TAEM olketa kasem wanfala tok assignment, planti hard waka for raetem evri toktok start long introduction go kasem conclusion. Maet olketa raetem tok hia planti taem bifor olketa satisfae witim datwan. Diswan savve tekem planti hour for duim.

Waswe, datwan hem wei wea iu preparem olketa tok bilong iu? Waswe, iu laek for lanem wanfala wei for duim wea moa isi? Sapos iu lane hao for preparem wanfala aotlaen, iu bae no need for raetem aot evri samting. Diswan bae givim iu moa taem for practicem tok bilong iu. Olketa tok bilong iu bae no just moa isi for givim, bat olketa bae moa interesting for audience herem and bae barava muvim olketa.

Saed long olketa pablik tok for kongregeson, olketa provaedem wanfala aotlaen. Bat hem no olsem witim planti nara tok. Maet olketa assignim iu wanfala subject or theme nomoa. Or maet olketa markem information wea olketa printim for iu iusim. Samfala taem, maet olketa provaedem iu witim tu-thri instruction nomoa. For evri assignment olsem, iu need for wakem aotlaen bilong iuseleva.

Example wea stap long page  41 bae givim iu lelebet idea abaotem hao for wakem wanfala short aotlaen. Lukim hao each wan long olketa main point hem start long left saed bilong page and hem long kapitol raeting. Anda long each main point olketa listim olketa point wea saportim datwan. Olketa nara point abaotem datwan stap anda long olketa point hia and olketa start lelebet insaed long page winim main point antap. Lukluk gud long disfala aotlaen. Lukim hao tufala main point barava join witim theme. Lukim tu hao olketa subpoint no just information wea interesting nomoa. Bat, each wan hem saportim olketa main point wea olketa stap anda long hem.

Taem iu preparem wanfala aotlaen, maet hem no barava luk olsem datfala example. Bat sapos iu minim olketa part bilong hem, bae hem no tek longtaem for iu organizem information bilong iu and preparem wanfala gudfala tok. Wanem nao iu shud duim?

Ting Raonem, Chus, and Organize

Iu needim wanfala theme. Theme bilong iu hem no just wanfala waed subject wea fitim wan word nomoa for talem. Hem main idea wea iu want for storyim, and hem showimaot wanem saed nao long datfala subject iu plan for storyim. Sapos olketa assignim iu wanfala theme, ting raonem each main word long careful wei. Sapos iu mas wakem tok from theme wea olketa assignim long iu and wea iusim information from wanfala pablikeson, tingim datfala theme taem iu studyim datfala information. Sapos olketa assignim wanfala subject nomoa, iu nao mas chusim theme. Bat bifor iu duim, hem gud sapos iu duim samfala research. Iu bae planti taem kasem olketa niu idea taem iu keepim mind bilong iu open.

Taem iu duim olketa step hia, go ahed for askem iuseleva: ‘Why nao information hia hem important for audience bilong mi? Wanem nao goal bilong mi?’ Hem shud no for kavarem information or for givim tok wea interesting nomoa bat for duim samting wea bae mekem audience bilong iu kasem gud samting. Taem iu start for luksavve long goal bilong iu, raetem datwan. Go ahed for remindim iuseleva abaotem datwan taem iu go ahed for prepare.

Bihaen iu disaedem wanem nao goal bilong iu and chusim wanfala theme wea fitim datwan (or bihaen iu ting raonem wei wea theme wea olketa assignim long iu hem fitim datfala goal), iu savve duim research wea barava targetim datwan. Lukaotem information wea bae barava helpem audience. No satisfae witim eni information nomoa, bat lukaotem information wea givim instruction and wea savve barava help. No ova tumas witim haomas research nao iu duim. Planti taem, iu bae faendem hao iu garem tumas information, so iu bae need for disaedem wanem information nao for iusim.

Luksavve long olketa main point wea iu need for storyim mekem iu savve build antap long theme bilong iu and kasem goal bilong iu. Olketa bae kamap olsem frame bilong aotlaen bilong iu. Haomas main point nao iu shud garem? Maet tufala hem inaf for wanfala short tok, and planti taem faevfala hem fitim nomata tok wea wan hour. Sapos tu-thri main point nomoa, bae hem moa isi for audience rememberim olketa.

