PIPOL long samfala ples maet iusim moa akson winim pipol from nara ples. Bat, klosap evriwan changem lukluk bilong feis and duim samfala akson taem olketa story. Diswan hem tru taem man hem story wanwan and taem hem givim tok long pablik.

Hem wei bilong Jesus and olketa firstfala disaepol bilong hem for iusim akson. Wantaem, samwan talem Jesus hao mami and olketa brata bilong hem want for story witim hem. Jesus hem ansa: “Hu nao mami bilong mi, and hu nao olketa brata bilong mi?” Then Bible sei moa: “Hem point go long olketa disaepol bilong hem, and sei: ‘Lukim! Mami bilong mi and olketa brata bilong mi!’” (Matt. 12:48, 49) Bible showimaot long Acts 12:17 and 13:16 and samfala nara scripture, hao hem wei bilong aposol Peter and Paul tu for iusim akson.

Man savve showimaot olketa idea and feeling no long wei for iusim voice nomoa, bat tu long wei for iusim akson and lukluk bilong feis. For fail for iusim olketa long gudfala wei maet mekem pipol tingse datfala speaker hem no mas interest. Bat taem olketa wei for story hia join gud tugeta, hem barava mekem datfala toktok moabeta. Nomata taem iu story long telephone, sapos iu iusim akson and lukluk bilong feis wea fitim, voice bilong iu bae showaot wei wea message bilong iu hem important and tu feeling bilong iu abaotem samting wea iu talem. So, nomata iu toktok from wanfala aotlaen or iu readim samting, nomata audience lukluk long iu or olketa luk followim Bible bilong olketa seleva, akson and lukluk bilong feis hem important.

Akson and lukluk bilong feis wea iu iusim mas olsem wei bilong iu, hem no samting man savve lanem followim wanfala buk. Iu no study for lanem hao for laflaf or kros. And tu, olketa akson mas showimaot olketa feeling bilong iu. Olketa best wan nao hem akson wea hem wei bilong iu.

Tufala difren kaen akson stap: akson for minim samting and akson for strongim point. Akson for minim samting hem showimaot size and ples. Taem iu waka long disfala point long skul, no satisfae long wan or tufala akson nomoa. Trae for iusim akson olsem iu duim evritaem, long full tok bilong iu. Sapos hem hard long iu, maet hem helpem iu for lukaotem olketa word wea showim wanem wei for go, farawe, size, ples, or wei for markem nara samting. Bat, planti taem, only samting iu need for duim hem for barava interest long tok bilong iu, no warim hao pipol ting long iu, bat talem and duim samting olsem wei bilong iu evriday. Taem man feel relax, hem wei bilong hem for duim akson.

Akson for strongim point showimaot feeling and wei for biliv strong. Olketa markem, strongim, and givim paoa long olketa idea. Akson for strongim point hem important. Bat lukaot! Diskaen akson for strongim point hem isi tumas for kamap olsem wei bilong man nomoa. Sapos iu iusim sem akson evritaem, pipol maet tingim datwan nomoa and bae hem no mekem tok bilong iu kamap moabeta. Sapos skul overseer sei iu garem disfala problem, firstaem trae for iusim nomoa olketa akson for mining samting. Bihaen lelebet taem, start for iusim moa olketa akson for strongim point.

For disaed haomas akson for strongim point nao iu shud iusim and wanem kaen akson hem fitim, tingim feeling bilong audience bilong iu. For point go long audience maet mekem olketa feel nogud. Long samfala ples, sapos wanfala man duim samfala akson, olsem kavarem mouth witim hand for showimaot hem sapraes, pipol maet tingse hem garem fasin olsem wanfala woman. Long samfala ples long world, pipol bae ting long wanfala woman olsem ova tumas sapos hem duim akson witim hand bilong hem. So long ples olsem, olketa sista need for iusim gud lukluk bilong feis. And long klosap evri ples long world, wei for ova tumas for iusim akson front long smolfala grup maet fani long olketa.

Taem iu kasem moa savve and no feel fraet for story, eni akson for strongim point wea iu iusim bae showimaot feeling bilong iu, and showimaot iu barava biliv strong. Diswan bae mekem toktok bilong iu garem moa mining.

Lukluk Bilong Feis Bilong Iu. Winim eni nara part long body, feis nao planti taem showimaot really feeling bilong iu. Eye bilong iu, sheip bilong mouth and wei wea iu bendim hed, evri samting hia duim part bilong hem. Nomata iu no talem eniting, feis bilong iu savve showimaot feeling for no interest, heit, konfius, sapraes, or hapi. Taem kaen lukluk bilong feis olsem join witim toktok, hem mekem samting wea iu talem affectim feeling bilong audience. Creator hem putim bigfala namba bilong olketa masol long feis bilong iu—winim 30. Taem iu smile iu iusim klosap haf long olketa masol hia.

