Olketa Marit wea God and Olketa Man Respectim

“Wanfala marit feast kamap long Cana .  . . Jesus and olketa disaepol bilong hem tu kasem invitation for go long datfala marit feast.”​—JOHN 2:​1, 2.

1. Datfala story abaotem Jesus long Cana hem showimaot wanem samting?

JESUS, mami bilong hem, and samfala disaepol bilong hem savve hao taem pipol bilong God marit long wei wea showimaot respect, hem mekem hapi kamap. Christ mekem wanfala marit long Cana hem nambawan taem hem duim firstfala mirakol bilong hem long there, wea mekem pipol barava enjoyim datfala marit. (John 2:​1-​11) Maet iu attendim and enjoyim olketa marit bilong olketa Christian wea laek for worshipim Jehovah tugeta olsem hasband and waef. Or maet iu luk forward for garem marit olsem or for helpem wanfala fren planim marit bilong hem. Wanem nao savve mekem datfala day gohed gud?

2. Wanem information nao stap insaed long Bible abaotem olketa marit?

² Olketa Christian faendem hao advaes wea stap insaed Word bilong God hem barava helpem wanfala man and woman wea plan for marit. (2 Timothy 3:​16, 17) Hem tru, Bible no talem evri arrangement for duim saed long wanfala Christian marit. Iumi no sapraes long diswan bikos olketa kastom and law hem difren long each ples and hem difren long taem bifor and distaem. Olsem example, long Israel bifor, olketa wea marit no duim wanfala marit ceremony. Day wea tufala marit, man hem tekem gele long haos bilong hem or haos bilong dadi bilong hem. (Genesis 24:67; Isaiah 61:10; Matthew 1:​24) Wei for duim diswan hem showimaot long nara pipol hao tufala marit nao, nomata olketa no duim wanfala ceremony olsem plande pipol duim distaem.

3. Wanem samting nao Jesus attendim long Cana?

³ Olketa Israelite luksavve hao wei for duim diswan hem minim tufala marit nao. Bihaen datwan, maet olketa attendim wanfala marit feast olsem John 2:1 storyim. (Matthew 22:​2-​10; 25:10; Luke 14:8) Bible hem showimaot klia hao Jesus attendim wanfala marit feast bilong olketa Jew and hem duim samting for mekem pipol barava enjoyim datwan. Wanfala important point nao hem hao wanfala marit long taem bilong Jesus hem difren from olketa marit distaem.

4. Samfala Christian chus for garem wanem kaen marit, and why nao olsem?

⁴ Long plande kantri distaem, olketa Christian wea laek for marit mas duim samfala samting firstaem saed long law. Bihaen olketa duim datwan, olketa savve marit long eni wei wea fitim law. Maet datwan hem wanfala smol simpol ceremony front long wanfala minister bilong religion wea Gavman markem or wanfala magistrate. Samfala chus for marit olsem, and maet olketa askem samfala relative or Christian fren for kam olsem witness or for share long disfala hapi and important ceremony. (Jeremiah 33:11; John 3:​29) Olsem tu, maet olketa nara Christian chus for no garem wanfala marit feast wea big lelebet wea man bae needim plande selen and taem for planim gud. Bat maet olketa chus for garem wanfala smol marit feast witim samfala fren. Nomata wanem iumiseleva laekem saed long diswan, iumi shud luksavve hao olketa nara mature Christian maet garem difren tingting abaotem diswan.​—Romans 14:​3, 4.

5. Why nao plande Christian laek for garem Bible tok taem olketa marit, and wanem samting nao datfala tok hem storyim?

⁵ Plande Christian wea bae marit chus for garem wanfala Bible tok long marit ceremony bilong olketa.a Olketa luksavve hao Jehovah nao startim marit and hem provaedem wisefala advaes insaed Word bilong hem for helpem marit for win and mekem tufala hapi. (Genesis 2:​22-​24; Mark 10:​6-9; Ephesians 5:​22-​33) And plande Christian wea bae marit laekem olketa Christian fren and relative for share long disfala taem for hapi. Bat hao nao iumi mas ting long olketa difren kaen law, arrangement, and kastom long olketa difren ples? Disfala article bae storyim olketa difren wei wea pipol marit long olketa difren ples. Maet samfala barava difren from wanem iu savve or wanem iu duim long ples bilong iu. Nomata olsem, iu savve lukim samfala principle or point wea semsem long ples bilong iu wea important for olketa servant bilong God.

