavior nao bae fitim datfala taem?’

Idea: Bifor iu go story witim datfala person wea gossip, raetem daon wat iu ting for talem. Then weit for wan or tu weeks, then readim bak moa wat iu raetem for lukim sapos iu laek mekem eni change. And tu, storyim plan blo iu witim parents or wanfala mature fren, and askem advaes from hem.

Tru samting: Gossip hem olsem olketa nara samting lo laef wea iu hard for evritaem kontrolem. Bat datwan no minim hem bae kontrolem iu!