“Evri Samting wea Iufala Duim Mas Givim Glory Long God”

IUMI wea worshipim God, mas evritaem talem and duim samting wea givim glory lo Jehovah. Aposol Paul talem wanfala principle wea savve helpem iumi. Hem sei: “So nomata iufala kaikai or drink or duim eni nara samting, evri samting wea iufala duim mas givim glory long God.” (1 Cor. 10:31) Diswan minim for followim olketa raeteous standard blo Jehovah wea showim olketa perfect wei blo hem. (Col. 3:10) From iumi pipol wea holy, iumi mas followim wei blo God.​—Eph. 5:1, 2.

² Aposol Peter raet abaotem diswan lo olketa Christian: “From iufala olketa pikinini wea obey, no followim olketa old wei wea iufala garem taem iufala no savve long God. Bat iufala mas holy long evri samting wea iufala duim, olsem datfala Holy God wea hem chusim iufala, bikos olketa Holy Raeting sei: “Iufala mas holy bikos mi nao mi holy.’” (1 Pet. 1:14-16) Olsem lo Israel bifor, evriwan insaed Christian kongregeson mas gohed holy. Diswan minim olketa mas klin and no garem nogud wei blo pipol lo world. Olketa difren from olketa worshipim Jehovah.​—Ex. 20:5.

³ For gohed holy iumi mas followim olketa law and principle blo Jehovah wea stap lo Bible. (2 Tim. 3:16) Taem iumi studyim Bible, iumi lane abaotem Jehovah and olketa wei blo hem and iumi fren gud witim hem. Wei for study helpem iumi for luksavve iumi need for putim kingdom blo God first lo laef and for duim wat Jehovah laekem nao hem important samting. (Matt. 6:33; Rome 12:2) Diswan minim iumi mas garem niufala wei.​—Eph. 4:22-24.

KLIN LO SPIRITUAL AND WEI BLO IUMI

⁴ Hem no evritaem isi for followim olketa raeteous standard blo Jehovah. Enemy blo iumi, Satan datfala Devil, lukaotem wei for mekem iumi lusim truth. Olketa nogud samting from disfala world savve influencim iumi and wik point blo iumiseleva mekem hem no isi samfala taem. For gohed faithful, iumi mas faet lo spiritual wei. Bible talem iumi for no sapraes taem iumi kasem persecution or olketa hard taem. Iumi bae safa from iumi duim stret samting. (2 Tim. 3:12) Iumi savve hapi nomata iumi kasem hard taem, from iumi savve olketa hard taem hia pruvim iumi duim wat God hem laekem.​—1 Pet. 3:14-16; 4:12, 14-16.

⁵ Nomata Jesus hem perfect, hem lane for obey taem hem safa lo olketa nogud samting. No enitaem hem foldaon lo olketa test blo Satan or garem tingting blo world. (Matt. 4:1-11; John 6:15) No enitaem hem ting for lusim truth. Nomata pipol lo disfala world heitim hem from hem faithful, hem gohed for followim olketa raeteous standard blo Jehovah. No longtaem bifor Jesus dae, hem talem olketa disaepol blo hem dat pipol lo world bae heitim olketa tu. Start kam from datfala taem, olketa follower blo Jesus kasem persecution bat olketa nating givap from olketa savve Son blo God hem winim world finis.​—John 15:19; 16:33; 17:16.

⁶ For iumi no part lo disfala world, iumi need for barava followim olketa raeteous standard blo Jehovah, olsem Masta blo iumi duim. And tu, for no involve lo eni politikol issue and problem blo disfala world, iumi mas stap klia from olketa nogud samting blo disfala world. Hem important tumas for tingim disfala kaonsel lo James 1:21: “Lusim olketa rabis samting and olketa nogud wei wea staka pipol garem. Iufala mas hambol for letem God plantim toktok bilong hem insaed long iufala wea datwan savve sevem laef bilong iufala.” Taem iumi study and attendim meeting iumi letem “God plantim toktok blo hem” wea tru insaed mind and heart blo iumi, and iumi bae no laekem olketa samting blo disfala world. Disaepol James sei olsem: “Waswe, iufala no savve man wea fren witim world hem enemy bilong God? Eniwan wea laek for fren witim world hem mekem hemseleva for enemy bilong God.” (Jas. 4:4) From diswan, Bible barava encouragem iumi for followim olketa raeteous standard blo Jehovah and no part lo disfala world.