Taem iu disaedem finis theme and olketa main point, organizem research information bilong iu. Disaedem wanem nao hem barava join witim olketa main point bilong iu. Chusim information wea bae mekem tok bilong iu niu and interesting. Taem iu chusim olketa scripture for saportim olketa main point, markem olketa idea wea bae helpem iu for story raonem olketa scripture hia long wei wea garem mining. Putim each information hia anda long main point bilong hem. Sapos samfala long olketa information hia hem no fitim eni long olketa main point, no iusim—nomata sapos hem barava interesting—or putim diswan long wanfala file mekem iu savve iusim long narataem. Keepim best information nomoa. Sapos iu trae for iusim tumas information, iu bae need for tok fast and iu bae no givim full mining long olketa important part bilong tok. Hem moabeta for chusim and storyim gud tu-thri point wea bae barava helpem audience. No ovarem taem wea olketa markem.

Sapos iu no duim yet, putim each point long stretfala ples bilong hem long aotlaen. Man for raetem Gospel, Luke, hem duim diswan. Bihaen hem kasem evri information abaotem subject bilong hem, hem arrangem evri point “followim order.” (Luke 1:3) Maet iu arrangem information bilong iu followim taem wea olketa samting happen or for fitim olketa subject, maet for followim samting wea happen and samting wea kamaot from datwan, or problem and ansa. Hem depend long which wan nao bae best wan for kasem goal bilong iu. Iu shud no kwiktaem change from wanfala idea go long narawan. Iu shud leadim audience bilong iu from wanfala point go long next wan, long wei wea olketa savve minim hao tufala point hia join tugeta. Olketa pruv wea iu givim shud leadim audience for kasem stretfala ansa. Taem iu arrangem olketa point bilong iu, ting raonem hao nao tok bilong iu bae here long audience. Waswe, bae olketa isi for followim wei wea iu storyim subject bilong iu? Waswe, bae diswan muvim olketa for duim samting followim samting olketa herem wea fitim goal bilong iu?

Next samting, preparem wanfala introduction wea bae mekem audience interest long subject bilong iu and wea showim olketa hao samting wea iu bae storyim bae barava helpem olketa. Maet hem helpem iu sapos iu raetem daon olketa firstfala sentence. Last samting, planim wanfala conclusion bilong tok wea hem join witim goal bilong iu and wea muvim audience for followim datfala information.

Sapos iu preparem aotlaen bilong iu early, bae iu garem inaf taem for mekem hem moabeta bifor iu givim. Maet iu lukim need for saportim samfala idea witim moa pruv, wanfala tokpiksa, or wanfala experience. Wei for storyim samting wea happen long datfala taem, or samting wea pipol long ples bilong iu interest long hem maet helpem audience for minim long wei wea moa klia, hao datfala information hem fitim point bilong iu. Taem iu reviewim tok bilong iu, maet iu luksavve long samfala wei wea iu savve changem datfala information for fitim audience. Wei for ting raonem gudfala information and mekem samfala change hem important tumas from diswan nao mekem wanfala tok kamap gud.

Samfala speaker maet need for raetem moa samting winim narawan. Bat sapos iu organizem information bilong iu anda long tu-thri main point nomoa, aotem samting wea no saportim olketa, and putim olketa idea bilong iu followim stretfala ples bilong olketa, iu bae faendem hao witim lelebet moa taem, bae iu no need for raetem daon evri toktok moa. Bae datwan barava sevem taem! And olketa tok bilong iu bae kamap moabeta. Diswan bae showimaot klia hao iu barava kasem gud samting from Theocratic Ministry Skul education bilong iu.

EACH wan long olketa skul assignment hem givim iumi chance for muv ahed. Sapos iu duim best bilong iu, wei wea iu muv ahed bae isisi showaot long iuseleva and long olketa narawan tu. (1 Tim. 4:15) Skul bae helpem iu for mekem savve bilong iu kamap moa big.

Waswe, hem mekem iu fraet taem iu tingim wei for givim tok front long kongregeson? Staka pipol olsem, nomata olketa insaed long disfala skul for longtaem finis. Nomata olsem, samfala samting savve help for katem daon wei wea iu fraet. Long haos, mekem hem fasin bilong iu for evritaem read big. Long olketa meeting bilong kongregeson, givim koment evritaem, and sapos iu wanfala pablisa, share long field service evritaem. Diswan bae givim iu moa savve long hao for story long pipol. And tu, preparem olketa student tok bilong iu early, and practicem big. Remember hao iu bae givim tok bilong iu front long wanfala audience wea bae tinghae long tok bilong iu. And bifor iu givim tok bilong iu, prea long Jehovah. Hem hapi for givim holy spirit long olketa servant bilong hem wea askem hem.—Luke 11:13; Phil. 4:6, 7.

