“Hour Bilong Judgment” Hem Kam Finis

REVELATION, datfala last buk insaed Bible, talem iumi hao wanfala angel wea flae long skae garem “gud nius for olowe for talemaot olsem hapi nius.” Hem tok big and sei: “Fraet long God and givim glory long hem, from hour bilong judgment bilong hem kam finis nao.” (Revelation 14:6, 7) Datfala “hour bilong judgment” hem taem wea God talemaot and givim judgment. Wanfala “hour” hem short taem nomoa. Datfala taem for givim judgment endim “olketa last day” wea iumi stap insaed distaem.—2 Timothy 3:1.

For pipol wea lovem raeteous fasin, datfala “hour bilong judgment” hem barava gud nius. Hem taem wea God bae sevem olketa servant bilong hem wea safa from disfala raf world wea pipol no garem love.

Bifor datfala “hour bilong judgment” hem end witim wei wea God finisim disfala wicked world, iumi kasem encouragement distaem for: “Fraet long God and givim glory long hem.” Waswe, iu gohed for duim datwan? Diswan hem minim moa samting winim wei for sei, “Mi biliv long God.” (Matthew 7:21-23; James 2:19, 20) Stretfala wei for fraet long God shud mekem iumi showimaot respect long hem. Hem shud mekem iumi no duim nogud fasin. (Proverbs 8:13) Hem shud helpem iumi for lovem gud samting and heitim nogud samting. (Amos 5:14, 15) Sapos iumi honorim God, iumi bae lisin long hem long wei wea showimaot bigfala respect. Iumi bae no missim wei for readim Bible evritaem from iumi busy tumas for duim nara samting. Iumi bae trustim hem evritaem and witim full heart bilong iumi. (Psalm 62:8; Proverbs 3:5, 6) Olketa wea barava honorim hem luksavve hao hem nao Creator bilong universe and earth, hem nao datfala Sovereign Bilong Universe, and long loving wei olketa willing for stap anda long hem olsem Datwan wea garem right for rulim olketa. Sapos iumi luksavve hao iumiseleva need for duim moa samting abaotem diswan, iumi mas no delay for duim.

Datfala taem wea judgment bae happen wea angel hia storyim, Bible kolem tu “day bilong Jehovah.” Kaen “day” olsem hem kasem tu olketa long Jerusalem long 607 B.C.E. bikos pipol long there no laek herem warning bilong Jehovah wea hem talem thru long olketa profet bilong hem. Taem olketa tingse day bilong Jehovah hem farawe yet, olketa putim laef bilong olketa long danger. Jehovah warnim olketa finis: “Hem klosap nao, and hem hariap tumas.” (Zephaniah 1:14) Narafala “day bilong Jehovah” hem kasem Babylon long 539 B.C.E. (Isaiah 13:1, 6) From olketa bilong Babylon trustim olketa strongfala wall and god bilong olketa, olketa no laek herem warning wea olketa profet bilong Jehovah talemaot. Gogo insaed wanfala naet, olketa bilong Media and Persia tekova long Babylon.

Wanem nao iumi feisim distaem? Narafala “day bilong Jehovah” wea bae affectim full world. (2 Peter 3:11-14) God talemaot finis judgment long “Bigfala Babylon.” Long Revelation 14:8, wanfala angel hem sei: “Bigfala Babylon hem foldaon.” Datwan hem happen finis. Distaem hem no garem eni paoa for stopem olketa wea worshipim Jehovah. Raverave fasin bilong hemseleva and wei wea hem join insaed war hem showaot klia finis. Klosap nao hem bae distroe evribit. From datwan, Bible talem pipol evriwea: “Go aot from hem [Bigfala Babylon] . . . sapos iufala no want for share witim hem long olketa sin bilong hem, and sapos iufala no want for kasem eni trabol bilong hem. From olketa sin bilong hem barava hipap go kasem heven, and God tingim moa evri samting wea hem duim wea no followim justice.”—Revelation 18:4, 5.

Wanem Nao Bigfala Babylon? Hem nao olketa religion evriwea long world wea garem olketa sem fasin olsem Babylon bifor. (Revelation, chapter 17, 18) Tingim samfala samting hia wea semsem:

• Olketa priest bilong Babylon bifor join insaed politik bilong kantri. Diswan semsem tu witim planti religion distaem.

• Olketa priest bilong Babylon planti taem sapotim olketa war wea Babylon faet insaed. Olketa religion distaem tu main wan for blessim olketa soldia taem olketa kantri faet.

