Stretfala Wei for Talem Word

NO EVRI Christian kasem gudfala education. Nomata aposol Peter and aposol John tu, pipol talem hao tufala “no skul gud, and man nating.” (Acts 4:13) Nomata olsem, hem important for no spoelem wei wea pipol ting long Bible message wea iu talem from iu no talem olketa word long stretfala wei.

Olketa Samting for Tingim. Olketa rul long hao for talem olketa word hem difren for each languis. Planti languis iusim olketa alphabet leta long raeting. Iumi garem Latin alphabet, and tu, olketa nara alphabet olsem Arabic, Cyrillic, Greek, and Hebrew. Olketa no iusim alphabet for raetem Chinese languis, bat olketa iusim olketa character wea garem olketa difren part bilong hem. Planti taem olketa character stand for wanfala word or part bilong word. Nomata olketa long Japan and Korea iusim olketa Chinese character, maet olketa iusim for raetem olketa difren saond and maet olketa no garem sem mining.

Long olketa languis wea garem alphabet, for talem word long stretfala wei iu mas iusim stretfala saond for each leta or sekson bilong olketa leta. Taem wanfala languis followim olketa rul wea no change, olsem Greek, Spanish, and Zulu, hem no hard tumas. Nomata olsem, from olketa nara kantri affectim wanfala languis maet diswan mekem wei for talem word hem followim ples wea datfala word hem kam from. From diswan, iu savve talem wanfala leta or sekson bilong olketa leta long samfala difren wei or, samfala taem no talem eni saond for hem. Maet iu need for rememberim olketa wei for talem wea maet iu no duim planti taem and then iusim olketa evritaem long toktok bilong iu. Long Chinese languis, stretfala wei for talem word needim man for rememberim planti thousand character. Long samfala languis mining bilong word hem change taem man iusim difren saond. Wei for no tingim tumas disfala samting saed long languis savve mekem man talem olketa rong idea.

Sapos olketa word long wanfala languis garem olketa syllable, hem important for strongim barava main syllable. Planti languis wea iusim wei olsem followim sem wei for talem olketa syllable. Long taem wea hem no fitim for followim wei olsem, olketa putim mark for showim wanem nao for strongim. Diswan help for mekem hem isi for talem olketa word long stretfala wei. Bat, sapos disfala wei hem no semsem, problem bae moa hard. For win, man need for rememberim staka samting.

Long samfala languis, olketa diacritic nao barava important samting for tingim. Olketa diacritic hem olketa mark antap and andanit long samfala leta bilong alphabet, olsem: è, é, ô, ñ, ō, ŭ, č, ö, ç. Maet olketa putim olketa diacritic mark hia long raeting, or man wea read maet need for talem fitim mining bilong datfala word insaed long sentence.

Saed long wei for talem olketa word, iu need for careful long samfala samting. Wei for ova tumas for talem word stret savve mekem pipol tingse iu apim iuseleva. Hem semsem tu sapos iu talem word long wei wea pipol no iusim distaem. Bae diswan mekem evriwan tingim speaker nomoa. Long narasaed, hem gud for stap klia long wei for lesy long toktok and long wei for talem olketa word. Samfala long olketa hia iumi storyim finis anda long “Talem Klia Olketa Word.”

Stretfala wei for talem olketa word bilong wanfala languis maet no semsem long olketa difren kantri, and long difren part bilong sem kantri tu. Man from nara kantri maet toktok long sem languis bat hem saond difren. Olketa dictionary maet showim winim wanfala wei for talem word. Hem bae barava help sapos man wea no kasem gudfala education or wea distaem iusim difren languis, lisin gud long olketa wea talem klia languis bilong datfala ples and then trae for copyim wei wea olketa talem olketa word. Olsem Olketa Jehovah’s Witness, iumi laek for toktok long wei wea honorim message wea iumi preachim and wea pipol long ples bilong iumi bae isi for minim.

Long toktok wea iu iusim evriday, hem moabeta for iusim olketa word wea iu savve gud long olketa. Bae iu no garem problem long hao for talem olketa word taem iu story nating nomoa. Bat, taem iu read big, maet iu kam long samfala word wea iu no iusim evritaem. And Olketa Jehovah’s Witness duim staka reading wea narawan lisin long hem. Iumi readim Bible long pipol taem iumi witness long olketa. Samfala brata garem assignment for readim olketa paragraf long Wastaoa Study or long Kongregeson Buk Study. Hem important for reading bilong iumi mas stret and for no spoelem datfala message long wei for talem rong olketa word.

Waswe, iu faendem hem hard for talem samfala nem insaed long Bible? Long English, olketa putim mark bihaen long syllable wea reader shud strongim. Sapos syllable wea iu mas strongim hem end witim wanfala vowel, wei wea iu talem datfala vowel mas long lelebet. Sapos wanfala syllable hem end witim wanfala consonant, then wei wea iu talem vowel insaed long datfala syllable bae no long tumas. Taem tufala vowel a and i stap tugeta, olsem long Morʹde·cai and Siʹnai, iu talem ai olsem wanfala longfala i saond. Wei wea iu talem ch saond long nem Rachel hem followim English wei for talem ch saond, bat evri nara ch, iu mas talem olsem wanfala strongfala k saond, olsem long Mel·chizʹe·dek.

Olketa Wei for Kamap Moabeta. Planti pipol no savve olketa no talem word long stretfala wei. Sapos skul overseer showim iu samfala wei wea iu no talem stret olketa word, tinghae long kaenfala fasin bilong hem. Taem iu savve long problem bilong iu, hao nao iu savve kamap moabeta long hem?

First samting, taem iu garem wanfala assignment for read big, mek sure iu iusim wanfala dictionary. Lukim olketa word insaed wea iu no savve long hem. Sapos iu no savve gud hao for iusim dictionary, lukim olketa firstfala page for minim olketa symbol insaed or, sapos iu needim, askem samwan for minim long iu. Dictionary bae showim iu wanem for strongim long word wea garem winim wanfala syllable and wea moa for strongim long word wea moa long. Hem bae showim wanem saond for iusim for olketa vowel and olketa consonant long wanfala word. Samfala taem, iu savve talem samfala word winim wanfala wei and diswan hem depend long why nao iu iusim datfala word. Nomata wanem word iu lukim, talem big datfala word tu-thri taem bifor iu satem dictionary.

Mek-tu wei for kamap moabeta long hao for talem olketa word, hem long wei for read long narawan—samwan wea savve gud hao for talem olketa word—and askem hem for stretem iu taem iu talem word rong.

Mek-thri wei for kamap moabeta hem for lisin gud long olketa gudfala speaker. Sapos iu savve kasem olketa audiokaset for New World Translation or Wastaoa and Wekap! magasin, iusim olketa for helpem iu. Taem iu lisin, tingim olketa word wea reader talem difren from wei wea iu talem. Raetem daon, and practicem olketa. Gogo, toktok bilong iu bae no garem eni mistek, and diswan bae barava helpem wei wea iu story.