No ova tumas long samting wea iu expectim. For kasem savve olsem wanfala speaker and for kamap wanfala gudfala teacher hem needim taem. (Mic. 6:8) Sapos iu just joinim skul, no tingse iu shud duim wanfala nambawan tok stretawe. Bat, waka long wanfala point kaonsel each taem. Studyim sekson insaed long disfala buk wea storyim datwan. Sapos hem fitim, duim datfala exercise wea olketa markem. Diswan bae givim iu moa savve long olketa samting wea join witim datfala point kaonsel bifor iu givim tok bilong iu insaed long kongregeson. Gogo bae iu kamap moabeta.

Hao for Preparem Wanfala Reading Assignment

For prepare for read long pablik hem needim moa samting winim wei for savve hao for talem olketa word insaed long information nomoa. Trae for minim klia wanem nao mining bilong datfala information. Stretawe bihaen iu kasem assignment bilong iu, readim planti taem witim goal for duim datwan. Trae for minim wanem nao point bilong each sentence and idea bilong each paragraf mekem iu fit for talem stret olketa point witim feeling wea fitim. Sapos iu savve duim, iusim wanfala dictionary for savve long hao for talem olketa word wea iu no savve long hem. Minim gud datfala information. Olketa mami and dadi maet need for helpem olketa young pikinini for duim diswan.

Waswe, olketa assignim iu for readim wanfala part bilong Bible or maet olketa paragraf bilong wanfala article insaed long Wastaoa? Sapos iu garem long languis bilong iu datfala reading long audiokaset, hem savve barava helpem iu for lisin long datfala reading mekem iu savve hao for talem, joinim, and strongim olketa word and changem voice. Then trae for followim olketa samting hia long reading bilong iu.

Taem iu start for waka long assignment bilong iu, mek sure iu studyim gud leson wea storyim datfala point bilong hao for tok wea olketa assignim long iu. Sapos hem fitim, reviewim datwan bihaen iu practicem big reading bilong iu tu-thri taem. Duim best bilong iu for followim datfala kaonsel.

Disfala training bae barava helpem iu long ministry bilong iu. Taem iu duim field service, iu bae garem planti chance for readim samting long olketa narawan. From Word bilong God hem garem paoa for changem laef bilong pipol, hem important for readim gud. (Heb. 4:12) No tingse iu bae barava savve long evri samting saed long gudfala wei for read bihaen wan or tufala assignment nomoa. Paul hem raet olsem long wanfala Christian elder wea garem finis bigfala savve: “Go ahed for waka hard long wei for read long pablik.”—1 Tim. 4:13.

Wei for Iusim Wanfala Subject and Setting

Taem iu kasem wanfala assignment insaed long skul wea iu need for garem wanfala setting, hao nao iu shud start?

Iu need for ting raonem thrifala main samting: (1) subject wea olketa assignim long iu, (2) setting bilong iu and datwan wea iu bae story witim, and (3) point kaonsel wea olketa assignim for iu waka long hem.

Iu need for faendem information abaotem subject wea olketa assignim long iu. Bat bifor iu duim tumas samting, iu need for tingting gud abaotem setting bilong iu and tu, datwan wea iu bae story witim, bikos tufala samting hia bae affectim wanem information iu bae storyim and wei wea iu givim tok bilong iu. Wanem setting nao bae iu iusim? Bae iu showim hao for talem gud nius long samwan wea iu savve? Or bae iu showim wanem nao maet happen taem iu meetim samwan for firstaem? Waswe, hem olo winim iu or young winim iu? Wanem kaen wei for tingting nao maet hem garem abaotem datfala subject wea iu plan for iusim? Haomas samting nao maet hem savve finis abaotem datwan? Wanem nao goal wea iu hope for kasem long tok bilong iu? Ansa bilong olketa kwestin hia bae provaedem olketa important instruction for iu followim taem iu wakem tok bilong iu.

Wea nao bae iu faendem information abaotem subject wea olketa assignim long iu? Long page 33 go kasem 38 bilong disfala buk, hem storyim “Hao for Duim Research.” Readim, and then iusim olketa research tul wea stap. Planti taem iu bae kwiktaem faendem moa information winim wanem iu savve iusim. Readim inaf information for mekem iu luksavve haomas information hem stap for iusim. Bat taem iu duim datwan, no forgetim setting wea iu bae iusim and datwan wea iu bae story witim. Markem olketa point wea bae fitim.

Bifor iu organizem tok bilong iu and disaedem wanem nao olketa point wea iu bae iusim, spendem taem for readim sekson long buk wea storyim point kaonsel wea olketa assignim long iu. For followim datfala kaonsel, hem wanfala main reason for iu kasem assignment bilong iu.