Marit wea Garem Respect Hem Followim Law

6, 7. Why nao iumi shud interest long olketa law saed long marit, and wanem nao iumi savve duim for showimaot diswan?

⁶ Nomata Jehovah nao startim marit, olketa gavman bilong man savve markem samfala samting wea olketa wea bae marit mas followim. Diswan hem stret. Jesus hem sei olsem: “Peim bak olketa samting bilong Caesar long Caesar, bat olketa samting bilong God long God.” (Mark 12:17) Aposol Paul tu talem olsem: “Evri soul shud stap anda long olketa gavman, from no eni gavman bae stap sapos God hem no letem; olketa wea garem paoa long distaem stap long position wea God letem olketa for stap long hem.”​—Romans 13:1; Titus 3:1.

⁷ Long plande kantri, Caesar, wea hem nao olketa gavman, disaedem hu nao fit for marit. So taem tufala Christian disaed for marit and no eni reason from Bible stopem datwan, olketa followim olketa law long ples wea olketa stap. Maet diswan hem wei for registerim marit front long wanfala man wea Gavman markem. Taem Caesar Augustus givim komand for pipol mas ‘register long wanfala census,’ Mary and Joseph followim datfala komand and travel go long Bethlehem for duim datwan.​—Luke 2:​1-5.

8. Marit hem for hao long, and wanem nao Olketa Jehovah’s Witness no duim wea showimaot olketa luksavve long datwan?

⁸ Taem tufala Christian marit long wei wea fitim law and hem stret, long eye bilong God tufala marit for olowe nao. Dastawe Olketa Jehovah’s Witness no need for duim eni nara samting saed long law or talem moa marit promis bihaen olketa marit for 25 or 50 year finis. (Matthew 5:​37) (Samfala church no acceptim wei for marit front long magistrate from olketa talem hao sapos wanfala priest or bigman long church no duim datfala marit, then datfala marit hem no stret.) Long plande kantri, gavman hem letem samfala minister bilong Olketa Jehovah’s Witness for duim olketa marit. Sapos olsem, olketa savve duim marit ceremony and marit tok long Kingdom Hall. Datwan hem ples bilong tru worship and ples wea fitim wanfala tok abaotem disfala arrangement wea Jehovah God nao startim.

9. (a) Sapos tufala Christian marit front long magistrate, wanem nao tufala maet chus for duim? (b) Hao nao maet olketa elder help saed long olketa marit plan?

⁹ Long olketa nara kantri, law hem sei olketa wea bae marit mas marit long wanfala office bilong gavman, or front long wanfala magistrate. Plande taem, olketa Christian wea marit olsem chus for garem wanfala marit tok bihaen datwan long Kingdom Hall long datfala sem day or long nextfala day. (Olketa bae no duim disfala Bible tok staka day bihaen olketa marit front long magistrate, bikos olketa marit finis front long God and olketa man, and Christian kongregeson tu.) Sapos tufala wea marit front long magistrate laek for garem tok long Kingdom Hall bihaen, olketa shud askem firstaem olketa elder long Kongregeson Service Komiti. Taem olketa elder luksavve olketa brata insaed kongregeson respectim tufala, olketa overseer bae mek sure datfala marit bae no affectim olketa meeting and nara arrangement long datfala Kingdom Hall. (1 Corinthians 14:33, 40) Olketa bae chekim tu plan bilong tufala for decoratem Kingdom Hall and disaed sapos olketa bae mekem wanfala announcement abaotem wei wea olketa bae iusim datfala hall.

10. Sapos tufala mas marit front long magistrate, hao nao diswan bae affectim marit tok?

¹⁰ Elder wea givim datfala marit tok bae duim best bilong hem for showimaot feeling, mekhae long spiritual samting, and showimaot respect insaed tok bilong hem. Sapos tufala marit front long magistrate firstaem, hem bae talem insaed tok hao tufala marit finis followim law bilong Caesar. Sapos tufala no talem marit promis long each other front long magistrate, olketa savve duim datwan bihaen datfala tok.b Sapos tufala talem promis long each other front long magistrate bat laek for talem moa promis bilong olketa front long Jehovah and long kongregeson, bae olketa talem long wei wea showimaot God “joinim [tufala] tugeta” finis.​—Matthew 19:6; 22:21.

