Wat Nao Sin?

Ansa from Bible

Sin hem eni feeling, tingting, or samting wea iumi duim wea no followim standard blo God. Hem minim tu for brekem law blo God taem iumi duim samting wea God sei hem rong or no raeteous. (1 John 3:4; 5:​17) Bible sei taem man no duim stret samting wea hem shud duim, datwan tu hem sin.​—James 4:​17.

Lo Bible, olketa Hebrew and Greek word wea iumi transleitim for sin savve minim for “no kasem mark,” or target. Olsem example, olketa soldia lo Israel bifor savve tumas for iusim sling for sutim ston and olketa “no save mistim enitaem” target blo olketa. Lo Hebrew languis, hem savve sei olketa “nating sin.” (Jajis 20:16) So taem man sin, hem minim hem no kasem olketa mark or perfect standard blo God.

From God wakem iumi, hem garem raet for markem olketa standard for iumi followim. (Revelation 4:​11) Iumi mas ansa lo hem for wanem iumi duim.​—Rome 14:12.

Hao, enitaem iumi no savve sin?

Nomoa. Bible sei “evriwan sin and no savve showimaot olketa nambawan wei blo God.” (Rome 3:​23; Fas Kings 8:​46; Eklesiastes 7:​20; 1 John 1:8) Why nao olsem?

Firstfala man and woman, Adam and Eve, no garem sin bikos God wakem tufala for perfect and garem olketa wei blo hem. (Jenesis 1:​27) Bat tufala lusim wei for perfect taem tufala no obeyim God. (Jenesis 3:​5, 6, 17-​19) Taem olketa garem pikinini, olketa pasim go sin and wei for no perfect lo olketa. (Rome 5:​12) Olsem King David lo Israel sei, “Stat kam long taem wea mi bon, mi bin sin finis.”​—Sams 51:5.

Hao, samfala sin hem serious winim olketa narawan?

Yes. Olsem example, Bible sei olketa man lo Sodom bifor olketa “barava nogud tumas, bikos oltaem olketa gohed fo mekem sin nomoa” and sin blo olketa “barava nogud tumas.” (Jenesis 13:13; 18:20) Tingim thrifala samting wea showimaot hao serious nao wanfala sin.

1. Serious sin. Bible warnim iumi for no duim olketa serious sin olsem for durong, worshipim idol, steal, drunk, demandim selen, killim man dae, and for duim samting wea join witim devildevil. (1 Corinth 6:​9-​11; Revelation 21:8) Bible comparem olketa sin hia witim olketa sin wea iumi no min for duim, olsem for talem or duim samting wea mekem olketa narawan feel nogud. (Provebs 12:18; Ephesus 4:​31, 32) Nomata olsem, Bible encouragem iumi for no ting nating lo eni sin wea iumi duim, bikos hem savve lead go lo olketa serious sin wea mekem iumi brekem law blo God.​—Matthew 5:​27, 28.

2. Samting wea mekem iumi sin. Samfala pipol sin bikos olketa no savve wanem God laekem olketa for duim. (Acts 17:30; 1 Timothy 1:​13) Bible no mekem excuse for kaen sin olsem, bat hem showimaot hem difren from olketa sin wea man min for duim wea brekem law blo God. (Nambas 15:30, 31) Man wea min for duim sin hem duim bikos wei blo hem “ravis fogud.”​—Jeremaea 16:12.

3. Haomas taem iumi duim. Bible showimaot tu dat taem man duim sin wantaem nomoa, hem difren from man wea gohed for duim sin. (1 John 3:​4-8) Olketa wea “gohed for duim sin,” nomata olketa lanem finis stret samting for duim, bae kasem judgment blo God.​—Hebrew 10:26, 27.

Olketa wea guilty lo serious sin savve feel nogud tumas bikos lo olketa mistek wea olketa duim. Olsem example, King David raet: “Olketa sin blong mi hemi kavaremap mi nao olsem wea mi draon insaet long solwata. Olketa sin blong mi hemi hevi tumas, an mi no save karim nao.” (Sams 38:4) Bat Bible givim hope olsem: “Yufala hu i falom olketa nogud wei, yufala mas lusim olketa wei ya. Yufala mas lusim olketa ravis tingting blong yufala. Yufala mas kambaek long [Jehovah] hu hemi God blong yumi, mekem hemi sore long yufala an fogivim olketa sin blong yufala.”​—Aesaea 55:7.