Sapos iu givim tok insaed long taem wea olketa markem, iu bae no sorre from iu no savve talem end bilong tok, bikos olketa bae givim wanfala saen for letem iu savve hao taem hem finis nao. Bat long field ministry bilong iumi, hem no evritaem important for followim taem. So taem iu prepare, tingim haomas taem nao iu garem, bat tingim tu hao gudfala wei for teach hem important.

Abaotem Olketa Setting. Lukluk gud long olketa setting long page 82, and chusim wanfala wea bae fitim ministry bilong iu and wea bae letem iu for iusim datfala information followim samting wea savve really happen. Sapos iu insaed long skul for longtaem finis, tingim diswan olsem chance for reach aot and mekem grow olketa narakaen savve for ministry bilong iu.

Sapos Theocratic Ministry Skul overseer hem assignim setting, acceptim datfala challenge. Klosap evri setting hem abaotem preaching. Sapos no enitaem iu duim preaching long wei wea olketa markem for setting bilong iu, kasem olketa idea from olketa pablisa wea bin duim datwan finis. Sapos iu savve duim, trae for storyim subject wea olketa assignim long iu long wanfala setting wea klosap semsem witim setting wea iu bae iusim long skul. Diswan bae helpem iu for kasem wanfala important goal saed long training bilong iu.

Taem Iu Givim Olsem Wanfala Tok

Sapos iu wanfala man, maet olketa assignim iu for givim wanfala shortfala tok long kongregeson. Taem iu preparem olketa tok olsem, olketa point wea iu need for tingim klosap semsem witim olketa point wea olketa listim finis for olketa student assignment wea olsem wanfala demonstration. Olketa main wei wea hem difren hem saed long audience and wei for givim.

Hem gud for preparem information bilong iu long wei wea bae mekem evriwan long audience kasem gud samting. Klosap evriwan long audience savve finis long olketa main teaching bilong Bible. Maet olketa savve gud long datfala subject wea olketa assignim long iu. Tingim wanem nao olketa savve finis long hem abaotem subject bilong iu. Trae for helpem olketa kasem gud samting from tok bilong iu. Askem iuseleva: ‘Hao nao mi savve iusim subject bilong mi for mekem kamap moa deep wei wea miseleva and audience bilong mi minim Jehovah olsem wanfala person? Wanem samting long information hia nao savve helpem mifala for luksavve long will bilong God? Hao nao information hia savve helpem mifala for mekem olketa gudfala disison nomata mifala stap insaed long world wea evritaem aftarem samting wea body wantem?’ (Eph. 2:3) Hem needim research for kasem olketa gudfala ansa bilong olketa kwestin hia. Taem iu readim Bible, trae for duim moa samting winim wei for readim olketa scripture nomoa. Story raonem olketa scripture wea iu iusim, and showim hao olketa hia kamap faondeson bilong olketa point wea iu mekem. (Acts 17:2, 3) No trae for talem tumas information. Talem information bilong iu long wei wea bae isi for olketa rememberim.

Iu mas tingim hao nao iu bae givim tok bilong iu taem iu prepare. No ting smol long diswan. Practicem big tok bilong iu. Wei wea iu waka hard for studyim and followim kaonsel for olketa difren wei for tok bae helpem iu for muv ahed. Nomata iu wanfala niu speaker or wan wea garem savve finis, prepare gud, mekem iu savve story witim fasin for biliv strong and feeling wea fitim information bilong iu. Taem iu duim each assignment bilong iu insaed long skul, tingim goal bilong iu for iusim disfala present for tok wea God givim, for honorim Jehovah.—Ps. 150:6.

OLKETA preparem program bilong Theocratic Ministry Skul for mekem full kongregeson kasem gud samting. Information for helpem iumi kamaot tu long olketa nara kongregeson meeting and long olketa assembly and convention. Sapos iu kasem assignment long wanfala long olketa program hia, iu garem bigfala responsibility. Aposol Paul hem barava encouragem Timothy, wanfala Christian overseer, for lukluk gud evritaem long teaching bilong hem. (1 Tim. 4:16) Olketa wea kam long olketa Christian meeting markem taem long busy living bilong olketa—and samfala barava trae hard—mekem olketa savve stap for kasem instruction long olketa samting wea affectim wei wea olketa fren witim God. Tru nao, for givim instruction olsem hem wanfala spesol privilege! Hao nao iu savve duim diswan long gudfala wei?

