Wanem Nao Governing Body blo Olketa Jehovah’s Witness?

Governing Body hem wanfala smol grup blo olketa mature Christian wea givim direction lo Olketa Jehovah’s Witness evriwea lo world. Waka blo olketa hem for:

• Leadim waka for redyim olketa buk, meeting, and skul blo Olketa Jehovah’s Witness wea givim instruction followim Bible.​—Luke 12:42.

• Olketa lukaftarem waka wea olketa Jehovah’s Witness duim evriwea lo world lo wei for directim ministry wea olketa duim lo pablik, disaedem hao for iusim olketa donation.

Governing Body followim example blo “olketa aposol and elder long Jerusalem” lo first century, wea mekem olketa important disison for olketa Christian kongregeson. (Acts 15:2) Olsem olketa faithful aposol and elder bifor, olketa member blo Governing Body no olketa leader lo organization blo mifala. Olketa letem Bible nao for directim olketa bikos olketa luksavve Jehovah God markem Jesus Christ nao for Leader blo kongregeson.​—1 Corinth 11:3; Ephesus 5:​23.

Hu Nao Olketa Member blo Governing Body?

Olketa member blo Governing Body hem Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, and Jeffrey Winder. Olketa waka lo world hedquarter blo mifala lo Warwick, New York, U.S.A.

Hao nao Governing Body organize?

Governing Body startim sixfala komiti for lukaftarem olketa difren waka wea mifala duim, and each member blo Governing Body waka lo wan or winim wanfala komiti hia.

• Coordinators’ Komiti: Lukaftarem olketa legal samting and wei for provaedem relief taem natural disaster happen. Olketa disaedem best samting for duim taem Olketa Jehovah’s Witness kasem persecution for biliv blo olketa, and taem olketa nara important samting kamap.

• Personnel Komiti: Lukaftarem evri arrangement for olketa member blo olketa Bethel famili.

• Publishing Komiti: Lukaftarem waka for wakem and sendem go olketa Bible buk. Olketa lukaftarem tu waka for buildim olketa ples for worship, olketa transleison office, and olketa branch office.

• Service Komiti: Lukaftarem waka blo mifala for preachim “gud nius blo Kingdom.”​—Matthew 24:14.

• Teaching Komiti: Directim waka for redyim olketa spiritual information wea mifala kasem lo olketa meeting, skul, and audio and video program.

• Writing Komiti: Directim waka for redyim spiritual information wea mifala kasem lo olketa buk and lo website blo mifala. Olketa directim tu waka for transleitim evri information hia.

Governing Body meet evri week tu for tingim evri need blo organization blo mifala. Lo olketa meeting hia olketa member blo Governing Body storyim samting wea Bible talem, and olketa followim wanem holy spirit blo God leadim olketa for duim. Olketa traem best for evriwan agree lo wanem olketa disaedem.​—Acts 15:25.

Hu nao olketa wea helpem Governing Body?

Olketa wea helpem Governing Body hem samfala Christian wea faithful. (1 Corinth 4:2) Olketa waka lo olketa komiti blo Governing Body and olketa savve gud lo hao for duim waka wea komiti lukaftarem. Olketa no mekem eni disison, bat olketa givim gudfala advaes lo komiti, olketa mekem samting komiti disaedem for kamap, and olketa chekim hao nao samting komiti disaedem hem gohed. Maet olketa kasem assignment from Governing Body tu for visitim Olketa Jehovah’s Witness lo olketa nara kantri or for givim olketa tok lo olketa big hipap olsem annual meeting or Gilead graduation.