Hu Nao Michael Datfala Chief Angel?

Ansa from Bible

Samfala religion kolem Michael lo “Saint Michael.” Michael hem nem wea Bible iusim for Jesus bifor and bihaen hem stap lo earth.a Bihaen Moses dae, Michael raoa witim Satan abaotem body blo Moses and Michael helpem wanfala angel for talem message blo God lo profet Daniel. (Daniel 10:13, 21; Jude 9) Wei wea Michael defendim rul blo Jehovah and faetem olketa enemy blo God, hem fitim mining blo nem blo hem wea hem nao, “Hu Nao Olsem God?”​—Daniel 12:1; Revelation 12:7.

Tingim samfala reason why hem stret for sei Jesus nao Michael datfala chief angel.

• Michael hem “datfala chief angel.” (Jude 9) Datfala title “chief angel” wea minim “chief blo olketa angel” hem stap nomoa lo tufala Bible verse. Lo tufala verse hia datfala word hem singular, wea showim wanfala angel nomoa garem datfala title. Wanfala verse hia sei Lord Jesus wea resurrect “bae kam daon from heven. Hem bae singaot big witim singaot bilong chief angel.” (1 Thessalonica 4:​16) So Bible sei Jesus bae “singaot big witim singaot bilong chief angel” bikos hem nao datfala chief angel, Michael.

• Michael hem leader blo wanfala army blo olketa angel. “Michael witim olketa angel bilong hem faetem datfala big snek,” wea hem nao Satan. (Revelation 12:7) Michael garem hae position winim olketa nara angel lo heven bikos Bible sei hem “wanfala sif blong olketa gudfala enjel” and “nambawan [prince].” (Daniel 10:13, 21; 12:1) Wanfala scholar blo New Testament, David Aune hem sei olketa title hia showim Michael hem “leader blo army blo olketa angel.”

  Bible storyim tu nara nem blo samwan wea garem big paoa ovarem army blo olketa angel. Hem storyim “Lord Jesus hem showaot long heven witim olketa strongfala angel bilong hem long bigfala fire taem hem panisim olketa wea no savve long God.” (2 Thessalonica 1:​7, 8; Matthew 16:27) Jesus “hem go long heven and distaem hem long raet saed bilong God. Olketa angel and olketa wea garem paoa stap anda long hem.” (1 Peter 3:​21, 22) So hem no mek sense for God markem Jesus witim Michael for kamap leader blo olketa holy angel. Bat hem stret for sei tufala nem hia, Jesus and Michael, hem for sem man nomoa.

• Michael “bae hemi kamap” lo wanfala “taem blong trabol.” (Daniel 12:1) Lo buk blo Daniel, staka taem hem iusim disfala toktok “kamap” for minim wanfala king wea bae duim spesol samting. (Daniel 11:​2-4, 21) Jesus Christ, wea Bible storyim hem “Word bilong God,” bae duim important samting olsem “King bilong olketa king” for finisim evri enemy blo God and protectim pipol blo God. (Revelation 19:11-​16) Hem bae duim datwan lo wanfala taem blo ‘bigfala trabol wea hem winim eni trabol wea happen start kam long taem world hem start.’​—Matthew 24:21, 42.