Olketa Main Point From Bible Reading

Disfala part bilong skul hem kam from Bible reading wea olketa assignim for evri week. Iu shud strongim wei wea datfala information hem affectim iumi distaem. Olsem Nehemiah 8:8 talem, Ezra and olketa narawan readim Word bilong God long pablik, explainim, “givim mining long hem,” and helpem pipol for minim. Iu garem chance for duim sem samting taem iu storyim olketa main point from Bible reading.

Hao nao iu shud preparem disfala assignment? Sapos iu savve duim, readim sekson bilong Bible wea olketa markem wanfala or winim wanfala week bifor. Then ting raonem kongregeson bilong iu and olketa need bilong hem. Prea abaotem datwan. Wanem kaonsel, olketa example, olketa principle long disfala sekson bilong Word bilong God nao bae fitim olketa need hia?

Research hem important tumas. Waswe, iu garem Watchtower Tower Publications Index or end bilong year index insaed long Wastaoa? Sapos iu garem, iusim gud datwan. Taem iu duim research insaed long olketa pablikeson abaotem olketa verse wea iu chus for storyim, maet iu faendem moa information abaotem samting wea verse storyim, wei wea olketa profesi fulfill, hao for savve wanem olketa verse hia showimaot abaotem Jehovah, or story abaotem olketa principle. No trae for iusim tumas point. Targetim tu-thri verse nomoa. Hem moabeta for storyim tu-thri verse and storyim gud.

Maet wanfala part bilong assignment bilong iu hem for askem audience for talem wanem nao gud samting wea olketa seleva kasem from Bible reading bilong datfala week. Wanem nao olketa faendem wea bae helpem olketa long study seleva and famili study bilong olketa, long ministry or wei bilong laef? Wanem nao olketa fasin bilong Jehovah wea showaot taem hem deal witim pipol and olketa nation? Wanem nao audience lanem wea strongim faith bilong olketa and buildimap wei for tinghae long Jehovah? No iusim tumas taem long hardfala point wea iu no needim. Mekhae long mining and wei wea olketa point wea iu chusim savve helpem audience.

Instruction Tok

Disfala tok bae iusim information wea olketa pablisim, olsem wanfala article long Wastaoa or Wekap! or maet part bilong wanfala buk. Klosap evritaem, iu bae garem moa information winim wanem iu needim for taem wea iu garem. Hao nao iu shud duim assignment bilong iu? Olsem wanfala teacher, no just samwan for talem moa evri part bilong information nomoa. Wanfala overseer mas “fit for teach.”—1 Tim. 3:2.

Start witim wei for studyim datfala information. Readim olketa scripture. Ting raonem. Trae for duim diswan longtaem lelebet bifor date bilong tok bilong iu. Rememberim hao olketa brata kasem encouragement for readim firstaem datfala information wea iu kasem tok bilong iu from hem. Assignment bilong iu hem no for just reviewim datwan nomoa bat for showim hao nao for followim. Iusim olketa point wea fitim from datfala information long wei wea bae barava helpem kongregeson.

Olsem evri pikinini hem garem fasin bilong hemseleva, evri kongregeson garem olketa fasin bilong hemseleva. Wanfala dadi or mami wea teach gud, hem no just talem olketa rul saed long fasin. Hem story raonem datwan. Hem tingim fasin bilong pikinini and olketa problem wea hem stragol witim. Long sem wei, olketa teacher long kongregeson trae for minim and storyim olketa need bilong pipol wea olketa teachim. Nomata olsem, teacher wea garem fasin for luksavve bae stap klia long wei for iusim olketa example wea maet mekem samwan long audience feel shame. Hem bae showimaot olketa gudfala samting wea olketa enjoyim finis from olketa wakabaot long wei bilong Jehovah and bae mekhae long kaonsel from Bible wea bae helpem kongregeson for win long olketa problem wea olketa feisim.

Gudfala wei for teach hem affectim heart bilong olketa long audience. Diswan needim no wei for just talem olketa tru samting nomoa, bat tu for buildimap wei for tinghae long wanem olketa minim. Hem needim trufala wei for interest long olketa wea kasem datfala instruction. Olketa spiritual shepherd shud savve long olketa sheep. Sapos olketa tingim olketa problem wea samfala feisim, olketa bae fit for story long wei wea encouragem, showaot olketa minim, garem fasin for kea, and tingim feeling bilong narafala man.

Olsem olketa gudfala teacher savve, wanfala tok mas garem goal wea klia. Man mas talem information long wei wea mekem olketa main point klia and pipol savve rememberim. Audience shud fit for rememberim olketa point wea bae affectim laef bilong olketa.

