OLKETA KWESTIN WEA YOUNG PIPOL GAREM
Wat Nao Mi Shud Savve Abaotem Online Photo Sharing?
Iu barava enjoyim holiday blo iu, and iu laek for talem lo olketa fren blo iu! Bat hao nao bae iu duim datwan? Bae iu
sendem postcard lo each wan?
raetem e-mail lo evri frens blo iu?
postim olketa piksa online?
Taem olketa grani blo iu young, maet “A” nomoa olketa fit for chusim.
Taem parents blo iu young, maet “B” nao hem fitim olketa.
Distaem, staka young wan wea parents letem olketa for postim piksa online chusim nao “C.” Waswe lo iu? Sapos olsem, disfala article bae helpem iu for stap klia lo eni danger wea savve kamaot from datwan.
Wat nao samfala gud samting lo diswan?
Fast tumas. “Sapos mi barava enjoyim naes trip or mi enjoy witim olketa frens blo mi, bae mi savve postim olketa piksa semtaem nomoa lo taem wea mi still hapi yet abaotem datwan.”—Melanie.
Hem barava isi. “Hem isi for lukim olketa update lo olketa photo wea frens blo mi postim, winim wei for iusim e-mail for savve wat nao olketa duim.”—Jordan.
Helpem iumi for contactim each other evritaem. “Samfala lo olketa fren and famili member blo mi stap farawe. Sapos olketa postim piksa staka taem and mi chek staka taem, hem olsem mi lukim olketa evriday!”—Karen.
Wat nao olketa danger?
Safety blo iu stap lo danger. Sapos camera blo iu garem geotagging wea showim position blo iu, olketa piksa wea iu postim maet givim moa information abaotem iu winim wanem iu laek for sharem. Wanfala report from wanfala website Digital Trends, hem sei: “Wei for postim olketa photo and nara media wea garem tag blo geolocation lo Internet savve letem eniwan nomoa wea garem olketa software for trackim man, and eniwan wea garem nogud tingting for faendem wea nao position blo samwan.”
Bat, samfala criminal olketa interest for savve sapos iu no stap lo wanfala ples. Lo wanfala report blo Digital Trends, olketa storyim hao thrifala man for steal go insaed 18-fala haos taem evriwan go aot. Hao nao olketa savve dat no eniwan stap lo haos? Olketa go online and trackim gogo blo olketa wea stap lo olketa haos hia. Datwan hem wanfala teknik wea olketa kolem cybercasing. Olketa stealim olketa samting wea kost blo hem winim $100,000 (U.S.).
Iu savve lukim samfala nogud samting. Samfala pipol no shame for postim eni samting for full world lukim. Wanfala teenage gele wea nem blo hem Sarah hem sei: “Nogud samting savve kamap taem iu go lo account blo pipol wea iu no savve lo olketa. Hem olsem iu go wakabaot lo wanfala city wea iu no savve and iu no garem map. Gogo bae iu end ap lo wanfala ples wea iu no laek for go lo hem.”
Hem savve tekem staka taem. Wanfala young gele wea nem blo hem Yolanda hem sei: “Hem isi for iu spendem taem for lukluk lo olketa latest post and readim koment blo evriwan. Gogo bae hem kamap wei blo iu for laek luk lo phone blo iu evri second nomoa just for chekim wat nao olketa niu samting.”
Iu need for kontrolem iuseleva sapos bae iu garem wanfala photo-sharing account
Wanfala teenager wea nem blo hem Samantha hem sei: “Mi mas markem nomoa taem wea mi spendem lo olketa website hia. Iu need for kontrolem iuseleva sapos bae iu garem wanfala photo-sharing account.”
Wat nao iu savve duim
Disaed strong for no lukim eni nogud samting. Bible sei: “Bae mi no putim eni iusles samting front lo eye blo mi.”—Psalm 101:3, NW.
“Mi evritaem chekim post blo olketa wea mi followim, and sapos mi lukim wat olketa postim hem no fitim, mi savve unfollow lo olketa.”—Steven.
Stap klia lo olketa wea no tinghae lo samting wea iu tinghae lo hem, bikos olketa bae spoelem olketa gudfala wei blo iu. Bible sei: “No letem eniwan laea long iufala. Sapos man hem fren witim pipol wea wei bilong olketa hem nogud, olketa bae spoelem gudfala wei bilong hem.”—1 Corinth 15:33.
“No followim olketa photo trend just bikos olketa popular. Staka taem, lo there nao bae iu savve lukim olketa swear toktok, piksa blo pipol wea naked, and olketa nara nogud samting.”—Jessica.
Markem hao long iu bae lukluk thru lo olketa photo and hao many taem nao iu postim olketa photo. Bible sei: “Lukluk gud long samting wea iufala duim, mekem iufala wise and no olsem pipol wea no wise. Iusim gud taem bilong iufala.”—Ephesus 5:15, 16.
“Mi unfollow lo olketa pipol wea ova tumas for postim olketa piksa. Olsem example, samwan go lo beach and postim 20 piksa blo sem shell nomoa. Ae tru wan? Hem bae tekem staka taem for lukluk thru lo evri piksa hia!”—Rebekah.
Mek sure olketa photo wea iu postim hem no mekem pipol tingse iu haem iuseleva. Lo Bible, Paul hem sei: “Mi talem iufala evriwan for no tinghae tumas long iufala seleva.” (Rome 12:3) No tingse olketa frens blo iu bae laekem tumas photo blo iuseleva and olketa samting iu duim.
“Samfala pipol postim selfie evritaem. Sapos iumi frens, mi luksavve lo iu finis—No need for remindim mi evritaem!”—Allison.