11. Long samfala ples, hao nao man and woman savve marit, and hao nao datwan affectim marit tok?

¹¹ Long samfala ples, maet law sei tufala wea bae marit no need for garem eni marit ceremony, or for marit front long magistrate. Taem tufala tekem register pepa and saenem and givim long wanfala gavman office, tufala marit nao. Long semtaem, tufala kasem marit certificate. Taem tufala duim olsem, pipol ting long tufala olsem hasband and waef start long taem olketa kasem datfala certificate. Olsem iumi storyim bifor, tufala wea marit olsem maet laekem wanfala brata wea mature long spiritual wei for givim wanfala Bible tok stretawe bihaen diswan long Kingdom Hall. Hem bae talem evriwan wea attendim marit hao tufala marit finis taem tufala kasem marit certificate. Sapos tufala bae talem marit promis, olketa bae followim samting wea paragraf 10 and footnote storyim. Olketa wea kam long Kingdom Hall bae hapi witim tufala and kasem gud samting from kaonsel wea olketa herem from Word bilong God.​—Song of Solomon 3:​11.

Kastom Marit and Marit Front Long Magistrate

12. Wanem nao wanfala kastom marit, and wanem nao olketa wea marit olsem shud duim stretawe?

¹² Long samfala kantri, olketa savve duim kastom marit. Diswan no minim tufala stap tugeta nomoa bat no marit, wea long samfala kantri pipol acceptim diswan nomata hem no stret saed long law.c Kastom marit wea iumi story abaotem hem marit wea fitim kastom bilong tribe or ples. Maet insaed diswan hem wei for peim bride-price wea showimaot tufala marit saed long law and Bible. Gavman ting long kaen kastom marit olsem hem stret saed long law and hem for olowe. Bihaen, olketa savve registerim datfala kastom marit, and taem olketa duim datwan maet olketa kasem certificate from gavman. Wei for register savve protectim hasband and waef, or waef sapos hasband hem dae, and tu, eni pikinini wea tufala garem. Kongregeson bae encouragem eniwan wea duim kastom marit olsem for mas registerim datwan stretawe. Hem interesting for lukim hao anda long Law bilong Moses, olketa registerim olketa marit and registerim pikinini taem hem born.​—Matthew 1:​1-​16.

13. Bihaen long wanfala kastom marit, wanem nao hem fitim for duim saed long wanfala marit tok?

¹³ Tufala wea marit long kastom wei olsem kamap hasband and waef long taem bilong datfala marit. Olsem iumi storyim finis, olketa Christian wea marit olsem maet chus for garem wanfala marit tok and talem olketa marit promis long each other long Kingdom Hall. Sapos olketa duim datwan, speaker bae talem hao tufala marit finis followim olketa law bilong Caesar. Olketa bae garem wanfala tok nomoa. Hem wanfala marit, wea hem nao kastom marit, and wanfala Bible tok. Wei for duim tufala evriwan barava kwiktaem, maet long sem day, hem help for mekem pipol long community respectim Christian marit.

14. Wanem nao maet wanfala Christian duim sapos kastom marit and wei for marit front long magistrate hem stret?

¹⁴ Long samfala kantri wea hem stret saed long law for duim kastom marit, gavman mekem wei for pipol marit front long magistrate tu. Maet insaed diswan hem wei for talem marit promis and register. Samfala Christian wea bae marit laekem diswan winim wei for duim kastom marit. Olketa no need for duim kastom marit and for marit front long magistrate tu; tufala evriwan hem stret saed long law. Samting wea paragraf 9 and 10 talem abaotem marit tok and olketa marit promis hem fitim wei for marit front long magistrate tu. Main samting nao hem for tufala marit long wei wea God and olketa man respectim.​—Luke 20:25; 1 Peter 2:​13, 14.

Gohed Showimaot Respect Long Marit

15, 16. Hao nao evriwan shud showimaot respect long wanfala marit?