Service Meeting

Taem iu givim wanfala tok from wanfala article insaed long Kingdom Ministry Bilong Iumi, datfala challenge maet difren lelebet. Bae iu faendem hao, planti taem diswan needim iu for storyim long audience full information wea olketa provaedem, no for chusim nomoa samfala point wea fitim. Helpem audience for ting raonem olketa scripture wea olsem faondeson bilong eni kaonsel wea iu givim. (Titus 1:9) Olketa markem taem, wea klosap evritaem no givim chance for storyim nara information.

Long narasaed, olketa maet invaetem iu for storyim information wea no kam from wanfala article insaed long Kingdom Ministry Bilong Iumi. Maet diswan kam from wanfala Wastaoa article, or maet tu-thri shortfala note. Olsem wanfala teacher, iu nao mas ting raonem hao for mekem datfala information fitim olketa need bilong kongregeson. Maet iu need for iusim wanfala short tokpiksa or talem wanfala experience wea fitim. Remember hao assignment bilong iu hem no for storyim wanfala subject nomoa bat for duim datwan long wei wea helpem kongregeson for fulfillim waka wea Word bilong God markem and for hapi for duim datwan.—Acts 20:20, 21.

Taem iu preparem assignment bilong iu, ting raonem living bilong olketa insaed long kongregeson. Praisem olketa for wanem olketa go ahed for duim finis. Hao nao maet wei wea olketa followim olketa idea insaed long datfala information mekem olketa kamap moabeta and kasem moa hapi long ministry?

Waswe, assignment sei iu needim wanfala demonstration or interview? Sapos olsem, iu shud planim datwan longtaem lelebet bifor. Maet isi wei hem for askem narawan for arrangem datwan, bat datwan bae no evritaem mekem best samting kamaot. Sapos iu savve duim, practicem datfala demonstration or interview bifor day for meeting. Mek sure hao disfala part bilong assignment bilong iu hem barava saportim instruction wea iu givim.

Olketa Assembly and Convention

Olketa brata wea mekem grow olketa gudfala spiritual fasin and wea kamap olketa gudfala pablik speaker and teacher, gogo maet kasem invitation for share long assembly or convention program. Olketa hia nao, olketa spesol taem for theocratic education. Assignment for diswan maet wanfala manuscript tok, wanfala aotlaen, olketa instruction for wanfala Bible drama wea fitim distaem, or maet hem just wanfala paragraf wea garem olketa instruction. Sapos iu garem privilege for serve insaed wanfala program olsem, studyim gud datfala information. Go ahed for studyim go kasem taem iu barava minim hao hem savve helpem olketa brata.

Olketa wea kasem wanfala manuscript tok shud readim evri word bilong datfala information. Olketa no changem eni word or eni part bilong datfala information. Olketa studyim datwan for luksavve wanem nao olketa main point and wanem nao olketa nara point wea saportim datwan. Olketa practicem big datfala reading go kasem taem olketa savve readim witim stretfala wei for strongim olketa word, showaot feeling, strong, fasin for biliv strong, and strong bilong voice wea fitim bigfala audience.

Olketa brata wea kasem wanfala tok aotlaen garem responsibility for followim gud datfala aotlaen. Winim wei for readim aotlaen taem hem givim tok or preparem olsem wanfala manuscript, speaker shud story long extemporaneous wei, from heart bilong hem. Hem important for followim taem wea olketa markem long aotlaen mekem iu savve talem klia each main point wea stap. Speaker shud iusim gud olketa point and scripture wea stap anda long olketa main point. Speaker shud no changem samfala point insaed aotlaen witim olketa nara point wea hem favorim. Faondeson bilong disfala instruction hem Word bilong God. Responsibility bilong olketa Christian elder hem for “preachim word.” (2 Tim. 4:1, 2) So speaker shud iusim gud olketa scripture insaed long aotlaen—story raonem and showim hao for followim olketa.

No Delay

Waswe, iu serve insaed long kongregeson wea iu kasem planti tok assignment? Hao nao iu savve mekem evriwan long olketa kamap gudfala? Stap klia long wei for preparem olketa part long last minute.

Olketa tok wea bae barava helpem kongregeson needim speaker for firstaem ting raonem gud. So, mekem hem fasin bilong iu for readim datfala information stretawe bihaen iu kasem each assignment. Diswan bae givim iu chance for ting raonem datwan taem iu go ahed for duim olketa nara samting. Insaed long olketa day and week bifor iu givim tok bilong iu, maet iu herem samting wea bae helpem iu for savve long wanem nao for targetim witim datfala information. Olketa samting maet kamap wea showimaot wei wea information hem barava fitim datfala taem. For readim and ting raonem datfala assignment stretawe bihaen iu kasem hem needim taem, bat datfala taem bae givim iu gudfala samting. Taem iu redy for sidaon and preparem datfala aotlaen, iu bae kasem olketa gud samting from iu ting raonem datwan for longtaem finis. For duim olketa assignment long disfala wei bae barava katem daon wari and bae helpem iu for talem datfala information long wei wea bae help and kasem heart bilong olketa insaed long kongregeson.