⁷ Bible warnim iumi for stap klia from olketa nogud wei and for durong. Hem sei: “Iufala mas no storyim wei for durong, and no storyim tu evri difren kaen wei for no klin, or wei for greedy, bikos diswan hem no fitim pipol wea holy.” (Eph. 5:3) So iumi mas no letem mind blo iumi for tingim olketa rabis samting or wei for durong, and iumi mas no storyim olketa samting hia. Taem iumi duim olsem, datwan showim iumi laek for followim olketa raeteous standard blo Jehovah wea klin.

KLIN LO PHYSICAL WEI

⁸ Olketa Christian luksavve hem important for klin lo spiritual and wei blo iumi, and for klin lo physical wei tu. Lo Israel bifor, datfala God wea holy laekem olketa for mas keepim camp blo olketa klin. Iumi tu mas klin mekem Jehovah “no lukim eni samting wea [iumi] duim wea no showimaot respect.”​—Deut. 23:14.

⁹ Lo Bible, for holy and klin lo physical wei hem join tugeta. For example, Paul sei: “So olketa fren bilong mi . . . iumi mas klinim from body bilong iumiseleva eni samting wea savve mekem body or tingting bilong iumi for no klin, mekem iumi kamap holy from iumi fraet long God.” (2 Cor. 7:1) Dastawe, iumi olketa Christian shud traem best for keepim body blo iumi klin, taem iumi swim evritaem and wasim kaleko blo iumi. Nomata situation lo evri kantri no semsem, iumi evriwan fit for garem soap and wata for swim evriday mekem iumi and olketa pikinini blo iumi savve klin.

¹⁰ From preaching waka wea iumi duim, pipol lo community savve lo iumi. For keepim insaed and aotsaed lo haos neat and klin hem givim witness lo olketa neiba. Diswan hem responsibility blo evriwan lo famili. Olketa brata shud lukaftarem haos and area raonem haos, from olketa savve taem area and haos hem klin datwan givim witness lo olketa narawan. For duim diswan and for lead lo olketa spiritual samting hem showim famili hed lukaftarem gud famili blo hem. (1 Tim. 3:4, 12) Olketa sista tu garem responsibility for lukaftarem olketa samting especially insaed lo haos. (Titus 2:4, 5) Olketa pikinini wea kasem gud training savve help for keepim olketa seleva and rum blo olketa neat and klin. Taem famili waka tugeta for stap klin datwan bae fitim niu world anda lo Kingdom blo God.

¹¹ Staka lo pipol blo Jehovah distaem iusim trak for go lo meeting. Lo samfala ples, car hem main samting wea olketa iusim for go lo ministry. Olketa shud klinim and repairim gud datfala car. Haos and trak blo iumi shud showim iumi pipol blo Jehovah wea holy and klin. Datfala sem principle hem apply tu for basket and Bible wea iumi iusim lo ministry.

¹² Hao iumi dressap shud fitim olketa Bible principle. Hard for iumi werem eni dirty kaleko or eni kaleko nomoa taem iumi go for meetim wanfala bigman blo gavman. Haomas moa taem iumi representim Jehovah lo field ministry or lo platform! Hao iumi dressap savve affectim hao pipol ting lo worship blo iumi for Jehovah. Iumi mas werem kaleko wea showim respect or wea showim iumi tingim olketa narawan. (Mic. 6:8; 1 Cor. 10:31-33; 1 Tim. 2:9, 10) Dastawe, taem iumi redi for go lo field service or go lo kongregeson meeting, circuit assembly or convention, iumi shud tingim wat Bible talem abaotem wei for klin lo physical and hao iumi dressap. Iumi evritaem laek for givim honor and glory lo Jehovah.

¹³ Datwan semsem tu taem iumi visitim world hedquarter or wanfala branch office blo Olketa Jehovah’s Witness. Tingim, nem Bethel hem minim “Haos blo God.” So, wei blo iumi and hao iumi dressap shud olsem taem iumi attendim meeting lo Kingdom Hall.

¹⁴ Nomata lo taem wea iumi duim olketa nara samting, iumi laek for evritaem tingim hao iumi dressap. Iumi maet ask olsem, ‘Hao, mi fraet for duim informal witnessing bikos lo hao mi dressap?’

HAPITAEM AND ENTERTAINMENT

¹⁵ For rest and duim hapitaem savve mekem iumi for balance and healthy. Wantaem Jesus talem olketa disaepol blo hem for go witim hem lo wanfala kwaet ples for “rest lelebet.” (Mark 6:31) For rest and duim hapitaem or entertainment savve mekem iumi hapi. Hem savve helpem iumi for gohed strong for duim waka evriday.