¹⁵ Taem problem kamap insaed marit bilong wanfala king bilong Persia, man for givim advaes long king, Memucan, talem samting wea savve mekem gud samting kamap​—hem nao ‘for evri waef mas respectim hasband bilong olketa.’ (Esther 1:​20) Insaed olketa Christian marit, datfala advaes no need for kam from eni king long earth; olketa waef laek for respectim hasband bilong olketa. Olsem tu, olketa Christian hasband showimaot respect long partner bilong olketa and praisem olketa. (Proverbs 31:11, 30; 1 Peter 3:7) Wei for showimaot respect insaed marit bilong iumi hem no samting wea iumi duim bihaen iumi marit for staka year finis. Hem mas start long taem iumi just marit.

¹⁶ Hem no datfala niu hasband and waef nomoa wea mas showimaot respect long day wea tufala marit. Sapos wanfala Christian elder bae givim marit tok, hem tu shud showimaot respect long wei wea hem givim datfala tok. Hem shud story nomoa long tufala wea bae marit. Long wei for showimaot respect long tufala, speaker bae no mekfani or talem olketa kastom story. Hem shud no talem olketa samting abaotem tufala wea maet mekem tufala and olketa narawan wea lisin for feel shame. Bat hem bae traem best bilong hem for showimaot feeling and buildimap tufala, and mekhae long Man wea startim marit and nambawan advaes bilong Hem. Tru nao, wei wea datfala elder showimaot respect insaed marit tok bae mekem datfala marit givim honor long Jehovah God.

17. Why nao olketa Christian marit mas stret saed long law?

¹⁷ Maet iu lukim finis hao disfala article hem storyim plande samting abaotem olketa law saed long marit. Maet samfala samting hem no fitim ples bilong iu. Nomata olsem, iumi evriwan shud luksavve hao hem important for olketa marit arrangement bilong Olketa Jehovah’s Witness showimaot respect for olketa law bilong kantri, wea hem nao olketa law bilong Caesar. (Luke 20:25) Paul encouragem iumi olsem: “Givim samting wea each wan fit for kasem, sapos man askem tax, givim hem tax; sapos man askem tribute tax, givim hem datkaen tax; . . . sapos man askem pipol for respectim hem, showimaot respect long hem.” (Romans 13:7) Tru nao, tufala Christian wea marit mas showimaot respect for datfala arrangement wea God markem distaem start long day wea tufala marit.

18. Sapos olketa Christian ting for garem marit feast, wanem nao olketa shud tingim, and wea nao iumi savve faendem information abaotem diswan?

¹⁸ Bihaen plande Christian marit, olketa savve hipap for wanfala marit feast. Remember hao Jesus hem chus for attendim wanfala marit feast. Sapos wanfala feast hem kamap, hao nao kaonsel from Bible savve helpem iumi for mek sure datwan bae showimaot respect for God and mekem pipol tinghae long datfala niu hasband and waef and long Christian kongregeson? Bae iumi story raonem datfala samting long nextfala article.d

Laef Bilong Iu Mas Showimaot Iu Garem Faith

“Sapos faith no muvim man for duim samting, faith hia hem dae finis.”​—JAMES 2:​17.

1. Why nao olketa Christian bifor luksavve hao olketa need for garem faith and duim waka wea showimaot datwan?

STAKA Christian long taem bifor showimaot long laef bilong olketa hao olketa garem faith. Disaepol James encouragem evri Christian olsem: “Kamap pipol wea followim datfala word, no pipol wea herem nomoa.” Hem sei moa: “Olsem body wea no garem spirit hem dae finis, faith wea no muvim man for duim samting hem dae finis tu.” (James 1:​22; 2:​26) Samting olsem 35 year bihaen hem raetem datwan, plande Christian gohed for duim waka wea showimaot olketa garem faith. Bat sorre nao, samfala no duim datwan. Jesus praisem kongregeson long Smyrna; bat hem sei olsem long plande brata long kongregeson long Sardis: “Mi savve long evri samting wea iufala duim and hao iufala garem nem wea showimaot iufala laef, bat iufala dae finis.”​—Revelation 2:​8-​11; 3:1.