Wei wea iu honorim Jehovah and kamap wanfala blessing long olketa wea lovem hem bae depend long wei wea iu tinghae long disfala present wea olketa givim long iu witim trust saed long program bilong Jehovah for givim education long pipol bilong hem.—Isa. 54:13; Rom. 12:6-8.

EACH week, klosap evri kongregeson bilong Olketa Jehovah’s Witness arrange for garem pablik tok abaotem wanfala Bible subject. Sapos iu wanfala elder or ministerial servant, waswe, iu showimaot hao iu wanfala gudfala pablik speaker, wanfala teacher? Sapos olsem, maet olketa invaetem iu for givim wanfala pablik tok. Theocratic Ministry Skul hem helpem staka thousand brata finis for kasem mark for disfala privilege bilong service. Taem olketa assignim iu wanfala pablik tok, wea nao iu shud start?

Studyim Aotlaen

Bifor iu duim eni research, readim and ting raonem datfala aotlaen go kasem taem iu barava minim gud. Ting raonem gud datfala theme, wea hem nao title bilong tok. Wanem nao samting wea iu mas teachim long audience? Wanem nao goal bilong iu?

Savve gud long olketa main heding. Ting raonem olketa main point hia. Hao nao each wan hem join witim theme? Olketa subpoint stap anda long each main point. Olketa nara point wea saportim olketa subpoint stap anda long olketa. Tingim hao each sekson bilong aotlaen hem build antap long sekson bifor datwan, lead go long next wan, and help for kasem goal bilong tok. Bihaen iu minim datfala theme, goal bilong tok, and wei wea olketa main point fulfillim datfala goal, iu redy nao for preparem datfala information.

Firstaem, maet hem helpem iu for tingim tok bilong iu olsem foa or faevfala shortfala tok, wea each wan garem wanfala main point. Preparem each wan separate.

Aotlaen wea olketa provaedem hem wanfala tul for helpem iu prepare. Iu shud no iusim olsem olketa note for tok bilong iu. Hem olsem olketa bon nating. Iu bae need for putim meat long hem, givim wanfala heart, and givim laef long hem.

Wei for Iusim Olketa Scripture

Jesus Christ and olketa disaepol bilong hem iusim olketa scripture olsem faondeson for teaching bilong olketa. (Luke 4:16-21; 24:27; Acts 17:2, 3) Iu savve duim sem samting. Olketa scripture shud kamap faondeson bilong tok bilong iu. Winim wei for explainim and showim hao for followim nomoa samting wea aotlaen talem, luksavve hao olketa scripture saportim samting wea aotlaen talem, and then iusim olketa scripture for teach.

Taem iu preparem tok bilong iu, lukluk gud long each scripture long aotlaen. Tingim olketa verse wea stap raonem. Samfala scripture maet stap for just givim moa information abaotem samting nomoa. Iu no need for readim and storyim evri scripture insaed long tok bilong iu. Chusim olketa best wan wea fitim audience. Sapos iu iusim gud olketa scripture wea insaed long datfala aotlaen, maet iu no need for iusim eni extra wan.

For tok bilong iu kamap gud, hem no depend long haomas scripture iu iusim, bat long wei wea iu teach. Taem iu introducem olketa scripture, showim why nao iu iusim olketa. Markem inaf taem for storyim hao for followim olketa. Bihaen iu readim wanfala scripture, keepim Bible bilong iu open taem iu storyim datfala scripture. Audience bae duim sem samting. Hao nao iu savve muvim audience for interest and helpem olketa for kasem moa gudfala samting from Word bilong God? (Neh. 8:8, 12) Iu savve duim long wei for explainim, iusim tokpiksa, and showim hao for followim.

Explainim. Taem iu preparem hao for explainim wanfala main scripture, askem iuseleva: ‘Wanem nao mining bilong hem? Why nao mi iusim long tok bilong mi? Wanem nao maet audience askem olketa seleva abaotem disfala verse?’ Maet iu need for ting raonem wanem olketa verse wea stap raonem talem, olketa samting wea go ahed long datfala taem, samting wea lead go long datwan, paoa bilong olketa word, and goal bilong man wea raetem. Diswan needim research. Bae iu faendem staka gudfala information insaed long olketa pablikeson wea “faithful and wise slave” provaedem. (Matt. 24:45-47) No trae for explainim evri samting abaotem datfala verse, bat explainim wei wea hem join witim point wea iu storyim.