• Olketa teaching and samting wea Babylon bifor duim hem mekem datfala kantri for duim barava dirty fasin. Taem olketa leader bilong olketa religion distaem no followim olketa mark bilong Bible saed long fasin, dirty fasin kamap big tumas midolwan olketa bigman bilong church and tu olketa wea go long church. Samting for tingim tu hem wei wea Revelation kolem Bigfala Babylon wanfala jury woman from hem act olsem jury woman witim disfala world and olketa politik.

• Bible talem tu hao Bigfala Babylon hem “no feel guilty for garem living wea barava ova tumas.” Long Babylon bifor, sekson wea organizem temple kasem staka land tumas, and olketa priest kamap olketa bigman saed long bisnis. Bigfala Babylon distaem garem planti ples for worship, and staka bisnis and land. Olketa teaching and holiday wea hem markem mekem hemseleva and olketa nara bisnis long world barava rich.

• Wei for iusim olketa image and magic hem big tumas long Babylon bifor, olsem long planti ples distaem tu. Olketa bilivim hao dae hem road for kasem wanfala narakaen laef. Babylon fulap witim olketa temple and church wea givim honor for olketa god bilong hem, bat pipol bilong Babylon againstim olketa wea worshipim Jehovah. Olketa sem samting hia tu Bigfala Babylon hem duim.

Long bifor, Jehovah iusim olketa kantri wea garem strongfala gavman and army for panisim olketa wea gohed for no tingim hem and will bilong hem. Dastawe olketa bilong Assyria distroem Samaria long 740 B.C.E. Olketa bilong Babylon distroem Jerusalem long 607 B.C.E., and tu, olketa bilong Rome distroem Jerusalem long 70 C.E. Olketa bilong Media and Persia tekova long Babylon long 539 B.C.E. Long taem bilong iumi, Bible hem talem finis hao olketa gavman olsem wanfala wild animal, bae attakim datfala “jury woman” and mekem hem naked, and showimaot really fasin bilong hem. Olketa bae distroem hem evribit.—Revelation 17:16.

Waswe, olketa gavman long world bae really duim datwan? Bible sei bae ‘God putim datfala tingting insaed heart bilong olketa.’ (Revelation 17:17) Diswan bae seknomoa happen, pipol bae sapraes, and seke. Bae hem no samting wea isisi kamap or wea pipol savve hem bae kamap.

Wanem nao iu need for duim? Askem iuseleva: ‘Waswe, mi still join long wanfala religion wea garem olketa teaching wea mekem hem part long Bigfala Babylon?’ Nomata iu no join long wanfala religion, iu savve askem iuseleva: ‘Waswe, mi letem kaen tingting bilong Bigfala Babylon for affectim mi?’ Wanem kaen tingting? Kaen tingting for acceptim dirty fasin, lovem material samting and hapitaem winim wei for lovem God, or wei for chus for no followim (nomata long smol samting) Word bilong Jehovah. Tingting gud bifor iu ansa.

For Jehovah hapi long iumi, hem important for samting iumi duim and samting wea heart bilong iumi wantem showimaot iumi barava no part long Bigfala Babylon. Iumi mas no delay. Bible warnim iumi hao end bae happen kwiktaem taem hem sei: “Long wei for kwiktaem torowem, hem nao hao olketa bae torowem go daon Babylon datfala bigfala taon, and no eniwan savve faendem hem moa.”—Revelation 18:21.

Bat olketa nara samting tu bae happen. Nara samting wea bae happen insaed datfala “hour bilong judgment,” hem wei wea Jehovah God bae judgem olketa politik bilong disfala world and olketa ruler bilong hem, and tu evriwan wea no laek luksavve long right wea hem garem for rul thru long Kingdom bilong hem long heven wea hem givim long Jesus Christ. (Revelation 13:1, 2; 19:19-21) Datfala profesi vision long Daniel 2:20-45 showim wanfala bigfala image wea olketa wakem from gold, silver, copper, iron, and clay wea piksarem olketa politik rul start kam from taem bilong Babylon bifor kam kasem distaem. Profesi hia sei olsem abaotem taem bilong iumi: “God bilong heven bae startim wanfala kingdom wea bae nating savve finis.” And hem sei olsem abaotem samting wea datfala Kingdom bae duim long “hour bilong judgment” bilong Jehovah: “Hem bae smasem and finisim evri kingdom hia [wea man wakem], and hemseleva nao bae stap olowe.”—Daniel 2:44.

Bible warnim olketa tru worshiper againstim wei for lovem “olketa samting insaed long world”—living wea world hia tinghae long hem bat wea trufala God no laekem. (1 John 2:15-17) Waswe, olketa samting wea iu disaedem and duim showimaot iu sapotim evribit datfala Kingdom bilong God? Waswe, iu really putim diswan olsem first samting long laef bilong iu?—Matthew 6:33; John 17:16, 17.