2. Olketa Christian shud askem olketa seleva olketa wanem samting saed long faith bilong olketa?

² From diswan, Jesus encouragem olketa long Sardis​—and evriwan wea bae readim toktok bilong hem bihaen​—for garem sem love for truth wea olketa garem firstaem and for luksavve long need for gohed fren gud witim God. (Revelation 3:​2, 3) Each wan long iumi savve askem iumiseleva olsem: ‘Waswe long waka bilong mi? Waswe, mi duim best bilong mi long evri samting wea mi duim for showimaot mi garem faith, nomata long olketa samting wea no join witim preaching waka or olketa kongregeson meeting?’ (Luke 16:10) Iumi savve storyim plande samting iumi duim long laef wea showimaot iumi garem faith, bat iumi bae storyim wanfala samting nomoa: olketa hipap, wea insaed diswan hem olketa Christian marit feast.

Olketa Hipap wea Smol Nomoa

3. Wanem nao Bible talem abaotem wei for garem olketa hipap?

³ Staka long iumi hapi for kasem invitation for hipap witim olketa hapi Christian. Jehovah hem “datfala hapi God” wea laekem olketa servant bilong hem for hapi. (1 Timothy 1:​11) Hem muvim Solomon for raetem disfala tru samting insaed long Bible: “Miseleva encouragem wei for hapi, bikos olketa man no garem eni samting wea moabeta andanit long sun winim wei for kaikai and drink and hapi, and for olketa mas kasem diswan taem olketa duim hard waka long full laef bilong olketa.” (Ecclesiastes 3:​1, 4, 13; 8:​15) Maet disfala wei for hapi hem long taem wea famili kaikai tugeta or long samfala nara smol hipap witim olketa brata and sista.​—Job 1:​4, 5, 18; Luke 10:38-​42; 14:12-​14.

4. Man wea arrangem wanfala hipap shud tingim wanem samting firstaem?

⁴ Sapos iu arrangem wanfala hipap olsem and garem responsibility for lukaftarem datwan, iu shud ting raonem gud wanem nao iu planim, nomata sapos iu invaetem tu-thri brata and sista nomoa for kaikai witim iu and story tugeta. (Romans 12:13) Iu bae laek for mek sure ‘evri samting followim stretfala wei,’ wea followim “wisdom from antap.” (1 Corinthians 14:40; James 3:​17) Aposol Paul hem raet olsem: “Nomata iufala kaikai or drink or duim eni samting, duim evri samting long wei wea givim glory long God. No duim eni samting wea mekem olketa [narawan] stambol.” (1 Corinthians 10:31, 32) Wanem nao samfala samting wea iumi mas tingim? Wei for ting raonem olketa samting hia firstaem savve help for mek sure samting wea iu and olketa narawan wea iu invaetem duim, bae showimaot iu garem faith.​—Romans 12:2.

Wanem Nao Bae Gohed Long Datfala Hipap?

5. Why nao man wea arrangem wanfala hipap shud tingting gud firstaem sapos hem bae provaedem alcohol and pleim music?

⁵ Plande pipol wea arrangem olketa hipap mas disaed sapos olketa bae provaedem alcohol. Man no need for provaedem alcohol for mekem evriwan enjoyim datfala hipap. Tingim taem wea Jesus duim mirakol for provaedem bred and fish for wanfala big crowd for kaikaim. Bible no talem hao Jesus hem duim mirakol for provaedem wine long datfala taem, nomata iumi savve hem fit for duim datwan. (Matthew 14:14-​21) Sapos iu disaed for provaedem alcohol long wanfala hipap, iusim long balance wei, and mek sure iu provaedem olketa narakaen drink for olketa wea no drinkim alcohol. (1 Timothy 3:​2, 3, 8; 5:​23; 1 Peter 4:3) Barava stap klia long wei for forcem eniwan for drinkim samting wea maet hem savve baet “olsem wanfala snek.” (Proverbs 23:29-​32) Waswe saed long music or singsing? Sapos iu disaed for pleim music long hipap wea iu arrangem, chusim gud olketa song, and tingim olketa word and beat bilong datfala music. (Colossians 3:8; James 1:​21) Plande Christian talem hao wei for pleim Kingdom Melodies or for singim olketa song olsem tugeta hem savve mekem naesfala feeling kamap. (Ephesians 5:​19, 20) And tu, iu mas evritaem mek sure music hem no laod tumas wea savve mekem hem hard for olketa story or wea disturbim olketa neiba.​—Matthew 7:​12.