Tokpiksa. Goal bilong olketa tokpiksa hem for helpem audience for kasem mining wea moa deep or for helpem olketa rememberim wanfala point or principle wea iu storyim finis. Olketa tokpiksa helpem pipol for joinim samting iu talem witim samting olketa savve finis long hem. Hem nao samting wea Jesus duim taem hem givim Sermon long Maunten. “Olketa bird bilong heven,” “olketa lily flaoa long field,” “smolfala gate,” wanfala “smolfala road,” wanfala “haos antap long ston,” and planti toktok olsem, mekem teaching bilong hem garem paoa, klia, and hard for forgetim.—Matt., chap. 5–7.

Hao for Followim. Wei for explainim and givim example for wanfala scripture bae givim savve, bat for followim datfala savve nao bae mekem man kasem gud samting. Tru, hem responsibility bilong olketa long audience for duim samting followim message bilong Bible, bat iu savve helpem olketa for luksavve long wanem nao olketa need for duim. Bihaen iu feel sure hao audience minim datfala verse and minim wei wea hem join witim point wea iu mekem, spendem lelebet taem for showim olketa wei wea datwan affectim biliv and fasin. Mekhae long olketa gudfala samting wea bae kamaot from wei for lusim olketa rongfala idea or fasin wea no followim truth wea iu storyim.

Taem iu ting raonem hao nao audience savve followim olketa scripture, remember hao olketa kam from planti difren kaen living and feisim staka difren samting. Maet samfala long olketa niu, young, olo, and stragol witim olketa difren kaen problem. Mekem tok bilong iu samting for helpem pipol and followim really samting long laef. Stap klia long wei for givim kaonsel wea luk olsem iu markem for tu-thri man nomoa.

Olketa Disison Bilong Speaker

Samfala disison abaotem tok bilong iu olketa disaedem finis. Olketa main point, and haomas taem iu garem for storyim each main heding olketa raetem klia. Iu nao savve mekem olketa nara disison. Maet iu chus for spendem moa taem long samfala subpoint winim olketa narawan. No tingse taem iu markem for storyim evri subpoint mas semsem. Maet datwan mekem iu for kwiktaem tumas long datfala information and audience bae hard for minim. Hao nao iu savve disaed which wan for storyim gud and which wan for talem kwiktaem? Askem iuseleva: ‘Wanem nao olketa point wea bae helpem mi teachim main idea bilong tok? Which wan long olketa nao savve barava helpem audience bilong mi? Waswe, for no iusim wanfala scripture and point wea join witim datwan bae mekem tok no garem wanem hem needim for kasem goal bilong hem?’

Barava careful for no talem samting wea no garem eni pruv or tingting bilong iuseleva. Nomata Son bilong God, Jesus Christ, hem stap klia long wei for talem ‘samting bilong hemseleva.’ (John 14:10) Luksavve hao reason for pipol kam long olketa meeting hem for herem story abaotem Bible. Sapos pipol start for tingim iu olsem wanfala gudfala speaker, planti taem diswan hem bikos hem fasin bilong iu for mekhae no long iuseleva bat long Word bilong God. From diswan, pipol tinghae long olketa tok bilong iu.—Phil. 1:10, 11.

From iu mekem wanfala aotlaen nomoa for kamap wanfala barava interesting tok for minim olketa scripture, iu need for practicem tok bilong iu. Hem help for practicem big. Important samting hem for mek sure iu savve gud long evri point. Iu mas fit for story witim fasin for biliv strong, mekem information kamap interesting and givim long wei wea showaot iu barava hapi for sharem datfala truth. Bifor iu givim tok bilong iu, askem iuseleva: ‘Wanem nao mi hope for duim? Waswe, olketa main point showaot klia? Waswe, mi barava mekem olketa scripture for kamap olsem faondeson bilong tok bilong mi? Waswe, each main point lead go long next wan? Waswe, tok buildimap wei for tinghae long Jehovah and olketa samting hem provaedem? Waswe, conclusion hem barava join witim theme, showim audience wanem nao for duim, and muvim olketa for duim datwan?’ Sapos iu savve sei yes long olketa kwestin hia, then iu fit for ‘duim gud samting witim savve,’ for helpem kongregeson and praisem Jehovah!—Prov. 15:2.