Ezra Teachim Law blo God

Hem samting olsem 70 years finis from taem wea staka Israelite go bak lo Jerusalem, bat samfala still stap lo olketa difren ples wea Persia rulim. Wanfala lo olketa hem wanfala priest wea nem blo Ezra, wea teachim Law blo Jehovah. Ezra herem dat pipol lo Jerusalem no followim Law blo Jehovah, and hem laek go for helpem olketa. King Artaxerxes blo Persia sei lo hem: ‘God mekem iu wise for iu savve teachim Law blo hem. Iu go, and tekem eniwan wea laek for go witim iu.’ Ezra meet witim evriwan wea laek for go bak witim hem lo Jerusalem. Olketa prea lo Jehovah for lukaftarem olketa bikos olketa bae wakabaot for staka day, then olketa go nao.

Afta fo months, olketa arrive lo Jerusalem. Olketa leader wea stap lo there sei lo Ezra: ‘Olketa Israelite disobeyim Jehovah and maritim olketa woman wea worshipim olketa false god.’ Wat nao Ezra duim? Ezra kneel daon front lo olketa pipol hia and prea olsem: ‘Jehovah, iu bin duim staka samting for mifala, bat mifala sin againstim iu.’ Olketa pipol hia repent, bat olketa still needim help for duim stret samting. So Ezra chusim olketa elder and olketa judge for stretem datwan. Insaed next thrifala months, olketa sendem bak olketa wea no worshipim Jehovah.

Afta twelv years, olketa buildim bak wall blo Jerusalem. So Ezra talem pipol for kam hipap lo wanfala pablik area mekem hem readim Law blo God lo olketa. Taem Ezra openem datfala buk blo Law, evri pipol hia standap. Hem praisem Jehovah, and olketa liftimap hand blo olketa for showim olketa agree lo datwan. Then Ezra readim and explainim datfala Law, and olketa pipol hia lisin gud. Olketa talem dat olketa lusim Jehovah moa, and olketa krae. Lo next day, Ezra readim moa datfala Law lo olketa. Olketa luksavve hem klosap nao for olketa celebratem Festival blo Olketa Smol Laef Haos. So olketa start for prepare for datfala festival.

Lo sevenfala day blo datfala festival, pipol hia hapi tumas and talem thankiu lo Jehovah for blessim garden blo olketa. From taem blo Joshua, diswan nao hem best Festival blo Olketa Smol Leaf Haos wea olketa celebratem. Bihaen datfala festival, pipol hia hipap tugeta and prea olsem: ‘Jehovah, iu mekem mifala free from wei for slave, iu provaedem kaikai for mifala lo wilderness, and iu givim disfala gud land lo mifala. Bat mifala gohed for disobeyim iu nomoa. Iu sendem kam olketa profet for warnim mifala, bat mifala nating lisin. Nomata olsem, iu still patient. Iu keepim promis wea iu mekem lo Abraham. Distaem, mifala promis dat bae mifala obeyim iu.’ Olketa raetem promis blo olketa, and olketa leader, olketa Levite, and olketa priest stampim witim seal blo olketa.