6. Hao nao man wea arrangem hipap savve showimaot hem garem strongfala faith saed long wei for story tugeta or olketa narafala samting?

⁶ Long wanfala hipap, maet olketa Christian story abaotem olketa difren subject, readim big samfala information, or storyim olketa interesting experience. Sapos olketa start for storyim samting wea no really followim olketa Christian standard, man wea arrangem datfala hipap savve tanem story go difren. And tu, hem shud mek sure no wanfala man nomoa gohed for story. Sapos datwan hem happen, long kaenfala wei hem savve askem samfala kwestin long olketa young wan or storyim wanfala samting wea muvim olketa narawan for talemaot tingting bilong olketa. Olketa young wan and olketa olo bae hapi tumas long diswan. Sapos iu arrangem wanfala hipap and duim diswan long wise and gudfala wei, ‘balance fasin bilong iu bae showaot’ long olketa wea hipap. (Philippians 4:5) Bae olketa luksavve hao iu garem strongfala faith wea affectim evri part long laef bilong iu.

Olketa Marit Ceremony and Marit Feast

7. Why nao man mas garem gudfala tingting taem hem planim wanfala marit and marit feast?

⁷ Wanfala Christian marit hem spesol taem for hapi. Olketa servant bilong God bifor, and Jesus and olketa disaepol bilong hem, hapi for share insaed kaen samting olsem and olketa feast tu. (Genesis 29:21, 22; John 2:​1, 2) Bat distaem, plande samting hem showimaot hao olketa Christian mas waka hard for planim wanfala marit feast, mekem datwan showimaot gudfala tingting and balance. Nomata olsem, olketa marit feast hem normal samting long laef wea savve givim chance for wanfala Christian for showimaot hem garem faith.

8, 9. Hao nao samting wea pipol duim long plande marit showimaot toktok long 1 John 2:​16, 17 hem tru?

⁸ Plande pipol wea no savve or ting strong long olketa Bible principle ting long wanfala marit olsem excuse for duim samting wea ova tumas. Insaed wanfala magasin long Europe, wanfala woman wea just marit talem olsem abaotem nambawan marit bilong hem: ‘Mifala sidaon insaed wanfala wagon wea fofala horse pullim, and nara 12-fala wagon wea olketa horse pullim kam bihaen and narafala wagon garem band insaed wea pleim music. Then mifala garem barava spesol kaikai and nambawan music; hem barava nambawan day. Long datfala day, mi olsem wanfala queen, wea hem nao samting wea mi laekem tumas.’

⁹ Nomata olketa kastom hem difren long each kantri, samting wea disfala woman talem hem pruvim hao disfala toktok bilong aposol John hem tru: “Evri samting long world​—samting wea body wantem and samting wea eye wantem and wei for show-off witim samting wea man garem​—hem no kam from Father, bat hem kam from world.” Waswe, iu tingse tufala Christian wea mature bae want for garem kaen marit olsem wea ova tumas? Winim wei for laekem datwan, olketa shud planim marit bilong olketa long wei wea showimaot olketa ting raonem disfala kaonsel: “Man wea duim will bilong God bae stap for olowe.”​—1 John 2:​16, 17.

10. (a) Why nao man need for plan gud firstaem for garem marit wea balance? (b) Hao nao tufala wea bae marit shud mekem disison abaotem hu nao for invaetem long marit?

¹⁰ Bible savve helpem olketa Christian wea bae marit for garem fasin for luksavve and balance. Nomata day wea tufala marit hem wanfala important day, olketa luksavve hao datwan hem just start nomoa bilong marit laef bilong tufala Christian wea garem hope for laef olowe. Olketa no need for garem wanfala big marit feast. Sapos olketa chus for garem marit feast, olketa bae need for tingim haomas nao kost bilong datwan and wanem kaen feast nao olketa bae garem. (Luke 14:28) Taem tufala Christian marit, hasband nao bae hed bilong famili. (1 Corinthians 11:3; Ephesians 5:​22, 23) So man wea bae marit nao hem main wan wea garem responsibility for lukaftarem marit feast. Hem tru, bae hem story witim gele wea hem bae maritim abaotem hu nao olketa laek for invaetem or haomas pipol nao olketa fit for invaetem long marit feast. Maet olketa no fit for invaetem evri fren or relative bilong olketa; dastawe, olketa need for garem balance tingting taem olketa disaedem samfala samting. Tufala shud feel sure hao sapos tufala no fit for invaetem samfala Christian brata and sista, olketa hia bae minim datwan and no kamap kros.​—Ecclesiastes 7:9.