¹⁶ From staka difren wei for duim hapitaem hem stap distaem, olketa Christian mas iusim wisdom wea kam from God for chusim wat kaen hapitaem for enjoyim. Nomata iumi garem taem for duim hapitaem, datwan hem no important samting lo laef. Iumi kasem warning hao lo “olketa last day”, pipol “bae no lovem God, bat bae interest nomoa for enjoyim seleva.” (2 Tim. 3:1, 4) Staka hapitaem and entertainment distaem hem no fitim olketa wea laek for followim standard blo Jehovah.

¹⁷ Olketa Christian lo first century mas againstim olketa nogud entertainment wea happen raonem olketa. Lo circus blo Rome, pipol hapi taem olketa lukim narawan safa. Main samting lo olketa hapitaem hia hem violence, for killim man dae, and for durong, bat olketa Christian lo first century no joinim olketa samting hia. Distaem staka entertainment lo world mekhae lo olketa sem samting hia and hem savve switim feeling blo iumi. Iumi need for “lukluk gud” lo samting wea iumi duim mekem iumi stap klia from olketa nogud entertainment. (Eph. 5:15, 16; Ps. 11:5) And nomata if datfala entertainment hem olraet nomoa, pipol wea stap lo there nao maet no fit for iumi associate witim olketa.​—1 Pet. 4:1-4.

¹⁸ Staka difren wei stap for duim hapitaem and entertainment wea olketa Christian savve enjoyim. Staka kasem gud samting from olketa followim kaonsel lo Bible and olketa idea wea olketa lukim lo olketa pablikeson blo iumi.

¹⁹ Samfala taem, samfala famili savve invaetem olketa narawan lo haos blo olketa. Or olketa brata and sista maet kasem invitation for attendim wanfala wedding reception or eni nara program. (John 2:2) Man wea organizem datwan mas responsible for eni samting wea happen. Hem klia, iumi need for careful taem staka pipol nao hipap tugeta. From pipol enjoyim kaen gathering olsem, datwan savve mekem samfala for no followim nao wei blo wanfala Christian, and kaikai and drink tumas and duim tu olketa nara serious sin. Olketa Christian wea garem wei for luksavve bae tingim datwan and katem daon namba blo pipol and hao long datfala gathering bae gohed. If olketa bae givimaot alcohol, olketa shud no ova tumas. (Phil. 4:5) If iumi traem best for mek sure eni hapitaem wea iumi organizem hem gud and strongim spiritual saed blo iumi, kaikai and drink bae hem no important samting tumas for tingim.

²⁰ For welkamim olketa narawan hem gud samting. (1 Pet. 4:9) Taem iumi invaetem olketa nara Christian lo haos for kaikai, hapitaem, and for associate, iumi mas tingim tu olketa wea kasem hard taem. (Luke 14:12-14) If iumi nao kasem invitation, wei blo iumi shud followim kaonsel lo Mark 12:31. Taem olketa narawan kaen lo iumi, hem gud for evritaem showim wei for tinghae.

²¹ Olketa Christian hapi lo staka present wea God givim and olketa luksavve olketa fit for “kaikai and drink and enjoyim evri hard waka blo [olketa].” (Eccl 3:12, 13) Taem ‘evri samting iumi duim givim glory long God’, evriwan wea hipap lo datfala hapitaem bae hapi bikos hem strongim spiritual saed blo olketa.

OLKETA SKUL ACTIVITY

²² Olketa pikinini blo Olketa Jehovah’s Witness kasem gud samting from gudfala education. Taem olketa attendim skul, olketa interest for lane for read and raet gud. Olketa nara samting wea olketa lanem lo skul savve helpem olketa young wan lo olketa spiritual goal blo olketa. Taem olketa skul yet, olketa bae traem best for “rememberim Nambawan Creator blo [olketa]” taem olketa putim olketa spiritual samting first lo laef.​—Eccl. 12:1.

²³ If iu wanfala young Christian wea skul, careful for no associate tumas witim olketa young wan wea no worshipim Jehovah. (2 Tim. 3:1, 2) From Jehovah provaedem olketa samting for protectim iu, staka samting nao iu savve duim for no letem world influencim iu. (Ps. 23:4; 91:1, 2) So iusim gud olketa samting wea Jehovah provaedem for protectim iu.​—Ps. 23:5.

²⁴ For separate from world taem olketa lo skul, staka young witness chus for no joinim olketa extra activity blo skul. Maet hem no isi for olketa classmate and teacher minim diswan. Bat for mekem God hapi nao hem important. Datwan minim bae iu followim konsens blo iu wea kasem training from Bible, disaed strong for no involve lo wei for compete or eni samting wea mekhae lo kantri. (Gal. 5:19, 26) Iufala olketa young wan savve gohed followim olketa raeteous standard blo Jehovah taem iufala followim olketa kaonsel lo Bible wea parents givim, and advaes wea iufala kasem taem iufala associate witim olketa brata and sista.

