Wanem Nao Bible Talem Abaotem Wei for Lukaftarem Parents wea Olo?

Ansa lo Bible

Hem important responsibility blo olketa pikinini wea big finis for mek sure olketa lukaftarem gud dadi and mami wea olo. Bible hem sei olketa pikinini wea big finis mas “showimaot olketa lotu gud lo wei for lukaftarem famili blo olketa and lo wei olsem olketa changem bak hard waka blo dadi and mami . . . , from hem nao samting God laekem.” (1 Timothy 5:4, New International Version) Taem olketa pikinini wea big finis lukaftarem parents wea olo, diswan showimaot olketa obeyim Bible wea sei pikinini mas respectim dadi and mami.—Ephesus 6:2, 3.

Bible no talem barava instruction lo hao for lukaftarem parents wea olo. Nomata olsem, hem storyim example blo samfala man and woman wea duim datwan. Hem garem samfala advaes tu wea savve helpem olketa wea lukaftarem olketa olo.

• Wanem nao samfala lo Bible duim for lukaftarem dadi and mami wea olo?

• Wanem advaes from Bible nao savve helpem olketa wea lukaftarem olketa olo?

• Waswe, Bible sei iumi mas keepim olketa olo lo haos nomoa?

Wanem nao samfala lo Bible duim for lukaftarem dadi and mami wea olo?

No evriwan duim diswan lo sem wei.

• Joseph hem stap farawe from dadi blo hem Jacob wea olo. Gogo, Joseph mekem arrangement for Jacob hem kam stap klosap lo hem. Joseph provaedem haos and kaikai for dadi blo hem, and protectim hem.—Jenesis 45:9-11; 47:11, 12.

• Ruth muv go lo kantri blo mami-in-law blo hem and waka hard for lukaftarem hem.—Ruth 1:16; 2:2, 17, 18, 23.

• No longtaem bifor Jesus hem dae, hem markem narawan for lukaftarem mami blo hem, Mary, wea luk olsem hem widow woman lo datfala taem.—John 19:26, 27.a

Wanem advaes from Bible nao savve helpem olketa wea lukaftarem olketa olo?

Bigfala waka for lukaftarem dadi and mami wea olo savve mekem man taed fogud and wari tumas. Bible garem olketa principle wea savve helpem olketa hia lo datfala waka.

• Respectim dadi and mami.

  Bible hem sei: “Tinghae long dadi an mami blong yufala.”—Eksodas 20:12.

  Hao nao iumi savve followim diswan? Showimaot iu tinghae and respectim dadi and mami lo wei for letem olketa seleva kontrolem samting lo laef blo olketa sapos olketa fit for duim datwan. Sapos fitim, letem olketa nao disaedem wanem olketa needim. Lo semtaem, showimaot respect lo wei for duim wanem iu fit for duim for helpem olketa.

• Minim olketa and forgivim olketa.

  Bible hem sei: “Yu waes, bae yu no save kros kuiktaem. Yu no wari long rong agensim yu, bae pipol tinghae long yu.”—Provebs 19:11.

  Hao nao iumi savve followim diswan? Sapos dadi or mami wea olo hem tok raf or no tinghae lo samting wea iu duim, ting raonem diswan, ‘Hao bae iu feel sapos iu nao olsem hem and no savve duim staka samting distaem?’ Taem iu trae for minim feeling blo hem and forgivim hem, iu stopem datwan for kamap worse moa.

• Story witim olketa narawan.

  Bible hem sei: “No eni advaes, bae plan gorong, plande advaes, bae plan gohed.”—Provebs 15:22.

  Hao nao iumi savve followim diswan? Duim research lo hao for deal witim olketa health problem wea dadi or mami garem. Faendaot wanem kaen help nao hem stap for lukaftarem olketa. Story witim olketa narawan wea lukaftarem parents wea olo. Sapos iu garem samfala brata and sista, maet hem gud for garem famili meeting for storyim wanem nao olketa olo needim, hao for lukaftarem olketa, and hao for sharem datfala responsibility.

  

• Luksavve long wanem iu no fit for duim.

  Bible hem sei: “Man hemi hambol, nao hemi waes.”—Provebs 11:2.

  Hao nao iumi savve followim diswan? Luksavve lo wanem iu no fit for duim. Olsem example, taem and strong blo iumi evriwan garem spialaen. Diswan affectim haomas samting iu savve duim for dadi and mami blo iu. Sapos hem tumas nao for iumi lukaftarem olketa, askem help blo olketa relative or maet iu savve peim samwan for helpem iu.

• Lukaftarem iuseleva tu.

  Bible hem sei: “No eni man heitim body bilong hemseleva bat hem feedim and lovem body bilong hem.”—Ephesus 5:29.

  Hao nao iumi savve followim diswan? Nomata iu garem responsibility for lukaftarem dadi and mami, iu mas lukaftarem iuseleva tu and famili blo iu sapos iu marit. Iu mas kaikai gud. Iu mas kasem inaf rest and sleep. (Eklesiastes 4:6) And samfala taem iu mas rest from disfala responsibility tu. Taem iu duim olketa samting hia bae iu kasem bak strong saed lo body, feeling, and tingting for gohed lukaftarem olketa olo.

Waswe, Bible sei iumi mas keepim olketa olo lo haos nomoa?

Bible no sei olketa pikinini wea big finis mas keepim parents wea olo lo haos nomoa. Samfala famili disaed for traem best for keepim olketa lo haos. Bat gogo, maet olketa luksavve olketa mas stap lo nursing hom. Maet hem gud for famili hipap tugeta for storyim best samting for duim.—Galatia 6:4, 5.