[Box long page 14]

Wanem Taem Nao End Bae Kam?

“Long hour wea iufala no tingim, Son bilong man bae kam nao.”—Matthew 24:44.

“Gohed for luk aot gud from iufala no savve long datfala day or hour.”—Matthew 25:13.

“Hem bae no leit.”—Habakkuk 2:3.

[Box long page 14]

Waswe, Bae Hem Changem Laef Bilong Iu Sapos Iu Savve?

Sapos iu barava sure judgment bilong God bae no happen for longfala taem yet, waswe, bae datwan mekem iu changem wanem iu duim long laef bilong iu distaem? Sapos end bilong disfala world hem longtaem winim wanem iu expectim, waswe, iu letem datwan mekem iu isisi insaed service bilong Jehovah?—Hebrews 10:36-38.

Wei wea iumi no savve long barava taem bae givim iumi chance for showimaot iumi servem God from stretfala reason nao muvim iumi. Olketa wea savve long Jehovah luksavve hao wei for showimaot strong for Jehovah no longtaem bifor end, bae no mekem God acceptim olketa, from hem lukim finis samting wea stap long heart.—Jeremiah 17:10; Hebrews 4:13.

Jehovah bae olowe first samting insaed laef bilong olketa wea really lovem hem. Olketa tru Christian savve waka for selen olsem nara pipol tu. Bat, olketa no ting for kamap rich, olketa laek kasem inaf selen for kaikai and kaleko and haos and lelebet extra for sharem witim narawan. (Ephesians 4:28; 1 Timothy 6:7-12) Olketa enjoyim tu gudfala hapitaem and wei for duim difren samting samfala taem, bat long tingting bilong olketa diswan hem for strongim olketa nomoa, no for followim samting wea evri narawan duim. (Mark 6:31; Romans 12:2) Olsem Jesus Christ, olketa hapi for duim will bilong God.—Psalm 37:4; 40:8.

Olketa tru Christian laek for laef and servem Jehovah for olowe. Nomata olketa mas weit lelebet longtaem winim wanem olketa expectim for kasem samfala blessing, datfala hope no kamap samting wea no important long olketa.

[Box/Piksa long page 15]

Kwestin Abaotem Sovereign Rul

For minim why God letem wei for safa gohed, iumi need for minim kwestin abaotem sovereign rul. Wanem nao sovereign minim? Hem minim paoa for rul wea hae winim eni narawan.

From Jehovah hem Creator, hem garem right for rul ovarem earth and evriwan wea stap insaed. Bat, Bible explainim hao long start bilong history bilong olketa man, wanfala kwestin kamap againstim sovereign rul bilong Jehovah. Satan sei Jehovah hem strict tumas, and hem laea long first parents bilong iumi abaotem samting wea bae kasem olketa sapos olketa followim tingting bilong olketa seleva and no followim law bilong God. Hem sei tu hao bae hem moabeta sapos olketa rulim olketa seleva long wei wea independent from God.—Genesis, chapter 2, 3.

Sapos long datfala taem God distroem olketa hia wea bighed, datwan bae showimaot hem garem strongfala paoa, bat bae hem no stretem datfala kwestin wea Satan mekem kamap. So winim wei for distroem olketa, Jehovah letem olketa man and olketa angel for lukim wanem nao bae kamap from kaen bighed fasin olsem. Nomata diswan mekem wei for safa kamap, bat diswan givim chance for iumi born tu.

And nomata hem mas givim barava big samting, Jehovah showimaot love taem hem provaedem wanfala wei wea bae mekem man wea obey and showimaot faith long ransom sakrifaes bilong Son bilong hem, savve kamap free from sin and olketa samting wea kamaot from sin and stap insaed wanfala Paradaes. And tu, man savve kasem diswan thru long resurrection sapos hem dae.

From God givim taem for ansarem datfala kwestin, olketa servant bilong God garem chance for showimaot hao olketa savve duim samting followim love wea God showimaot and for pruvim hao olketa faithful long Jehovah nomata wanem happen. Disfala kwestin abaotem sovereign rul bilong God, and nara kwestin wea join witim datwan abaotem faithful fasin bilong olketa man hem mas kasem ansa, bikos diswan nomoa bae mekem stretfala wei for respectim olketa law long universe for kamap. Sapos nomoa, tru peace bae no stap.a

[Footnote]

[Piksa]

Evri rul bilong politik long world bae finis