WAKA FOR SELEN AND OLKETA WEA IUMI ASSOCIATE WITIM

²⁵ Bible sei olketa famili hed mas provaed for famili. (1 Tim. 5:8) Bat from olketa wakaman blo God, olketa luksavve Kingdom waka nao hem important winim waka for selen. (Matt. 6:33; Rome 11:13) Taem olketa faithful lo God and satisfae witim kaikai and kaleko, olketa bae no wari tumas and no foldaon lo trap for laek garem staka material samting.​—1 Tim. 6:6-10.

²⁶ Evri Christian wea dedicate wea waka for selen shud tingim olketa Bible principle evritaem. For honest for provaed for iumiseleva hem minim iumi no join insaed eni samting wea againstim law blo God or law blo kantri. (Rome 13:1, 2; 1 Cor. 6:9, 10) Iumi mas tingim tu nogud samting wea iumi savve kasem from wei for associate witim pipol wea garem nogud wei. From iumi olketa soldia blo Christ iumi bae no joinim olketa bisnis wea againstim standard blo God, wea bae mekem iumi no faithful or spoelem spiritual saed blo iumi. (Isa. 2:4; 2 Tim. 2:4) And iumi no laek for duim eni samting wea join witim “Bigfala Babylon,” wea hem enemy blo God.​—Rev. 18:2, 4; 2 Cor. 6:14-17.

²⁷ For followim olketa raeteous standard blo God bae helpem iumi for no mekius lo olketa brata and sista for duim samting wea iumiseleva laekem, or for help lo bisnis blo iumi. Main reason iumi associate witim olketa narawan lo olketa meeting, assembly, and olketa convention hem for worshipim Jehovah nomoa. Iumi kaikai lo spiritual tebol blo Jehovah and “iumi evriwan strongim narawan.” (Rome 1:11, 12; Heb. 10:24, 25) Olketa association olsem hem for spiritual samting nomoa.

STAP TUGETA LO WAN MIND

²⁸ For followim olketa raeteous standard blo Jehovah hem minim tu for pipol blo hem mas “keepim nao wei for wan mind wea holy spirit helpem [olketa] for garem.” (Eph. 4:1-3) Instead for duim samting wea mekem olketa seleva nomoa hapi, each wan traem best for duim gud samting lo olketa narawan. (1 Thess. 5:15) For sure hem nao wat iu lukim lo kongregeson. Nomata iumi kam from difren race, kantri, garem difren living or education level, iumi evriwan followim sem raeteous standard. Nomata pipol lo world tu luksavve lo gudfala wei wea pipol blo Jehovah garem.​—1 Pet. 2:12.

²⁹ For strongim go moa wei for wan mind, aposol Paul sei: “Wanfala body nomoa stap and wanfala spirit, witim tu, wanfala hope wea God hem markem for iufala. Wanfala Lord hem stap, wanfala faith, and wanfala baptism. Wanfala God and wanfala Dadi nomoa hem stap, wea hem God and Dadi bilong evriwan. Hem garem paoa ovarem evriwan. Hem iusim evriwan for duim olketa samting, and paoa bilong hem waka insaed long evriwan.” (Eph. 4:4-6) So iumi need for wan mind for minim olketa main Bible teaching and olketa nara Bible teaching, datwan showim iumi luksavve lo raet blo Jehovah for rul. Yes, Jehovah givim pipol blo hem datfala pure languis wea hem nao truth, wea mekem olketa fit for wan mind for worshipim hem.​—Zeph. 3:9.

³⁰ Wan mind and peace wea iumi garem lo kongregeson hem encouragem evriwan wea worshipim Jehovah. Iumi experiencem disfala promis blo Jehovah: “Bae mi mekem olketa wan mind olsem olketa sheepsheep insaed fence.” (Mic. 2:12) Iumi laek for gohed garem wan mind taem iumi followim olketa raeteous standard blo Jehovah.

³¹ Evriwan wea stap insaed kongregeson blo Jehovah wea klin olketa hapi! For garem nem blo Jehovah hem winim evri sakrifaes wea iumi mekem. Taem iumi keepim spesol wei wea iumi fren witim Jehovah, iumi bae traem best for followim olketa raeteous standard blo hem, and encouragem olketa narawan for duim olsem tu.​—2 Cor. 3:18.