“Man wea Lukaftarem Feast”

11. Wanem waka nao wanfala “man wea lukaftarem feast” duim long marit?

¹¹ Sapos tufala wea bae marit disaed for garem wanfala marit feast, hao nao tufala savve mek sure datwan bae showimaot respect? For plande year, Olketa Jehovah’s Witness luksavve hao hem wise for garem sem samting wea datfala marit feast wea Jesus attendim long Cana hem garem. Olketa garem wanfala “man wea lukaftarem feast,” wea hem nao wanfala Christian brata. (John 2:​9, 10) Olsem tu, man wea bae marit wea wise bae chusim wanfala Christian brata wea mature long spiritual wei for duim disfala important waka. Taem brata wea lukaftarem feast savve long evri samting wea man wea bae marit laekem hem for duim, hem savve duim olketa samting hia bifor datfala feast and taem datwan hem gohed.

12. Wanem samting nao man wea bae marit shud tingim saed long wei for provaedem alcohol?

¹² Olsem paragraf 5 storyim, samfala wea bae marit disaed for no provaedem alcohol long marit feast, mekem no eni problem kamap wea savve spoelem datfala hapi day. (Romans 13:13; 1 Corinthians 5:​11) Bat sapos olketa disaed for provaedem alcohol, man wea marit shud mek sure olketa iusim diswan long balance wei. Olketa provaedem wine long datfala feast wea Jesus attendim long Cana, and Jesus tu provaedem gudfala wine. Interesting samting nao, man wea lukaftarem datfala feast hem sei olsem: “Evri nara man givim gudfala wine firstaem, and taem pipol drunk finis, olketa givim kam wine wea no mas gud. Bat iu keepim gudfala wine hia kam kasem distaem.” (John 2:​10) For sure, Jesus no encouragem man for kamap drunk, from hem luksavve hao datwan hem rong. (Luke 12:45, 46) Taem datfala man wea lukaftarem feast talemaot hao hem sapraes long gudfala wine wea Jesus provaedem, hem showimaot klia hao hem lukim finis wei wea samfala pipol kamap drunk long olketa marit feast. (Acts 2:​15; 1 Thessalonians 5:7) Dastawe, man wea just marit and brata wea hem trustim and markem for lukaftarem feast mas mek sure evriwan wea kam long marit feast followim disfala klia komand: “No kamap drunk witim wine wea savve spoelem man.”​—Ephesians 5:​18; Proverbs 20:1; Hosea 4:​11.

13. Wanem nao tufala wea bae marit shud tingim sapos tufala disaed for pleim music long marit feast, and why nao olsem?

¹³ Olsem long olketa nara hipap, sapos man disaed for pleim music, hem mas mek sure datfala music hem no laod tumas mekem hem isi for pipol story. Wanfala Christian elder talem olsem: “Gogo, taem pipol start for story big or dance, samfala taem music hem start for laod tumas. Music wea kwaet lelebet firstaem maet kamap laod tumas and mekem hem hard for pipol story. Marit feast hem chance for kaban witim olketa brata and sista. Hem sorre samting sapos laod music hem spoelem datwan!” Man wea bae marit and man wea lukaftarem feast mas acceptim tu disfala responsibility saed long music and no letem olketa wea pleim music for disaedem wanem kaen music for pleim or laod bilong hem. Diswan hem tru nomata iumi peim man for pleim music or nomoa. Paul hem raet olsem: “Nomata wanem samting iufala duim saed long toktok or long waka, duim evri samting long nem bilong Lord Jesus.” (Colossians 3:​17) Taem olketa wea attendim marit feast go bak long haos bilong olketa, olketa shud tingim hao datfala music hem showimaot tufala wea just marit duim evri samting long nem bilong Jesus.

