OLKETA KWESTIN WEA YOUNG PIPOL GAREM
Wanem Nao Mi Mas Duim for Parents Bilong Mi Trustim Mi?
Wanem nao iu shud savve
Parents bilong iu bae trustim iu sapos iu obey evritaem. Wei for obeyim olketa rul bilong parents bilong iu hem olsem iu peim kaon. Sapos iu obeyim tufala evritaem, bae tufala hapi for daonem kaon bilong iu. Bat, sapos iu no obey no sapraes sapos tufala no givim kaon long iu.’
Hem tek taem for kasem trust. Sapos parents bilong iu lukim olketa gudfala wei bilong iu bae olketa trustim iu.
TRU STORY: “Taem mi teenager mi savve wanem nao parents bilong mi laekem for mi duim, so mi savve act olsem mi duim wanem tufala talem bat mi gohed duim haed wanem mi laekem. Datwan mekem hem hard for parents bilong mi trustim mi. Gogo mi luksavve mi no wei nao: Mi hard for laea and tingse bae parents bilong mi letem mi duim eni samting nomoa. Sapos iu obey evritaem, parents bae trustim iu.”—Craig .
Wanem nao iu savve duim
No laea—nomata hem no isi. Iumi evriwan savve mistek, bat wei for haedem witim laea savve barava spoelem wei wea parents bilong iu trustim iu. Bat taem iu showimaot finis hao parents bilong iu savve barava trustim iu, diswan bae showim long tufala iu mature and bae savve talemaot olketa mistek bilong iu. Kaen man olsem nao olketa narawan savve trustim.
“Pipol bae trustim iu nomata iu mekem mistek, bat bae olketa no trustim iu sapos iu trae for haedem olketa mistek.”—Anna.
Bible hem sei long Hebrew 13:18: “Mifala laek for honest long evri samting wea mifala duim.”
Tingim diswan: Taem parents bilong iu askem iu wea nao bae iu go or wanem nao bae iu duim, waswe iu talem olketa evri samting? Or taem parents bilong iu askem iu wea nao iu go and wanem nao iu bin duim, waswe iu haedem samfala samting from tufala?
Duim stret samting. Obeyim evri rul wea parents bilong iu putim. No weistim taem, duim gud olketa samting wea parents askem iu for duim. No delay sapos bae iu meetim eniwan. Duim gud skul waka bilong iu. Kasem bak haos long taem wea parents markem.
“Sapos parents bilong iu letem iu for go witim olketa fren bilong iu and olketa talem iu for kasem bak haos bifor 9 klok, no arrive long haf pas 10 and tingse bae tufala letem iu go witim olketa fren bilong iu long nara taem!”—Ryan .
Bible hem sei long Galatia 6:5: “Samting wea man seleva mas duim, hem no waka bilong narawan bat hem waka bilong hemseleva nao.”
Tingim diswan: Waswe, iu iusim gud taem bilong iu, finisim gud olketa waka bilong iu long haos and obeyim evri rul, nomata olketa wea iu no laekem?
Mas patient. Bae hem tek taem for parents trustim iu moa, sapos iu bin duim samting wea mekem tufala for no trustim iu. Iu mas willing for weit.
“Mi no hapi taem parents bilong mi no trustim mi taem mi tingse mi big finis. Mi no luksavve for kamap mature hem no followim age. Mi askem tufala for givim mi taem for showimaot fasin for obey. Diswan no isi, bat bihaen mi win. Mi luksavve wanem mi duim nao mekem parents bilong mi for trustim mi and no from age bilong mi.”—Rachel.
Bible talem diswan long 2 Corinth 13:5: “Gohed for lukluk gud long iufala seleva.”
Tingim diswan: Wanem nao samfala samting iu savve duim for mekem parents bilong iu gohed trustim iu?
ADVAES: Markem goal saed long wei for no leit long eni samting, finisim gud olketa waka long haos, followim taem for stap long haos, or eni nara samting. Storyim diswan long parents bilong iu and askem olketa wanem nao iu mas duim for olketa trustim iu moa. Then waka hard for followim advaes wea stap long Bible long Ephesus 4:22: “Mas lusim old wei bilong iufala wea followim nomoa samting iufala duim bifor.” Gogo, parents bilong iu bae lukim iu gohed waka hard!