Nomata iu long platform or iu long field ministry, goal hem for sharem wanfala naesfala message, wea savve mekem heart bilong pipol hapi. Wanfala kaenfala smile hem strongim datwan. Long narasaed, sapos feis bilong iu no showimaot eni feeling, pipol maet tingse iu no really bilivim samting iu kam for talem.

Winim datwan, wei for smile hem showimaot kaenfala feeling long nara pipol. Datwan hem barava important, especially long distaem wea planti pipol fraet long olketa stranger. Smile bilong iu savve helpem pipol for feel isi and moa willing for herem samting wea iu talem.

EYE bilong iumi showimaot tingting and feeling bilong iumi. Hem maet showimaot sapraes or fraet. Hem maet showimaot fasin for kea or love. Long samfala taem, eye maet showimaot daot or sorre. Taem wanfala olo man storyim pipol long kantri bilong hem wea safa long bigfala wei, hem sei: “Mifala story witim eye bilong mifala.”

Hao nara pipol ting long iumi and samting iumi talem hem maet from wea nao iumi lukluk taem iumi story. Long planti ples, pipol trustim man wea long kaenfala wei, hem go ahed for luk long eye bilong olketa. Long narasaed, olketa maet daotem honest fasin or savve bilong wanfala man wea lukluk long leg bilong hemseleva or nara samting winim wei for lukluk long man wea hem story witim. Long samfala nara ples pipol ting long wei for barava luk long eye bilong man olsem wei for no showimaot respect, raf, or laek winim man. Diswan hem barava tru taem man hem story witim samwan long opposite sex or long wanfala chief or bigman. And long samfala area, sapos wanfala young wan hem lukluk long eye bilong wanfala wea olo taem hem story, pipol bae tingse hem no showimaot respect.

Bat, sapos hem fitim for duim, for lukluk long eye bilong man taem iu talem important samting savve strongim toktok bilong iu. Pipol maet tingse datwan showimaot speaker biliv strong long samting wea hem talem. Lukim ansa bilong Jesus taem olketa disaepol bilong hem showimaot bigfala sapraes and ask: “Hu nao savve sev?” Bible story olsem: “Jesus luk long feis bilong olketa, and sei: ‘Long olketa man diswan hem hard tumas, bat long God evri samting hem isi nomoa.’” (Matt. 19:25, 26) Bible showim tu hao aposol Paul interest tumas for lukim feeling bilong audience bilong hem. Wantaem, wanfala man wea born kam cripple hem stap taem Paul hem story. Acts 14:9, 10 talem: “Disfala man hem lisin taem Paul hem story, and taem Paul lukluk strong long hem and lukim hem garem faith for gud bak moa, hem sei long bigfala voice: ‘Standap stret long leg bilong iu.’”

Olketa Idea for Field Ministry. Taem iu share insaed field service, showimaot feeling and kaenfala fasin long pipol wea iu meetim. Sapos hem fitim, for startim story iusim olketa kwestin wea pullim interest bilong haosholder abaotem samting wea maet iutufala evriwan interest long hem. Taem iu duim diswan, trae for lukluk long eye bilong hem—or lukluk long feis bilong hem long kaenfala wei wea showimaot respect. Wanfala kaenfala smile long feis bilong man wea eye bilong hem showimaot hapi, hem luk naes tumas. Kaen lukluk olsem maet mekem datfala man luksavve wanem kaen man nao iu and helpem hem for feel moa isi taem iufala story tugeta.

Long taem wea fitim, wei for lukim wanem nao showaot long eye bilong datfala man, maet mekem iu savve wanem nao best samting for duim. Sapos man hem kros or barava no interest, iu maet fit for lukim datwan. Sapos hem no minim iu, iu maet luksavve long datwan. Sapos hem start for no patient, iu shud fit for luksavve. Sapos hem barava interest, diswan tu bae showaot. Lukluk long eye bilong hem maet mekem iu luksavve iu need for changem fast bilong toktok bilong iu, for trae moa hard for mekem hem join insaed datfala story, for finisim datfala story, or maet, for duim demonstration long hao for studyim Bible.

Nomata iu duim pablik witnessing waka or iu conductim wanfala hom Bible study, long wei wea showimaot respect trae for go ahed lukluk long eye bilong man wea iu story witim. Bat, no lukluk strong long hem, from datwan bae mekem hem feel shame. (2 Ki. 8:11) Bat long kaenfala wei, planti taem lukluk long feis bilong datfala man. Long planti kantri, diswan showimaot feeling bilong trufala interest. Hem tru, taem iu readim Bible or narafala pablikeson, eye bilong iu bae lukluk long page bilong datfala buk. Bat for strongim wanfala point, iu savve luk stret long datfala man, bat no for longfala taem. Sapos iu luk ap samfala taem, diswan bae mekem iu fit for lukim hao nao hem feel abaotem samting wea iu readim.

Sapos fasin for shame mekem hem hard for iu luk long audience, no givap. Sapos iu practice, for luk long audience long wei wea fitim savve kamap isi for duim, and hem maet mekem wei wea iu story witim narafala pipol kamap moabeta.