14. Wanem samting nao olketa Christian shud rememberim saed long wanfala marit?

¹⁴ Tru nao, pipol savve rememberim wanfala marit wea barava organize gud. Adam and Edyta wea marit for 30 year finis talem olsem abaotem wanfala marit: “Iu savve barava luksavve hem wanfala Christian hipap. Olketa pleim olketa song for praisem Jehovah, and tu, olketa duim samfala nara samting wea naes tumas. Wei for dance and pleim music hem no main samting long datfala marit. Datfala marit hem naes tumas and encouragem evriwan, and evri samting followim olketa Bible principle.” Tru nao, tufala wea bae marit savve duim plande samting for showimaot hao tufala garem faith.

Olketa Present for Olketa wea Marit

15. Iumi savve followim wanem kaonsel from Bible saed long olketa present for olketa wea marit?

¹⁵ Long plande kantri olketa fren and relative givim present long olketa wea bae marit. Sapos iu disaed for duim olsem, wanem nao maet iu tingim firstaem? Tingim toktok bilong aposol John abaotem “wei for show-off witim samting wea man garem.” Hem joinim wei for show-off witim ‘world wea gogo for finis,’ no witim olketa Christian wea showimaot olketa garem strongfala faith. (1 John 2:​16, 17) Taem iumi tingim samting wea John talem, waswe, tufala wea just marit shud talemaot front long evriwan nem bilong each wan wea givim olketa present? Olketa Christian from Macedonia and Achaia givim olketa contribution for olketa brata long Jerusalem, bat no eni samting showimaot hao olketa talemaot long pablik nem bilong each wan wea givim datwan. (Romans 15:26) Winim wei for mekem nara pipol tinghae long olketa, plande Christian wea givim present for olketa wea marit no laekem olketa narawan for savve long diswan. Lukluk moa long kaonsel bilong Jesus abaotem diswan long Matthew 6:​1-4.

16. Hao nao olketa wea just marit savve stap klia long wei for mekem narawan feel shame?

¹⁶ Wei for talemaot hu nao givim olketa present savve mekem pipol “trae for winim narawan,” long wei for tingim wanem present nao hem moabeta or wea kostim staka selen. Dastawe, olketa Christian wea just marit bae no talemaot front long evriwan nem bilong each wan wea givim present wea maet mekem olketa narawan wea no fit for peim wanfala present for feel shame. (Galatians 5:​26; 6:​10) Tru nao, hem no rong for tufala wea just marit for savve hu nao givim olketa present. Olketa savve faendemaot diswan sapos olketa kasem wanfala card witim datfala present wea olketa seleva savve readim. Taem iumi peim, or givim olketa present for olketa wea marit, or sapos iumi kasem datwan, iumi evriwan garem chance for showimaot iumi garem strongfala faith.a

17. Wanem goal nao olketa Christian shud garem saed long faith bilong olketa and samting wea olketa duim?

¹⁷ For showimaot iumi garem faith, iumi need for duim moa samting winim wei for garem klinfala fasin, attendim olketa Christian meeting, and share long preaching waka. Iumi evriwan mas garem strongfala faith wea affectim evri samting wea iumi duim. Tru nao, iumi savve showimaot iumi garem faith long wei wea iumi duim waka bilong iumi “evribit,” wea insaed diswan hem olketa samting long laef wea iumi storyim finis.​—Revelation 3:2.

18. Hao nao iumi savve followim toktok long John 13:17 saed long olketa Christian marit and olketa hipap?

¹⁸ Bihaen Jesus showimaot gudfala example bilong hambol fasin taem hem wasim leg bilong olketa faithful aposol bilong hem, hem sei olsem: “Sapos iufala savve long olketa samting hia, bae iufala hapi sapos iufala duim olketa.” (John 13:​4-​17) Long ples wea iumi stap distaem, maet hem no wei bilong pipol for wasim leg bilong samwan wea iumi invaetem for kam long haos bilong iumi. Bat olsem iumi storyim long disfala article, iumi savve showimaot faith bilong iumi taem iumi duim samting wea showimaot iumi lovem and tingim nara pipol long olketa nara samting long laef, wea insaed diswan hem olketa hipap and olketa Christian marit. Iumi savve showimaot diswan sapos iumi bae marit or iumi kasem invitation for go long wanfala marit wea olketa hapi Christian hipap wea laekem tumas for showimaot faith thru long samting olketa duim.