Skin blo Pilot Whale wea Klinim Hemseleva

Olketa barnacle and nara samting lo sea wea savve pas andanit lo ship hem bigfala problem. Olketa samting hia savve mekem ship for slow, for iusim staka petrol, and olketa mas aotem ship from wata bihaen tu-thri year for klinim. Olketa scientist lukluk lo nature for faendem eni ansa for disfala problem.

Tingim diswan: Olketa wea duim research lukim hao skin blo datfala long-finned pilot whale (Globicephala melas) savve klinim hemseleva. Skin blo hem garem staka sismol ridge lo hem wea mekem hem hard for olketa barnacle pas lo hem. Midolwan olketa ridge hia hem wanfala medicine wea savve killim dae olketa algae and bacteria. Taem old skin hem aot, niu skin wea grow garem datfala medicine lo hem.

Olketa scientist laek iusim sem kaen samting wea klinim hemseleva olsem for andanit blo olketa ship. Lo bifor, olketa iusim spesol paint for datwan. Bat olketa stop for iusim samfala paint hia bikos olketa garem poison insaed wea savve killim dae olketa fish. Olketa savveman garem idea for kavarem andanit blo olketa ship witim wanfala net. Net hia bae kavarem olketa hol wea garem medicine insaed wea stopem eni samting olsem barnacle for pas lo ship. Taem wata go lo datfala medicine hem kamap thik wea mekem full andanit blo ship kava lo datfala medicine wea olsem wanfala skin. Thik blo diswan hem 0.7 millimeter. Gogo skin hia hem isisi aot witim tu olketa samting wea pas lo hem. Then medicine lo olketa hol bae mekem wanfala niu skin for kavarem andanit blo ship.

Olketa test wea olketa duim showimaot diswan savve barava waka gud. Hem bae helpem olketa bisnis wea iusim ship, bikos for aotem ship from sea and klinim hem bigfala selen.

Wanem nao tingting blo iu? Waswe, skin blo pilot whale kamap seleva or samwan designim datwan?