4. Waswe, Hem Plan blo God for Iumi Safa?

Why Iumi Need for Savve

For savve lo ansa blo disfala kwestin savve changem hao iumi ting lo laef.

Samting for Tingim

Hem no mek sense for God wea wakem olketa naesfala samting lo world for mekem iumi safa.

Samfala tingse from iumi safa, datwan showimaot God no tingim iumi, or maet hem no stap. Olketa tingse iumi safa bikos (1) God no fit for stopem datwan, (2) God letem iumi for gohed safa, or (3) no eni God hem stap.

Bat waswe, eni nara reason stap for why iumi safa?

Ansa From Bible

Taem God wakem olketa man, hem no plan blo hem for olketa safa.

Hem laekem iumi for hapi.

“Mi save dat nambawan samting yumi mas duim nao hemi olsem, yumi mas hapi an duim olketa gudfala samting. Hemi stret nomoa, fo yumi kaikai an dring, an yumi hapi long waka, bikos God nao hemi givim disfala wei fo hapi long yumi.”—EKLESIASTES 3:12, 13.

God givim Adam and Eve evri samting olketa needim for hapi.

Hem no laekem tufala, or olketa lo laen blo tufala, for safa.

“[God] talem tufala olsem, ‘Hemi gud fo yutufala garem plande pikinini mekem olketa wea bae olketa kamaot bihaen long yutufala, bae olketa save go an stap long evri ples long wol.’”—JENESIS 1:28.

Adam and Eve disaed for no obeyim God.

Dastawe tufala safa, and olketa lo laen blo tufala safa tu.

“Sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae bikos evriwan sin.”—ROME 5:12.a

God no wakem man for rulim hemseleva.

Man no fit for rulim hemseleva, sem olsem man no savve laef andanit lo sea.

“[Man] kanduit kamap bos long laef blong hem.”—JEREMAEA 10:23.

Hem no plan blo God for iumi safa.

Hem laekem iumi for stap gud and for misstim olketa problem.

“Sapos yufala bin obeim olketa [komand] blong mi, bae yufala garem piis olsem wanfala riva wea hemi gohed fo ran gudfala.”—AESAEA 48:18.